រាជធានីភ្នំពេញ ៖ ការប្រើប្រាស់ប្រាក់កម្ចីពីធនាគារ ដើម្បីយកទៅប្រកបអាជីវកម្មឱ្យរីកចម្រើន គឺជាបំណងប្រាថ្នាធំបំផុតរបស់អតិថិជនគ្រប់រូបសម្រាប់រកប្រាក់ចំណូលនៅក្នុងអាជីវកម្មនីមួយៗ ជាពិសេសសម្រាប់ពង្រីកជំនួញរបស់ខ្លួន ។ ប៉ុន្តែត្រូវចាំថា ដើម្បីឱ្យមុខជំនួញរបស់ខ្លួនរីកចម្រើនទៅបានតាមរយៈការប្រើប្រាស់ប្រាក់កម្ចីពីធនាគារនោះ គឺអ្នកខ្ចីត្រូវតែមានគោលដៅយ៉ាងច្បាស់លាស់ ដើម្បីប្រើប្រាស់ប្រាក់កម្ចីមានប្រសិទ្ធភាពខ្ពស់ ។
ជាមួយគ្នានេះ លោក ឡឹង រិទិ្ធយ៉ា នាយកសាខាផ្សារដើមថ្កូវ ធនាគារ អេស៊ីលីដា ភីអិលស៊ី បានចែករំលែកនូវគន្លឹះសំខាន់ៗដែលអ្នកជំនួញជោគជ័យប្រើប្រាស់ប្រាក់កម្ចី ដើម្បីមុខជំនួញរីកចម្រើន ។ លោកបានឱ្យដឹងថា តាមបទពិសោធន៍ដែលបានធ្វើជាមួយអតិថិជនកន្លងមក មានគន្លឹះសំខាន់ៗជាច្រើន ហើយគន្លឹះដែលយើងផ្តោតចំបងជាងគេពាក់ព័ន្ធទៅនឹងអតិថិជន ព្រោះនៅពេលដែលលោកសម្រេចចិត្តក្នុងការខ្ចីប្រាក់យកទៅពង្រីកអាជីវកម្ម គឺ ៖
ទី១- លោកត្រូវមានគោលដៅច្បាស់លាស់ មិនមែនប្រើប្រាស់ប្រាក់កម្ចីដើម្បីតែភាពហឺហា ឬទិញតែរបស់របរណាដែលមិនសំខាន់ក្នុងការបង្កើនមុខរបរអាជីវកម្មនោះទេ ដូច្នេះជាទៅទៅអតិថិជនត្រូវមានគោលដៅច្បាស់លាស់ក្នុងការប្រើប្រាស់ប្រាក់កម្ចី ។
ទី២- ត្រូវប្រាកដថាការដែលប្រើប្រាស់ប្រាក់កម្ចីគឺដើម្បីបានប្រាក់ចំណូល បានន័យថាយកប្រាក់កម្ចីទៅបង្កើតលុយ ព្រោះតែកាលណាប្រើប្រាស់ខុស បំណុលមាន២ គឺបំណុលអាក្រក់ និងបំណុលល្អ ។
លោកបានឱ្យដឹងទៀតថា ទី៣- អតិថិជនត្រូវសិក្សាឈ្វេងយល់ឱ្យបានច្បាស់លាស់ពីផែនការ អាជីវកម្មរបស់ខ្លួន ដើម្បីឱ្យមានប្រសិទ្ធភាពក្នុងការប្រើប្រាស់ប្រាក់កម្ចី និងទី៤- គឺមានភាពច្បាស់លាស់រវាងអ្នកខ្ចី ហើយនឹងអ្នកឱ្យខ្ចី ដូច្នេះត្រូវផ្តល់ព័ត៌មានឱ្យគ្នាទៅវិញទៅមក ដើម្បីសិក្សាអំពីចំនួនទឹកប្រាក់ លំហូរសាច់ប្រាក់ ឬមួយក៏លទ្ធភាពសងរបស់អិតិថិជនឱ្យបានត្រឹមត្រូវមុននឹងធ្វើការសម្រេចចិត្តផ្តល់នៅទំហំទឹកប្រាក់ណាមួយ រយៈពេលណាមួយ ។ ធ្វើដូច្នេះការប្រើប្រាស់ប្រាក់កម្ចីនឹងមានប្រសិទ្ធភាព និងជោគេជ័យសម្រាប់អិតិថិជន ។
លោក ឡឹង រិទិ្ធយ៉ា ក៏បានបញ្ជាក់បន្ថែមលម្អិតអំពីគន្លឹះអ្វីខ្លះដែលអ្នកជំនួញជោគជ័យប្រើប្រាស់ប្រាក់កម្ចី ដើម្បីមុខជំនួញរីកចម្រើន គឺមានពីរភាគីរួមគ្នា ដែលភាគីទី១- គឺជាភាគីអ្នកខ្ចី ដែលជាម្ចាស់អាជីវកម្ម ហើយភាគីទី២- គឺជាភាគីរបស់អ្នកឱ្យខ្ចីដែលជាស្ថាប័នហិរញ្ញវត្ថុ ។ ដូច្នេះជាធម្មតាកត្តាចំបងមុនគេ គឺផ្តោតទៅលើភាគីអ្នកខ្ចីដែលជាម្ចាស់អាជីវកម្ម ដូច្នេះមុននឹងសម្រេចចិត្តក្នុងការខ្ចី ជាទូទៅគាត់តែងតែបានគិតយ៉ាងល្អិតល្អន់ តាំងពីថាតើគាត់យកលុយទៅធ្វើអ្វី នឹងត្រូវសិក្សាអំពីប្រភពចំណូលចំណាយជាដើម ។
