កម្ពុជារំពឹងកីឡារាំមួយប្រភេទទៀតមានមុខក្នុងព្រឹត្តិការណ៍ស៊ីហ្គេមឆ្នាំនេះ

ថ្ងៃទី ៣០ ខែ តុលា ឆ្នាំ ២០១៩
ម៉ោង ០៧:២០
ផាត់ តារារដ្ឋ

រាជធានីភ្នំពេញ ៖ មិនត្រឹមតែត្រៀមខ្លួនពង្រឹងកីឡាករនៅក្នុងវិស័យកីឡា ដែលកម្ពុជាធ្លាប់បានបង្ហាញភាពភ្ញាក់ផ្អើលនាពេលកន្លងមក ដើម្បីដណ្ដើមយកមេដាយជាថ្មីឲ្យខាងតែបានប៉ុណ្ណោះទេ ប៉ុន្តែកីឡារាំមួយថ្មីទៀតក៏ត្រូវបានកម្ពុជារំពឹងថានឹងមានឱកាសដណ្ដើមបានមេដាយ សម្រាប់ព្រឹត្តិការណ៍ស៊ីហ្គេមនាពេលខាងមុខផងដែរ ។

ការរំពឹងនេះ គឺបន្ទាប់ពីវិញ្ញាសា កីឡានេះ ទទួលបានមេដាយមាស១ និងប្រាក់២ពីការប្រកួតWDSF Taipei Open 2019 នៅ ក្រុងតៃប៉ិ កោះតៃវ៉ាន់ ដែលជាការប្រកួតរាំមានប្រទេសជាច្រើនចូលរួម ។

អ្នកស្រី ហង់ ស៊ីមន អគ្គលេខាធិការសហ ព័ន្ធកីឡារាំ បានបង្ហាញការជឿជាក់ក្រោយពី កីឡាកររាំកម្ពុជាឈ្នះមេដាយអន្តរជាតិថា ព្រឹត្តិការណ៍ស៊ីហ្គេមលើកទី៣០នៅហ្វ៊ីលីពីន សហព័ន្ធមានការរំពឹងថាកីឡារាំនឹងមានឱកាសឈ្នះមេ ដាយមិនខុសពីការប្រកួតនៅកោះតៃវ៉ាន់ឡើយ ។

អ្នកស្រីនិយាយថា គ្រូបង្វឹកនិងកីឡាករកីឡា ការិនី បានទទួលបទពិសោធន៍ពីការប្រកួតអន្តរ ជាតិធំៗកន្លងមក ហើយស្របពេលទើបបានឈ្នះមេដាយផង អ្នកស្រីជឿជាក់ថា កីឡាករកម្ពុជា
នឹងបង្កើតបាននូវសមិទ្ធផលជាប្រវត្តិសាស្ត្រថ្មី មួយសម្រាប់ជាតិរបស់ខ្លួននៅក្នុងស៊ីហ្គេមឆ្នាំ ២០១៩នេះ ។

អ្នកស្រីបន្តថា សហព័ន្ធគ្រោងបញ្ជូនកីឡាករ កីឡាការិនីឲ្យចូលរួមសុទ្ធសឹងមានសមត្ថភាព ខ្ពស់ និងជាម្ចាស់មេដាយមាស និងប្រាក់កម្រិត អាស៊ីដែលទើបដណ្តើមបានកាលពីពេលថ្មីៗ នេះ ។ សម្រាប់ការចូលរួមព្រឹត្តិការណ៍កីឡាស៊ីហ្គេមជាលើកដំបូង សហព័ន្ធកីឡារាំកម្ពុជានឹងបញ្ជូន
កីឡាករកីឡាការិនីចំនួន៤រូបឲ្យចូលរួមដែល មានកីឡាករខ្មែរកាត់អ៊ុយក្រែន ច័ន្ទ វិទ័រ, សេង សុគីម, កីឡាការិនីខ្មែរកាត់អ៊ុយក្រែន ព្រាប ដានីអែលឡា និងកីឡាការិនី ម៉ូវ ដានីតា ។ កីឡាករកីឡាការិនីទាំងនោះ នឹងប្រកួតលើ៦វិញ្ញាសាដូចជា Samba, Cha Chacha, Ruba, Paso Doble, Jive និង S,C,R,P,J ។

អ្នកស្រី ហង់ ស៊ីមន អះអាងថា ក្រុម កីឡាករកីឡាការិនីរាំកម្ពុជា កំពុងបង្កើនការហ្វឹកហាត់ពង្រឹងសមត្ថភាពយ៉ាងសកម្មនៅទីស្នាក់ការរបស់ខ្លួន ក្នុងអគារគណៈកម្មាធិការជាតិអូឡាំពិកកម្ពុជា ដើម្បីត្រៀមប្រជែងដណ្តើមមេដាយក្នុងព្រឹត្តិការណ៍កីឡាដ៏ធំប្រចាំតំបន់អាស៊ានមួយនេះ ។

គួរបញ្ជាក់ថា កីឡាករកីឡាការិនីកូនកាត់ខ្មែរអ៊ុយក្រែនទាំងពីររូបគឺ ច័ន្ទ វិទ័រ និង ព្រាប ដានីអែលឡា ជាអ្នកដណ្តើមបានមេដាយមាស១ និងប្រាក់២ ពីព្រឹត្តិការណ៍ WDSF Taipei Open 2019 បើកប្រវត្តិសាស្ត្រកីឡារាំឈ្នះមេដាយសម្រាប់កម្ពុជា ។

មេដាយមាសដណ្តើមបានក្នុងការប្រកួត ADSF Asain Adult Open Latin Dance 2019 និងមេដាយប្រាក់ដណ្តើមបានក្នុងការប្រកួត ADSF Single Dance Cha Cha Cha និង Paso Doble ។ ក្រោយពីឈ្នះមេដាយ កីឡាករកីឡាការិនី និងប្រតិភូកម្ពុជា បានត្រឡប់ពីក្រុងតៃប៉ិ កោះតៃវ៉ាន់ កាលពីថ្ងៃទី២២ ខែសតុលា ឆ្នាំ២០១៩ កន្លងទៅ ។

ជាមួយនឹងការអះអាងនេះ ក្រសួងអប់រំយុវជន និងកីឡា ក៏បានបញ្ជាក់ថា នឹងបញ្ជូនប្រភេទកីឡារាំជាវិញ្ញាសាមួយក្នុងចំណោម៣០វិញ្ញាសាឲ្យចូលរួមប្រកួតក្នុងព្រឹត្តិការណ៍កីឡាស៊ីហ្គេមនៅប្រទេសហ្វ៊ីលីពីននាឆ្នាំនេះដែរ ដែលការប្រកួតនឹងប្រព្រឹត្តទៅពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ ។

កម្ពុជារំពឹងថា ស៊ីហ្គេមឆ្នាំនេះ ខ្លួនក៏ទទួលបានលទ្ធផលល្អជាងមុនផងដែរ បន្ទាប់ពីរំពឹងលើប្រភេទកីឡាករដែលកម្ពុជាទើបមានសក្តានុពលថ្មីៗនេះ ។ ការរំពឹងនេះ គឺបន្ទាប់ពីការប្រកួតស៊ីហ្គេមលើកទី២៩ នៅប្រទេសម៉ាឡេស៊ី កាលពីឆ្នាំ២០១៧កន្លងទៅ មិនមានកីឡារាំផង តែកម្ពុជាដណ្តើមបានមេដាយមាស៣ ប្រាក់២ និងសំរឹទ្ធិ១២ ៕ (កែសម្រួលដោយ ៖ បុប្ផា)