រាជធានីភ្នំពេញ ៖ រថយន្តមួយគ្រឿងម៉ាកតាកូម៉ាសង្ស័យអ្នកបើកបរស្រវឹងបានបើកបរក្នុងល្បឿនលឿនរេចង្កូតជ្រុលទៅបុកចូលផ្ទះវីងវេរលុយ និងផ្ទះជួសជុលម៉ាស៊ីនត្រជាក់ បណ្ដាលឲ្យរងការខូចខាត ចំណែកអ្នកបើកបររថយន្តក៏រងរបួសផងដែរ ។ ហេតុការណ៍ខាងលើនេះបានកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី៣១ ខែតុលា ឆ្នាំ២០១៩…
រាជធានីភ្នំពេញ ៖ រថយន្តមួយគ្រឿងម៉ាកតាកូម៉ាសង្ស័យអ្នកបើកបរស្រវឹងបានបើកបរក្នុងល្បឿនលឿនរេចង្កូតជ្រុលទៅបុកចូលផ្ទះវីងវេរលុយ និងផ្ទះជួសជុលម៉ាស៊ីនត្រជាក់ បណ្ដាលឲ្យរងការខូចខាត ចំណែកអ្នកបើកបររថយន្តក៏រងរបួសផងដែរ ។
ហេតុការណ៍ខាងលើនេះបានកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី៣១ ខែតុលា ឆ្នាំ២០១៩ នៅចំណុចផ្ទះវីងវេលុយយីហោ លាងហេង ទល់មុខវិទ្យាល័យជាស៊ីមសាមគ្គី តាមបណ្តោយផ្លូវលេខ២៧១ សង្កាត់ស្ទឹងមានជ័យ១ ខណ្ឌមានជ័យ ។
រថយន្តមួយគ្រឿងខាងលើជិះគ្នា២នាក់ ម៉ាកតាកូម៉ា ពណ៌ស ពាក់ស្លាកលេខ ភ្នំពេញ ២BC-៩៨៣៤ បើក បរដោយឈ្មោះ សូត រតនៈ ភេទប្រុស អាយុ៣០ឆ្នាំ មានស្រុកកំណើតនៅភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្ដាល បានរងរបួស និងបុរសម្នាក់ទៀតជាអ្នករួមដំណើរមិនស្គាល់អត្តសញ្ញាណនោះទេ ។
តាមប្រភពព័ត៌មានបានឲ្យដឹងថា មុនពេលកើតហេតុ គេឃើញបុរស២នាក់ជិះក្នុងរថយន្ត មួយគ្រឿងម៉ាកតាកូម៉ា ធ្វើដំណើរតាមផ្លូវ២៧១ ក្នុងទិសដៅពីជើងទៅត្បូងក្នុងល្បឿនលឿន ដោយអ្នកបើកបរមានជាតិស្រវឹងក្នុងខ្លួន លុះមកដល់ចំនុចកើតហេតុខាងលើដែលជាផ្លូវកោង ក៏ស្រាប់តែអ្នកបើកបរបួងចង្កូតមិនទាន់ ដោយសារតែរថយន្តមានល្បឿនលឿនពេក ទើបជ្រុលទៅបុកចូលផ្ទះវីងវេលុយ និងផ្ទះជួសជុលម៉ាស៊ីនត្រជាក់ បណ្ដាល រងការខូចខាតសំភារៈ និងទ្រព្យសម្បត្តិអស់មួយចំនួនធំ តែសំណាងល្អមិនមានគ្រោះថ្នាក់ដល់មនុស្សដែលសម្រាកក្នុងផ្ទះទាំង២កន្លែងនោះទេ ។
តាមប្រភពព័ត៌មានបានបន្តថា ដោយឡែករថយន្តបង្កបានរងការខូចខាតខ្ទេចផែ្នកខាងមុខ កៀបជាប់នឹងផ្ទះវីងវេរលុយ ធ្វើឲ្យអ្នកបើកបររងរបួសបែកមាត់ផងដែរ ភ្លាមៗនោះដែរ សមត្ថកិច្ចមូលដ្ឋានបានចុះទៅដល់ឃាត់ខ្លួនអ្នកបើកបរយកទៅប៉ុស្តិ៍នគរបាលស្ទឹងមានជ័យ១ ដើម្បីសួរនាំ ។
ក្រោយពេលកើតហេតុ រថយន្តព្រមទាំងអ្នកបើកបរត្រូវបានសមត្ថកិច្ចជំនាញចរាចរណ៍ក្រុងភ្នំពេញ បានចុះទៅស្ទូចយកទៅរក្សាទុកការការិយាល័យនគរបាលចរាចរណ៍ជើងគោករាជធានីភ្នំពេញដើម្បីរង់ចាំធ្វើការដោះស្រាយ ៕ (កែសម្រួលដោយ ៖ ធីតា)
ចែករំលែកព័តមាននេះ