នីន ម៉ាលីណែត ថា «កុំថាខ្ញុំអាហ្វ្រិក ខ្មែរសុទ្ធសាធ»

ថ្ងៃទី ៣១ ខែ តុលា ឆ្នាំ ២០១៩
ម៉ោង ០៨:០០
សុខ វាសនា

រាជធានីភ្នំពេញ ៖តារាបង្ហាញម៉ូដ និងសម្តែងនីន ម៉ាលីណែត បានប្រកាសដកខ្លួនចេញពីបេក្ខភាពក្នុងការប្រកួត Miss World Cambodia 2019 ដោយសារតែនាងមានធុរៈចាំបាច់ផ្ទាល់ខ្លួន ។ ទន្ទឹមនេះនាងបានសម្តែងការសោកស្តាយ និងសុំទោសប្រិយមិត្តគាំទ្ររបស់នាងទាំងអស់ចំពោះការដកខ្លួនចេញពីកម្មវិធីប្រកួតដ៏ធំមួយនេះ ។

បើយោងតាមការប្រកាសតាមហ្វេសប៊ុកអតីតបេក្ខជន Cambodia’s Next Top Model នីន ម៉ាលីណែត កាលពីពេល ថ្មីៗកន្លងមកបានបញ្ជាក់ថា នាងសុំដកបេក្ខភាពក្នុងកម្មវិធីប្រកួត Miss World Cambodia 2019ដោយសារនាងត្រូវចេញទៅក្រៅប្រទេសពុំអាចអាក់ខានបាននៅក្នុងខែនេះ។ នាងបន្ថែមថា «នាងខ្ញុំពិតជាមានការសោកស្ដាយខ្លាំងណាស់ ដែលមិនបានចូលរួមជាមួយនឹងកម្មវិធីប្រកួតមួយនេះ ។

អាស្រ័យហេតុនេះនាងខ្ញុំសូមអភ័យទោសចំពោះអ្នករៀបចំកម្មវិធីប្រកួត ពុកម៉ែបងប្អូនអ្នកគាំទ្រ និង FC របស់នាងខ្ញុំទាំងអស់គ្នាផងដែរ ។ នាងខ្ញុំសង្ឃឹមថាពុកម៉ែបងប្អូន និង FC របស់នាងខ្ញុំទាំងអស់នឹងនៅតែបន្ដការគាំទ្ររូបនាងខ្ញុំជារៀងរហូត»។

អតីត Cambodia’s Next Top Model នីន ម៉ាលីណែត មានសម្បុរខ្មៅ មុខមាត់ រូបរាងបែបជនជាតិអាហ្វ្រិក ។ នាងទទួលបានការងារច្រើនក្នុងអាជីពសិល្បៈ ខណៈនាងក៏ជានិស្សិតខាងផ្នែកដេគ័រផងដែរ ។ រវល់នឹងការសិក្សាពិតមែន តែនាងនៅតែឆ្លៀតចំពោះអាជីពសិល្បៈ ព្រោះតែនាងស្រលាញ់តាំងពីតូចមក ។

ក្នុងនាមជាតារាបង្ហាញម៉ូដ នីន ម៉ាលីណែត គិតថា ជាអ្នកសិល្បៈមួយរូបមិនគួរចេះតែមួយមុខទេ ដូច្នេះបើមានឱកាសនាងត្រូវតែចាប់អាជីពសម្ដែងថែមទៀត ។ ម៉ាលីណែត លើកឡើងថា មជ្ឈដ្ឋានជាច្រើនតែងតែច្រឡំថានាងជាជនជាតិអាមេរិក ឬអាហ្វ្រិក ប៉ុន្តែការណ៍ពិតនាងជាជនជាតិខ្មែរសុទ្ធសាធ គឺខ្មែរទាំងឪពុក ទាំងម្ដាយរស់នៅរាជធានីភ្នំពេញ ។ ដោយសារតែនាងមានត្រេមុខដូចកូនកាត់អាហ្វ្រិកកបែបនេះ ហើយទើបនាងពិបាកប្រឡូកក្នុងអាជីពសម្ដែងដែលនាងស្រលាញ់ និងមានទេពកោសល្យខ្ពស់។ ពោលគឺផលិតករជាច្រើនមិនសូវចាប់អារម្មណ៍ទម្រង់មុខរបស់នាងឲ្យថតភាពយន្តទេ ។ សម្រាប់អាជីពបង្ហាញម៉ូដ គឺនាងកំពុងតែត្រូវប៉ាន់ និងលេចធ្លោ ។

នីន ម៉ាលីណែត ថា នាងមិនតូចចិត្តទេបើទោះបីនាងជាជនជាតិខ្មែរ តែមានទម្រង់មុខជាជនជាតិស្បែកខ្មៅ ពោលគឺនាងពេញចិត្តនូវអ្វីដែលខ្លួនមាន ហើយនាងនឹងប្រឹងពង្រឹងអាជីពបង្ហាញម៉ូដបន្ថែមទៀត ។

នីន ម៉ាលីណែត ជាកូនពៅនៅក្នុងគ្រួសារក្នុងចំណោមបងប្អូន៧នាក់ នាងបានបោះជំហានប្រឡូកសិល្បៈតាមរយៈកម្មវិធី«កំពូលតារាបង្ហាញម៉ូដកម្ពុជា»របស់CTN ដែលឆ្លងកាត់ជាច្រើនដំណាក់កាលជម្រុះជាមួយបេក្ខភាពរាប់ពាន់នាក់រហូតឈានដល់វគ្គTOP 5 ។ បច្ចុប្បន្ននាងជាតារាបង្ហាញម៉ូដសនៅក្នុងក្រុម Cambodia nextopmodel ដែលកំពុងលេចធ្លោនៅក្នុងវិស័យបង្ហាញម៉ូដ ៕ (កែសម្រួលដោយ ៖ បុប្ផា)