ខេត្តក្រចេះ ៖ ប្រជាសហគមន៍ ក៏ដូចជាពលរដ្ឋរស់នៅតាមបណ្តោយផ្លូវកៅស៊ូពីទីរួមខេត្ត ឆ្ពោះទៅតំបន់
ទេសចរណ៍អន្លង់ផ្សោត និងតំបន់ទេសចរណ៍ទឹកជួរទន្លេមេគង្គកាំពីអំពាវនាវឲ្យអាជ្ញាធរពន្លឿនការជួសជុលនិងស្ថាបនាផ្លូវ ដែលបានពង្រីកចាក់ដីទុកចោលអស់ជាច្រើនឆ្នាំ ដើម្បីសម្រួលការធ្វើដំណើរទៅមករបស់អ្នកភូមិ និងភ្ញៀវទេសចរសម្រាប់ការមកលេងកំសាន្តនៅតាមតំបន់រមណីយដ្ឋានក្នុងរដូវប្រាំងឆ្នាំ
នេះ។
ប្រជាសហគមន៍ទេសចរណ៍ធំៗដ៏ល្បីឈ្មោះទាំង២បានលើកឡើងថា ផ្លូវពិបាកធ្វើដំណើរធ្វើឲ្យប៉ះពាល់ចំនួនភ្ញៀវធ្លាក់ចុះ និងក៏អាចធ្វើឲ្យបាត់ចំណូលជីវភាពប្រចាំថ្ងៃរបស់ពួកគាត់ ដែលមានរបរលក់ដូរតាមតំបន់រមណីយដ្ឋាន។ តំបន់ទេចរណ៍ដ៏ល្បីឈ្មោះធំៗចំនួន២កន្លែង រួមមានតំបន់ទេសចរណ៍អន្លង់ផ្សោតនិង តំបន់ទេសចរណ៍ទឹកជួរទន្លេមេគង្គកាំពី មានជាង១០គីឡូមែត្រពីទីរួមខេត្តក្រចេះ ។
តំបន់ទេសចរណ៍ទាំង២កន្លែង ដែលមានទីតាំងនៅជាប់គ្នានេះ ស្ថិតនៅតាមបណ្តោយដងទន្លេមេគង្គ ដើម្បីទៅដល់ទីនោះ គឺត្រូវធ្វើដំណើរតាមផ្លូវកៅស៊ូតូចចង្អៀតដែលសល់តាំងពីសម័យសង្គមរាស្ត្រនិយម។
ស្ថិតនៅលើចម្ងាយផ្លូវតែជាង១០គីឡូមែត្រប៉ុណ្ណោះ តែការធ្វើដំណើរលើគ្រប់មធ្យោបាយ គឺត្រូវចំណាយរយៈពេលយូរ ដោយសារតែស្ថានភាពផ្លូវកៅស៊ូចាស់ សម្បូរដោយជង្ហុគ តូច-ធំ មានកន្លែងខ្លះបាក់ស្រុតចិញ្ចើមផ្លូវចូលក្នុងទន្លេ និងកន្លែងខ្លះ ត្រូវបានអាជ្ញាធរពង្រីកផ្លូវ ចាក់ដីទុកចោលអស់ជាច្រើនឆ្នាំ ធ្វើឲ្យពិបាកក្នុងការធ្វើដំណើរទៅមក។
ពលរដ្ឋរស់នៅឃុំសំបុកស្រុកចិត្របុរី ជាប់និងតំបនទេសចរណ៍ធំៗទាំង២ខាងលើនិយាយថា ក្រៅពីមាន
ជង្ហុគតូច-ធំរលាក់ពិបាកធ្វើដំណើរ ផ្លូវមួយខ្សែរនេះ ក៏មានសន្ធឹកហុយខ្លាំងដោយសារអាជ្ញាធរចាក់ដីពង្រីកទុកចោលមិនស្ថាបនាបន្តអស់ជាច្រើនឆ្នាំ។ ពលរដ្ឋទាំងនោះ លើកឡើងថា រាល់ភ្ញៀវទេសចរណដែលបានមកលេងកំសាន្តនៅតំបន់ទេសចរណ៍ដ៏ល្បីឈ្មោះទាំង២នេះ គឺតែងតែរអ៊ូររទាំជាមួយនិងការធ្វើដំណើរដោយថា ផ្លូវពិបាកធ្វើដំណើរ។
ពលរដ្ឋ និងប្រជាសហគមន៍បានលើកឡើងស្រដៀងគ្នាថា កន្លងមកពួកគាត់តែងតែអំពាវនាវទៅអាជ្ញាធរគ្រប់ជាន់ថ្នាក់តាមរយៈការធ្វើវេទិការសាធារណៈ ឲ្យអាជ្ញាធរជួយពន្លឿនការ ជួសជុលផ្លូវដែលទុកចោលពាក់កណ្តាលការ ដើម្បីបង្កលក្ខណះងាយស្រួលដល់ការធ្វើ ដំណើរបស់ពួកគាត់ក៏ដូចជាភ្ញៀវទេសចរតែអាជ្ញាធរបានតែត្រឹមទទួលយកសំណើមិនឃើញចុះមកអនុវត្តជួលជុលនោះទេ។
ជុំវិញការលើកឡើងរបស់ពលរដ្ឋនិងសហគមទេសចរណ៍ខាងលើនេះ លោក សាំង ប៊ុនថេន ប្រធានមន្ទីរសាធារណៈការខេត្តក្រចេះ បានប្រាប់ឲ្យដឹងនៅថ្ងៃទី៣០ តុលា នេះថា ក្រុមការងាររបស់ជំនាញសាធារណៈការ បានសហការជាមួយនិងម្ចាស់ជំនួយក្រៅប្រទេស បានចុះពិនិត្យសិក្សាវាយតម្លៃពីផលប៉ះពាល់។ តែសម្រាប់នីតិវិធីការដេញថ្លៃឲ្យធ្វើផ្លូវមិនទាន់ បានកំណត់ការបរិច្ឆេទឲ្យច្បាស់លាស់នៅឡើយទេ។
លោកប្រធានមន្ទីរអះអាងងប្រាប់ថា កំណាត់ផ្លូវកៅស៊ូពីទីរួមខេត្តទៅស្រុកសំបូរនេះ អាជ្ញាធរបានលើកផែនការលើគំរោងស្ថាបនាឲ្យបានរួចរាល់នាពេលឆាប់ៗខាងមុខេះ ។
ចែករំលែកព័តមាននេះ