មកដឹងពីមូលហេតុដែលមហាសេដ្ឋី Jeff Bezos ហាមមិនឲ្យធ្វើបទបង្ហាញពេលប្រជុំ
ក្នុងពេលថ្មីៗនេះ លោកមហាសេដ្ឋី ជេហ្វ បេសូស (Jeff Bezos) ដែលជានាយកប្រតិបត្តិរបស់ក្រុមហ៊ុន Amazon បានហាមមិនឲ្យមានការធ្វើបទបង្ហាញបែប PowerPoint…
ក្នុងពេលថ្មីៗនេះ លោកមហាសេដ្ឋី ជេហ្វ បេសូស (Jeff Bezos) ដែលជានាយកប្រតិបត្តិរបស់ក្រុមហ៊ុន Amazon បានហាមមិនឲ្យមានការធ្វើបទបង្ហាញបែប PowerPoint ក្នុងកំឡុងពេលប្រជុំឡើយ ។ ផ្ទុយមកវិញ អ្នកដែលចូលរួមកិច្ចប្រជុំត្រូវបានតម្រូវឲ្យអានឯកសារទាក់ទិននឹងព័ត៌មានដែលត្រូវលើកឡើងមកពិភាក្សាពេលដែលកិច្ចប្រជុំចាប់ផ្តើម ។
វាស្របទៅនឹងការសិក្សាស្រាវជ្រាវមួយចំនួនដែលរកឃើញថា ការប្រើប្រាស់បទបង្ហាញបែបខាងលើនេះកាត់បន្ថយភាពឆ្លាតវៃនៅក្នុងស្ថាប័នការងារ ។ ហើយការជំនួសវាជាមួយនឹងការអានឯកសារពីកិច្ចប្រជុំជាយុទ្ធសាស្ត្រល្អមួយព្រោះតែមូលហេតុមួយគឺវាជួយសន្សំសំចៃពេលវេលា ។
ការធ្វើបទបង្ហាញបែប PowerPoint ផ្ញើសារសំខាន់ៗក្នុងល្បឿននៃការនិយាយរបស់អ្នកធ្វើបទបង្ហាញ ប៉ុន្តែការអានគឺតាមល្បឿនរបស់អ្នកអាន ដូច្នេះការធ្វើបទបង្ហាញអាចមានរយៈពេល ១ម៉ោង តែមនុស្សអាចអានពត៌មានលើក្រដាសក្នុងរយៈពេល ៥នាទីប៉ុណ្ណោះ ។ ព្រោះឯកសារសង្ខេបតែងតែផ្តល់ពត៌មានសំខាន់នៅដើមកិច្ចប្រជុំ អ្នកដែលចូលរួមតែងតែតាមទាន់គ្នា ហើយពិភាក្សាគ្នាលឿនជាង ។
ក្រៅពីនេះហើយ អ្នកប្រហែលជាដឹងច្បាស់ហើយថាការធ្វើបទបង្ហាញភាគច្រើនមិនមានប្រសិទ្ធិភាពក្នុងការបកស្រាយពីពន្យល់ពីព័ត៌មានដែលសំខាន់ៗឡើយ ព្រោះតែកត្តាមួយចំនួន ។ ទីមួយ អ្នកធ្វើបទបង្ហាញប្រហែលជាមិនបានត្រៀមខ្លួនបានត្រឹមត្រូវ ។ ទីពីរ បទបង្ហាញអាចនឹងមានភាពរអាក់រអួលព្រោះតែបញ្ហាបច្ចេកទេស ។ និងទីបី អ្នកធ្វើបទបង្ហាញចូលចិត្តនិយាយវែងឆ្ងាយមុននឹងចូលដល់សាច់រឿង ។ យោងតាមការសិក្សាមួយបានឲ្យដឹងថា អ្នកគ្រប់គ្រងក្នុងស្ថាប័នការងារមួយចំណាយប្រមាណ ៥០% នៃពេលដែលមានលើការប្រជុំ ហើយវាប៉ះពាល់ដល់ប្រសិទ្ធិភាពការងារយ៉ាងខ្លាំង ។
ដូច្នេះយុទ្ធសាស្ត្ររបស់លោក បេសូស ក្នុងការជំនួសការធ្វើបទបង្ហាញដោយការអានឯកសារសង្ខេប អាចជួយបង្កើនប្រសិទ្ធិភាពការងារនិងការគ្រប់គ្រងក្នុងក្រុមហ៊ុនទាំងមូលយ៉ាងតិចក៏ ២៥%ដែរ ។ ដូច្នេះប្រសិនបើអ្នកជាអ្នកគ្រប់គ្រងម្នាក់ក្នុងស្ថាប័នការងារ អ្នកនឹងពិចារណាយុទ្ធសាស្ត្រខាងលើនេះទេ? ៕ កែសម្រួលដោយ ៖ សុឃាក់
ចែករំលែកព័តមាននេះ