ទីបំផុត Lamborghini បានចេញប្រភេទរថយន្ត Hybrid ទៅក្នុងត្រកូលរបស់ខ្លួន ហើយវាមិនបានជួយអ្វីដល់បរិស្ថាននោះទេ បើទោះបីជាវាគឺជារថយន្តប្រើសាំងលាយអគ្គិសនីក៏ដោយ។ នៅពេលយើងនិយាយពីរថយន្ត Hybrid យើងដឹងច្បាស់ណាស់ថា វាគឺផលិតមកដើម្បីកាត់បន្ថយការចំណាយលើសាំង និង ជួយដល់បរិស្ថាន។ តែសម្រាប់រថយន្ត Sian របស់ Lamborghini ប្រើបច្ចេកវិទ្យា Hybrid ដើម្បីបង្កើនកម្លាំងរបស់រថយន្ត និង មិនបានជួយសន្សំប្រេងសាំងឡើយ។
បច្ចេកវិទ្យា Hybrid បានមានប្រជាប្រិយភាពចាប់ តាំងពីត្រូវបានណែនាំជាលើកដំបូងកាលពី ២០ឆ្នាំមុន។ ឥឡូវនេះស្ទើរតែគ្រប់ក្រុមហ៊ុនផលិតរថយន្តទាំងអស់ផ្តល់នូវជម្រើសរថយន្ត Hybrid ហើយភាគច្រើនគឺស៊ីសាំងតិចជាងជម្រើសធម្មតាស្ទើរតែពាក់កណ្តាល។ តែសម្រាប់រថយន្ត Lamborghini Sian គឺប្រើ Hybrid ដើម្បីបង្កើនថាមពល។ វាជារថយន្ត Lamborghini លឿនបំផុតមិនធ្លាប់មាន ដែលមានល្បឿនលឿនជាង ៣៥០គីឡូម៉ែត្រក្នុងមួយម៉ោង ហើយជាន់ពី ០ទៅ១០០គីឡូម៉ែត្រក្នុងមួយម៉ោង ក្នុងរយៈពេលតិចជាង ២,៨ វិនាទី។
ជំនួសឱ្យការប្រើប្រាស់អាគុយ Hybrid ទូទៅ Lamborghini បានជ្រើសរើសយកអាគុយប្រភេទ Supercapacitor ដែលមានទម្ងន់ស្រាល មិនឆាបឆេះ និង សាកថ្មឆាប់ពេញ។ អ្វីដែលជាចំណុចអន់នៃអាគុយនេះ គឺវាអាចផ្ទុកអគ្គិសនីបានតែរយៈពេលខ្លី។ គេអាចប្រើវាសុទ្ធ តែពេលចូលចតតែប៉ុណ្ណោះ។ ក្រៅពីនេះ វាប្រើសម្រាប់បន្ថែមថាមពលឱ្យម៉ាស៊ីនកាន់តែខ្លាំង និង ស្ទុះកាន់តែលឿន។ វាសាកថ្មនៅពេលដែលរថយន្តបន្ថយល្បឿន និង ពេលចាប់ហ្វ្រាំង។
វាអាចមានជំហានវិជ្ជមានមួយចំនួននៅក្នុងអនាគតក្រុមហ៊ុន។ Lamborghini បានបញ្ជាក់ថា ពួកគេមានគម្រោងប្រើប្រាស់អាគុយ Hybrid ធម្មតា ជំនួសឱ្យអាគុយ Supercapacitors នៅក្នុងរថយន្ត Hybrid បន្ទាប់របស់ពួកគេ ដែលអាចស៊ីសាំងតិចជាងនេះ៕
ប្រភព ៖ businessinsider , កែសម្រួលដោយ ៖ សំណាង
ចែករំលែកព័តមាននេះ