ខេត្តព្រៃវែង ៖ សេចក្តីរាការណ៍បឋមបានឲ្យដឹងថា នៅល្ងាចថ្ងៃទី២៩ តុលា ម្សិលមិញនេះលោក វ៉ា ធីម អភិបាលរងស្រុកពាមរក៌បានដឹកនាំកម្លាំងសមត្ថកិច្ចស្រុកចុះទៅហាមឃាត់សកម្មភាពរបស់លោក ស្រី…
ខេត្តព្រៃវែង ៖ សេចក្តីរាការណ៍បឋមបានឲ្យដឹងថា នៅល្ងាចថ្ងៃទី២៩ តុលា ម្សិលមិញនេះលោក វ៉ា ធីម អភិបាលរងស្រុកពាមរក៌បានដឹកនាំកម្លាំងសមត្ថកិច្ចស្រុកចុះទៅហាមឃាត់សកម្មភាពរបស់លោក ស្រី យន្ត សុខា ដែលជាអាជីវករម្នាក់រកស៊ីលក់បាយនៅក្នុងបេនចំណតរថយន្តផ្សារអ្នកលឿង ដែលលោកស្រី និងក្រុមគ្រួសារបានធ្វើសកម្មភាពដំឡើងគ្រឿងដែកធ្វើរោងលក់ដូររំលោភមកលើដីបេនចំណតរថយន្តផ្សារអ្នកលឿង ជាហេតុធ្វើឲ្យអ្នកស្រុកក្នុងទីប្រជុំជនអ្នកលឿងនាំគ្នារិះគន់យ៉ាងខ្លាំងមកលើអាជ្ញាធរ ដែលគ្មានចំណាត់ការ ។
លោកស្រី យន្ត សុខា ដែលកំពុងធ្វើសកម្មភាពសាងសង់រោងលក់ដូរខាងលើបានឲ្យដឹងថា ដីទីតាំងនេះ គឺរូបគាត់ និងក្រុមគ្រួសារបានមករស់នៅតាំងពីឆ្នាំ១៩៨៤មកម្លេះ ដែលកាលណោះដីនេះ គឺជាដីជ័យភ័ណ្ឌ គឺពុំទាន់មានបេនចំណតផ្សារអ្នកលឿងទេ ហើយគាត់បានរស់នៅ និងលក់ដូរលើដីនេះរហូតដល់សព្វថ្ងៃ គឺជិត៣០ឆ្នាំហើយ ដូច្នេះដីនេះ គឺជាដីរបស់គាត់ ។
ចំណែកលោក វ៉ា ធីម អភិបាលរងស្រុកពាមរក៌ ដែលដឹកនាំកម្លាំងចុះទៅហាមឃាត់នោះ បានឲ្យដឹងថា ទីតាំងដីនេះ គឺជាដីបេនចំណតរថយន្តផ្សារអ្នកលឿង ហើយអាជ្ញាធរបានធ្វើការហាមឃាត់ជាច្រើនលើកច្រើនសារមកហើយ ប៉ុន្តែលោកស្រី យន្ត សុខា មិនស្តាប់ការណែនាំរបស់អាជ្ញាធរទេ ហើយចុងក្រោយកាលពីថ្ងៃទី៦ មិថុនា ២០១៨ អាជ្ញាធរស្រុករួមជាមួយកម្លាំងសមត្ថកិច្ចស្រុក ក្រោមការដឹកនាំដោយផ្ទាល់ពីលោកឈឿន សុផុន ព្រះរាជអាជ្ញារងអមសាលាដំបូងខេត្តព្រៃវែងបានចុះមកធ្វើការហាមឃាត់ និងបានបោះបង្គោលពទ្ធ័សំណាញ់កំណត់ព្រំដីបេនចំណតរថយន្តត្រឹមជញ្ជាំងរោងលក់បាយរបស់អ្នកស្រី យន្ត សុខា