យោគាវចរអាចធ្វើសមាធិតាមបែបជ្រើសរើសយកវត្ថុផ្សេងៗនៅជុំវិញខ្លួនយើងមកធ្វើជានិមិត្តគឺផ្ដោតអារម្មណ៍ទៅរកវត្ថុនោះ យកវត្ថុនោះជាអារម្មណ៍មានដូចជា ផ្កាឈូក ផ្កាផ្សេងៗ អណ្ដាតភ្លើងទៀន ឬពណ៌ផ្សេងៗជាដើម ។
បន្ទាប់មកយើងក៏ចាប់ផ្ដើមចម្រើនសមាធិប្រមូលផ្ដុំអារម្មណ៍បើកភ្នែកសម្លឹងមើលទៅវត្ថុដែលយើងបានកំណត់នោះ ដោយព្យាយាមធ្វើចិត្តឲ្យជ្រះថ្លា រីករាយ បំភ្លេចទុក្ខកង្វល់ និងរឿងរ៉ាវអវិជ្ជមានទាំងឡាយ ហើយក៏ចាប់ផ្ដើមគ្រប់គ្រងអារម្មណ៍សមាធិ កុំឲ្យបែកចេញពីវត្ថុដែលយើងសម្លឹងនោះ ។
បើអារម្មណ៍របស់យើងបែកទៅគិតអំពីបញ្ហាផ្សេងទៀត យើងត្រូវព្យាយាមទាញអារម្មណ៍របស់យើងមកកាន់វត្ថុដែលយើងកំពុងផ្ដោតនោះវិញដោយសន្សឹមៗ តាមរយៈការដកដង្ហើមចេញនិងចូលមួយដងយ៉ាងវែង ជាការរំលឹកចិត្តឲ្យងាកមករកវត្ថុដែលយើងកំពុងផ្ដោតអារម្មណ៍ទៅរកនោះ ។
ការធ្វើសមាធិបែបនេះត្រូវធ្វើនៅទីកន្លែងស្ងៀមស្ងាត់គ្មានការរំខាន។ យើងអាចប្រើប្រាស់ពេលវេលាវែងឬខ្លីក្នុងការធ្វើសមាធិតាមតែយើងអាចធ្វើបាន ។ (ដោយសាន សារិន)
ចែករំលែកព័តមាននេះ