ខេត្តកំពត ៖ មន្ត្រីមិនបានឱ្យដឹងទេថា តើនឹងមានវិធានការបែបណា ខណៈឱ្យដកស្លាកយីហោផ្ទះឆ្កែនោះចេញ ហើយជនជាតិបារាំងនោះមានការមានៈរឹងរូសនោះ ឬមួយយល់ថា ស្រេចតែអញមិនដក ?
គួរបញ្ជាក់ថា ប៉ាណូមួយត្រូវបានគេលើកប្រៀបដូចស្លាកយីហោ ដែលនរណាក៏មើលឃើញដែរ តែអ្វីដែលបង្កឱ្យមានប្រតិកម្មនោះ គឺស្លាកប៉ាណូនេះ គេសរសេរអក្សរខ្មែរធំៗថា «ផ្ទះឆ្កែ» និងមានរូបឆ្កែដេកក្នុងផ្ទះតូចមួយនៅខាងក្រោម ។
ការលើកស្លាកបែបនេះ ត្រូវបានធ្វើឡើងដោយជនជាតិបារាំង នៅភូមិ១ឧសភា សង្កាត់កំពង់កណ្ដាល ក្រុងកំពត ។ ប្រជាពលរដ្ឋកំពុងមានការចាប់អារម្មណ៍ជាទូទៅ ដោយសារតែផ្ទះជនបទេសមួយស្នាក់នៅបែរជាលើកស្លាកសរសេរថា «ផ្ទះឆ្កែ»ទៅវិញ ប្រៀបដូចមិនមែន «ផ្ទះមនុស្ស» រស់នៅ ។
ពាក់ព័ន្ធរឿងរ៉ាវការលើកស្លាករបស់ជនជាតិបារាំង នៅកណ្ដាលក្រុងកំពតនេះ អ្នកយកព័ត៌មានបានទាក់ទងតាមទូរស័ព្ទទៅលោក សយ សុីណុល ប្រធានមន្ទីរទេសចរណ៍ខេត្តកំពត កាលពីព្រឹកថ្ងៃទី៣០ តុលា តែទូរស័ព្ទរបស់លោកប្រធានរោទ៍២ដង គ្មានអ្នកលើក ។
ចំណែកលោក គង់ ផល្លា ប្រធានមន្ទីរវប្បធម៌និងវិចិត្រសិល្បៈខេត្តកំពតបានប្រាប់ឱ្យដឹងថា ការសរសេរស្លាកយីហោរបស់ជនជាតិបរទេសថា«ផ្ទះឆ្កែ»នោះយើងបានចុះទៅប្រាប់គាត់ម្ដងរួចហើយ កាលពីជាង១០ថ្ងៃមុន ។ លោកបានចាត់ទុកថា ការដាក់ឈ្មោះ «ផ្ទះឆ្កែ»នេះ វាបានធ្វើឱ្យប៉ះពាល់ដល់កិត្តិយសលំនៅឋានទូទៅ ។
លោក គង់ ផល្លា បានធ្វើការកត់សម្គាល់ថា ទោះបីគេលើកស្លាកសរសេរច្បាស់ៗថាផ្ទះឆ្កែ តែជនបទេសនោះមិនឃើញមានចិញ្ចឹមឆ្កែទេ ហើយក៏មិនឃើញលក់ដូរអ្វីពាក់ព័ន្ធចំណីអាហារសម្រាប់ឆ្កែដែរ ។ លោកមានប្រសាសន៍ទៀតថា យើងបានណែនាំដល់ជនជាតិបារាំងនោះថា អ្នកមិនចាំបាច់ដាក់ថាផ្ទះឆ្កែទេ គួរដាក់យីហោអ្វីផ្សេងដែលមិនប៉ះពាល់កិត្តិនាមកិត្តិយសខ្មែរ ។
មិនខ្វះទេប៉ាណូ និងស្លាកឃោសនារាប់ពាន់រាប់មឺុន ត្រូវបានដាក់នៅតាមដងផ្លូវនៅក្រុងកំពត តែចម្លែកផ្ទះជនបរទេសជាមនុស្សរស់នៅ បែរជាដាក់ថា«ផ្ទះឆ្កែ»ទៅវិញ ។
ចែករំលែកព័តមាននេះ