និងហាមមិនឲ្យអ្នកស្រីរំកិលព្រំ ឬរំលោភចូលដីបេនចំណតរថយន្តទៀតទេ ។ ប៉ុន្តែក្រោយពីនោះប៉ុន្មានថ្ងៃលោកស្រី និងក្រុមគ្រួសារក៏នាំគ្នាធ្វើសកម្មភាពវាយកម្ទេចរបង និងរើសំណាញ់លួសចេញដោយធ្វើសកម្មភាពនៅពេលយប់ ហើយចុងក្រោយថ្មីៗនេះបានហៅជាងមកផ្សារដែកក្នុងបំណងធ្វើរោងរំលោភមកលើដីបេនចំណតរថយន្តទៀតទើបអាជ្ញាធរស្រុកដឹកនាំកម្លាំងចុះមកហាមឃាត់តែម្តង ។
ដោយឡែក ប្រជាពលរដ្ឋដែលរស់នៅជុំវិញបេនចំណតរថយន្តផ្សារអ្នកលឿងនេះបានអះអាងបញ្ជាក់ថា ទីតាំងដីទំនាស់ខាងលើនេះ គឺជាដីបេនចំណតរថយន្តផ្សារអ្នកលឿង គឺបេនសម្រាប់រថយន្តទៅស្រុកមេសាង ចំណែកលោកស្រី យន្ត សុខា បានមកសុំអាជ្ញាធរធ្វើតូបលក់បាយនៅក្នុងដីបេននេះគ្រាន់ដោះស្រាយជីវភាពគ្រួសារប៉ុណ្ណោះ តែមកដល់ឆ្នាំ២០១៨នេះ ស្រាប់តែបែកគំនិតវាទយកដីបេនចំណតនេះតែម្តង ដោយអះអាងថា ដីនេះជាដីជ័យភ័ណ្ឌ ហើយគាត់មករស់នៅកាន់កាប់មុនគេរហូតដល់សព្វថ្ងៃ ដូច្នេះដីនេះ គឺជាដីរបស់គាត់ ប៉ុន្តែហេតុផលនេះប្រជាពលរដ្ឋនៅទីប្រជុំជនអ្នកលឿងទាំងមូល គឺមិនអាចទទួលយកបាននោះទេ បើឲ្យដីនេះទៅគាត់ចុះបេនចំណតរថយន្តយកទៅដាក់កន្លែងណា ?
ដូច្នេះពួកគាត់បានអះអាងថា ពួកគាត់គាំទ្រពេញទំហឹងចំពោះចំណាត់ការរបស់អាជ្ញាធរ ក្នុងការទប់ស្កាត់មិនឲ្យមានជនទាំងឡាយណាដែលធ្វើសកម្មភាពរំលោភយកដីសាធារណៈធ្វើជាកម្មសិទ្ធិផ្ទាល់ខ្លួនបែបនេះ ។
គួរបញ្ជាក់ផងដែរថា ទោះបីជាមានអាជ្ញាធរមកហាមឃាត់យ៉ាងណាងក្តីក៏លោកស្រី យន្ត សុខា និងក្រុមគ្រួសារមិនបានស្តាប់ការហាមឃាត់របស់អាជ្ញាធរឡើយ ហើយថែមទាំងបានយកកាំបិតមកគំរាមកាប់ទៅលើអាជ្ញាធរឃុំដែលចុះមកហាមឃាត់ថែមទៀតផងធ្វើឲ្យអាជ្ញាធរព្រមទាំងសមត្ថកិច្ចមិនអាចធ្វើអ្វីបាន គឺបានត្រឹមតែឈរមើល និងព្យាយាមហាមឃាត់មិនឲ្យលោកស្រី យន្ត សុខា និងក្រុមគ្រួសារបន្តធ្វើសកម្មភាពតទៅទៀតប៉ុណ្ណោះ ៕ កែសម្រួលដោយ ៖ សុឃាក់
ចែករំលែកព័តមាននេះ