គាត់ត្រូវគូសវាសថា តើប្រភេទអាជីវកម្មរបស់គាត់ត្រូវការប្រាក់កម្ចីដែរ ឬអត់? ដូច្នេះជំហានដំបូងគឺអ្នកខ្ចីតែម្តង ហើយបន្ទាប់ពីសិក្សាអំពីតម្រូវការប្រើប្រាស់ប្រាក់កម្ចី ជាទូទៅតែងតែមកប្រឹក្សាយោបល់បន្ថែមទៀតពីស្ថាប័នហិរញ្ញវត្ថុ ជាពិសេសគឺបុគ្គលិកជំនាញរបស់ធនាគារ អេស៊ីលីដា ក្នុងការផ្តល់ប្រាក់កម្ចីជូនដល់អតិថិជនតែម្តង ។
លោកបន្តថា សម្រាប់ធនាគារ អេស៊ីលីដា ដែលជាស្ថាប័នផ្តល់ប្រាក់កម្ចី ដើរតួនាទីពីរ ដែលទី១ យើងផ្តល់ប្រាក់កម្ចី និងទី២ ផ្តល់ប្រឹក្សាផ្តល់យោបល់បន្ថែមទៅលើអ្វីដែលអតិថិជនគិតគូរួចហើយទៅលើ៤ចំណុចធំៗ ដែល៖
ទី១- ពាក់ព័ន្ធទៅនឹងបំណងនៃការខ្ចីរបស់អតិថិជន ថាតើលោកមានបំណងខ្ចីយកទៅធ្វើអ្វី ទៅបង្កើតមុខរបរថ្មី ឬមួយយកទៅពង្រីកមុខរបរ ឬមួយយកទៅទិញរបស់របរប្រើប្រាស់ផ្ទាល់ខ្លួន ឬក៏បង្វិលក្នុងរយៈពេលខ្លីណាមួយ ។ ដូច្នេះយើងតែងពិភាក្សាគ្នាឱ្យដឹងពីគោលបំណងរបស់អ្នកខ្ចីដើម្បីធ្វើយ៉ាងណារកចំណុចល្អមួយទាំងអស់គ្នា ហើយជាពិសេសស្ថាប័នហិរញ្ញវត្ថុដែលមានអាជ្ញាប័ណ្ណត្រឹមត្រូវ ។ ដូច្នេះបើអតិថិជនជោគជ័យ អ្នកផ្តល់ប្រាក់កម្ចីក៏ជោគជ័យដូចគ្នាដែរ អ៊ីចឹងហើយយើងតែងតែចង់ឱ្យអតិថិជនដែលខ្ចីលុយហ្នឹងជោគជ័យលើអាជីវកម្មដូចគ្នា ។
ទី២- ពិភាក្សាគ្នាសិក្សាអំពីបរិមាណទំហំនៃប្រាក់កម្ចី ដែលយើងអាចដឹងពីរយៈពេល ដោយផ្អែកទៅលើលទ្ធភាពសង លើអាជីវកម្ម និងមុខរបររបស់អតិថិជន ។
ទី៣- គឺយើងពិភាក្សាគ្នាសិក្សាទៅលើពេលវេលានៃការប្រើប្រាស់ប្រាក់កម្ចីដើម្បីឱ្យអតិថិជនយកទៅប្រើប្រាស់បានជោគជ័យនៅក្នុងអាជីវកម្ម ។
ទី៤- គឺយើងគិតគូអំពីហានិភ័យ ដែលអតិថិជនប្រើប្រាស់ប្រាក់កម្ចី ហើយយើងតែងតែរសួថា បើខ្ចីទៅមានជួបបញ្ហា តើត្រូវដោះស្រាយបែបម៉េច? ដែលនេះជាការប្រឹក្សាយោបល់គ្នាទៅវិញទៅមក ។ និយាយជារួមភាគីទាំងពីររួមគ្នាធ្វើយ៉ាងណាដើម្បីឱ្យច្បាស់លាស់ ដើម្បីកាត់បន្ថយហានិភ័យ ។
ចុងបញ្ចប់លោកក៏បានបញ្ជាក់ឱ្យដឹងផងដែរថា សម្រាប់ធានាគារ អេស៊ីលីដា សាខាផ្សារដើមថ្កូវ គិតត្រឹមដំណាច់ខែកញ្ញា ឆ្នាំ២០១៩នេះ សមតុល្យឥណទាន មានចំនួន ៤៣ លានដុល្លារអាមេរិក គុណភាពឥណទាន ០,៦២% សមតុល្យបញ្ញើ-សន្សំ មានចំនួន ៥០ លានដុល្លារ និងសេវាអេឡិចត្រូនិកផ្សេងៗទៀតដែលរួមចំណែកនៅក្នុងប្រាក់ចំណេញរបស់ធនាគារ អេស៊ីលីដា ៕ (កែសម្រួលដោយ ៖ បុប្ផា)
ចែករំលែកព័តមាននេះ