រាជធានីភ្នំពេញ ៖ បុរសម្នាក់សង្ស័យប្រញាប់ទៅទទួលសង្សារចេញពីធ្វើការនៅអាកាសយានដ្ឋានអន្តរជាតិភ្នំពេញ ស្រាប់តែជួបគ្រោះអកុសលតាមផ្លូវរហូតដល់ស្លាប់បាត់បង់ជីវិត បន្ទាប់ពីជនរងគ្រោះជិះម៉ូតូជ្រុលទៅបុកជាមួយរថយន្តមួយគ្រឿងម៉ាកឡិចស៊ីស RX300 មួយគ្រឿងដែលបត់ឆ្លងផ្លូវ ។
ហេតុការណ៍ដ៏រន្ធត់ខាងលើនេះបង្កឲ្យមានការភ្ញាក់ផ្អើលកើតឡើងកាលពីវេលាម៉ោង១និង២៥នាទីរំលងអធ្រាត្រឈានចូលថ្ងៃទី៣០ ខែតុលា ឆ្នាំ២០១៩ ត្រង់ចំណុចស្តុបខាងមុខក្រុមហ៊ុនតេលា នៅតាមបណ្តោយមហាវិថីសហព័ន្ធរុស្ស៊ីកែងនឹងផ្លូវបេតុងចក្រចូលសាលាសង្កាត់ទឹកថ្លា ស្ថិតក្នុងសង្កាត់ទឹកថ្លា ខណ្ឌសែនសុខ។
ជនរងគ្រោះដែលស្លាប់ឈ្មោះ លៀង លីហេង ភេទប្រុស អាយុ៣៣ឆ្នាំ មុខរបរជាអាជីវករលក់ដូរ ស្នាក់នៅក្នុងបុរីចំការដូង សង្កាត់ដង្កោ ខណ្ឌដង្កោ ជាអ្នកបើកបរម៉ូតូមួយគ្រឿង ម៉ាកស៊ុយហ្ស៊ុយគីស្មាសវី ពណ៌ខ្មៅ ពាក់ស្លាកលេខ ភ្នំពេញ ១AW-៩៩៥៩ ។ ចំណែកភាគីខាងរថយន្តមួយគ្រឿងម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ ២AN-៥៦៥២ បើកបរដោយឈ្មោះ ភឹម អ៊ន ភេទប្រុស អាយុ៤៥ឆ្នាំ ស្នាក់នៅភូមិបុរី១០០ខ្នង សង្កាត់ទឹកថ្លា ខណ្ឌសែនសុខ ត្រូវសមត្ថកិច្ចឃាត់ខ្លួន។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញបុរសម្នាក់បើកររថយន្តមួយគ្រឿងម៉ាកឡិចស៊ីសRX300 ពណ៌ស ធ្វើដំណើរតាមបណ្តោយមហាវិថីសហព័ន្ធរុស្ស៊ី ក្នុងទិសដៅពីលិចទៅកើត។ លុះមកដល់ចំណុចកើតហេតុខាងលើ រថយន្តក៏បានបត់ឆ្វេងឆ្លងផ្លូវក្នុងបំណងឆ្ពោះទៅផ្លូវបេតុងច្រកចូលសាលាសង្កាត់ទឹកថ្លា។
តាមប្រភពព័ត៌មានបានបន្តថា ខណៈពេលរថយន្តបត់បានពាក់កណ្តាលផ្លូវ ស្រាប់តែមានម៉ូតូមួយគ្រឿងបើកបរដោយបុរសរងគ្រោះខាងលើជិះចេញពីផ្ទះនៅឯចំការដូង ក្នុងគោលបំណងធ្វើដំណើរទៅទទួលសង្សារដែលចេញពីធ្វើការនៅអាកាសយានដ្ឋានអន្តរជាតិភ្នំពេញ ដោយធ្វើដំណើរតាមបណ្តោយមហាវិថីសហព័ន្ធរុស្ស៊ី ក្នុងទិសដៅពីកើតទៅលិច និងក្នុងល្បឿនលឿន ហើយបានបើកឆ្លងស្តុបដោយបំពានភ្លើងសញ្ញាចរាចរណ៍ រួចក៏ជ្រុលទៅបុកចំពីមុខរថយន្តមួយគ្រឿងខាងលើយ៉ាងពេញទំហឹង បណ្ដាលឲ្យអ្នកបើកបរម៉ូតូខ្ទាតចេញពីម៉ូតូដួលបោកក្បាលស្លាប់ភ្លាមៗនៅនឹងកន្លែងកើតហេតុ ចំណែកឯម៉ូតូបានរងការខូចខាតយ៉ាងដំណំ រីឯរថយន្តបានរងការក្រពឹតកាងផ្នែកខាងមុខ។
តាមប្រភពព័ត៌មានបានបន្តទៀតថា ភ្លាមៗនោះអ្នកបើកបររថយន្តខាងលើក៏បានព្យាយាមបន្ថែមល្បឿនបើកគេចចេញពីកន្លែងកើតហេតុដែរ តែក៏ត្រូវប្រជាពលរដ្ឋដែលឃើញហេតុការណ៍បានជិះដេញតាម និងស្ទាក់ចាប់ឃាត់ខ្លួនបានតែម្តង។ បន្ទាប់មក គេឃើញនារីជាសង្សារ និងប្អូនប្រុសរបស់ជនរងគ្រោះបានមកដល់កន្លែងកើតហេតុ ដោយស្រែកទ្រហោយំអោបសពបុរសរងគ្រោះគួរសង្វេគ ។
ក្រោយពេលកើតហេតុ ម៉ូតូនិងរថយន្ត រួមទាំងអ្នកបើកបររថយន្តត្រូវបានសមត្ថកិច្ចជំនាញចុះមកធ្វើការវាស់វែង និងនាំយកទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំធ្វើការដោះស្រាយនិងចាត់ការតាមនីតិវិធី ។ ដោយឡែកសពបុរសរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារដឹកយកទៅធ្វើបុណ្យ តាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