ខេត្តបន្ទាយមានជ័យ ៖ អ្នករត់ម៉ូតូឌុបម្នាក់ ត្រូវចោរចាក់មួយកាំបិតរបួសធ្ងន់ រួចប្លន់យកម៉ូតូទៅបាត់ កាលពីវេលាម៉ោងជាង១០យប់ថ្ងៃទី២៩ ខែតុលា នៅតាមផ្លូវលំមួយក្នុងភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ។ ជនរងគ្រោះឈ្មោះ ឈាន ស៊ីណា ហៅម៉ៅ ភេទប្រុស អាយុ៣៦ឆ្នាំ ស្នាក់នៅក្នុងភូមិ
បាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត និងមានទីលំនៅក្នុងភូមិតាបែន ឃុំតាបែន ស្រុកស្វាយ ចេក ។
ជនរងគ្រោះ ត្រូវជនសង្ស័យចាក់នឹងកូនកាំបិតចំឆ្អឹងជំនីរខាងស្តាំប៉ងសម្លាប់ ហើយយកម៉ូតូបើកគេច
ទៅបាត់បន្ទាប់ពីប្រវាយប្រតប់គ្នាមួយប្រាវ ។ ក្រោយកើតហេតុ អ្នកស្រុកបានជួយដឹកជនរងគ្រោះទៅមន្ទីរពេទ្យបង្អែកក្រុងប៉ោយប៉ែត តែដោយរបួសធ្ងន់ពេកក្រុមគ្រូពេទ្យក៏បញ្ជូនបន្តទៅមន្ទីរពេទ្យមិត្តភាពកម្ពុជា-ជប៉ុនមង្គលបុរីទៀត ។
ប្រភពពីសាច់ញាតិប្រាប់ថា មុនមានហេតុការណ៍កើតឡើង ជនសង្ស័យបានហៅជនរងគ្រោះឲ្យដឹកពីផ្សារអគ្គៈទៅមន្ទីរពេទ្យបង្អែកក្រុងប៉ោយប៉ែត ។ លុះទៅដល់គោលដៅបែរជាជនសង្ស័យប្រាប់ឲ្យដឹកបន្តទៅមុខទៀត ពេលទៅដល់ចំណុចកើតហេតុ ជនសង្ស័យប្រាប់ឲ្យឈប់រួចទាញកាំបិតចាក់ជនរងគ្រោះ ហើយប្លន់យកម៉ូតូម៉ាកសេ១២៥ ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ បន្ទាយមានជ័យ ១K-៧៨៥៤ ជិះគេចទៅបាត់ស្រមោល ។
នាយប៉ុស្តិ៍នគរបាលសង្កាត់ផ្សារកណ្តាលប្រាប់តាមទូរស័ព្ទថា ករណីខាងលើពិតជាកើតមានមែន ហើយពេលនេះខាងនគរបាលប៉ុស្តិ៍កំពុងចុះស្រាវជ្រាវ ។ គួរបញ្ជាក់ថា មួយរយៈចុងក្រោយនេះ អំពើចោរកម្ម លួច ឆក់ នៅក្រុងប៉ោយប៉ែត កើតមានជាបន្តបន្ទាប់ ហើយអ្នកស្រុកបានសម្តែងការព្រួយបារម្ភពីសុវត្ថិ ភាពក្នុងការស់នៅ ។
គ្រួសាមួយប្តីឈ្មោះ ញើង គ្រីម អាយុ៥២ឆ្នាំ ប្រពន្ធឈ្មោះ លីម ឡាង អាយុ៤៨ឆ្នាំ នៅភូមិសាមគ្គីមានជ័យ ត្រូវចោរលួចកាបូបប្រាក់អស់និងទ្រព្យសម្បត្តិផ្សេងទៀតជាច្រើនដែលគិតជាប្រាក់ជិត១ម៉ឺនដុល្លារ កាលពីអំឡុងពាក់កណ្តាលខែកញ្ញា ឆ្នាំ២០១៩ ។ ម៉ូតូ២គ្រឿងត្រូវចោរកាច់សោ.កយកទៅបាត់កាលពីថ្ងៃទី២១ និងព្រឹកថ្ងៃទី២៨ ខែតុលា ឆ្នាំ២០១៩ នៅមុខទីតាំងសាខាលក់សំបុត្ររថយន្តក្រុងមួយកន្លែង ក្នុងភូមិក្បាលស្ពាន១ និងមុខផ្សាររ៉ាថ្មី ក្នុងភូមិប៉ោយប៉ែត ។
ករណីមួយទៀត នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត កាលពីព្រឹកថ្ងៃទី២៧ ខែ តុលា ឆ្នាំ២០១៩ ជនសង្ស័យម្នាក់ប្រដាប់ដោយដំបងដែក លបចូលផ្ទះស្ត្រីម្នាក់ ឈ្មោះ ស សុជាតិ សង្ស័យប៉ងវាយប្លន់យកប្រាក់ ។ ប៉ុន្តែចៃដន្យម្ចាស់ផ្ទះរវល់ចេញទៅហាលខោអាវ ជនសង្ស័យត្រឹមតែឆក់យកទូរស័ព្ទ១គ្រឿងម៉ាកវីវ៉ូពីចៅប្រុសរបស់ស្ត្រីខាងលើ រួចរត់គេចទៅបាត់ បន្សល់ទុកនៅតែដំបងដែក១នៅកន្លែងកើតហេតុ ។
អំពើចោរកម្មដែលកើតមានជាបន្តបន្ទាប់នេះ ត្រូវបានអ្នកស្រុករិះគន់ថា អាចបណ្តាលមក ពីល្បែងស៊ីសងកើតមានច្រើន ពិសេសតាមកា ស៊ីណូមួយចំនួន ដែលគេបណ្តោយឲ្យខ្មែរចូលលេងល្បែងយ៉ាងអនាធិបតេយ្យ ៕
ចែករំលែកព័តមាននេះ