ការពិតជាក់ស្តែងលុយ គឺស្ថិតក្នុងចំណោមកត្តាសំខាន់ៗក្នុងជីវិតរបស់មនុស្សគ្រប់រូប ។ នេះជាមូលហេតុដែលមនុស្សពេញវ័យភាគច្រើនចំណាយមួយផ្នែកធំនៃជីវិតរបស់ពួកគេដើម្បីគិតពីលុយ ហើយពេលខ្លះថែមទាំងធ្លាក់ខ្លួនឲ្យក្លាយជាមនុស្សវក់វីនឹងការរក សន្សំ និងគ្រប់គ្រងលុយថែមទៀត ។ ប៉ុន្តែលុយគ្រាន់តែជាឧបករណ៍ប៉ុណ្ណោះ ។…
ការពិតជាក់ស្តែងលុយ គឺស្ថិតក្នុងចំណោមកត្តាសំខាន់ៗក្នុងជីវិតរបស់មនុស្សគ្រប់រូប ។ នេះជាមូលហេតុដែលមនុស្សពេញវ័យភាគច្រើនចំណាយមួយផ្នែកធំនៃជីវិតរបស់ពួកគេដើម្បីគិតពីលុយ ហើយពេលខ្លះថែមទាំងធ្លាក់ខ្លួនឲ្យក្លាយជាមនុស្សវក់វីនឹងការរក សន្សំ និងគ្រប់គ្រងលុយថែមទៀត ។ ប៉ុន្តែលុយគ្រាន់តែជាឧបករណ៍ប៉ុណ្ណោះ ។ អ្វីដែលសំខាន់សម្រាប់មនុស្សគឺអ្វីដែលលុយអាចធ្វើដើម្បីអ្នកបានដូចជាជម្រើស គុណភាពនៃជីវិត និងអារម្មណ៍សន្តិសុខជាដើម ។ អ្នកដែលងប់ងល់នឹងការរកលុយពេកអាចនឹងជួបនូវផលប៉ះពាល់មួយចំនួនដូចខាងក្រោមនេះ៖
១. ការសំចៃពេកអាចប៉ះពាល់ដល់សុខភាពរបស់អ្នក៖
យុទ្ធសាស្ត្រងាយមួយក្នុងការមានលុយច្រើនជាងមុនគឺការចាយវាយតិច និងសន្សំឲ្យបានច្រើន ។ ប៉ុន្តែការសំចៃពេកអាចប៉ះពាល់ដល់សុខភាពរបស់អ្នកទៅវិញ ។ សុខភាពគឺជាអ្វីដែលលុយមិនអាចទិញបានជារៀងរហូតទេ ហើយប្រសិនបើអ្នកពិតជាមិនចង់ចាយវាយច្រើននៅថ្ងៃអនាគតពិតមែន អ្នកមិនគួររំលងការចាយវាយក្នុងការពិនិត្យសុខភាពជាប្រចាំឡើយដើម្បីដឹងពីជម្ងឺមុនពេលវាធ្ងន់ធ្ងរ ។
អ្នកដទៃទៀតដែលចង់សន្សំលុយតែងតែមានទម្លាប់សំចៃលើអាហារដែលបង្កឲ្យពួកគេទិញអាហារថោកៗដែលមិនល្អសម្រាប់សុខភាព ។ ប្រាកដណាស់ អាហារទាំងនោះមានតម្លៃថោកតែវានឹងបង្កផលប៉ះពាល់ដល់សុខភាពអ្នកនឹងបង្កឲ្យអ្នកចាយវាយកាន់តែច្រើននៅថ្ងៃមុខទៅវិញ ។
២. ការគិតពីលុយច្រើនពេកបង្កជាស្ត្រេស៖
អ្នកដែលគិតគូរពីលុយច្រើន ជាពិសេសអ្នកដែលជាប់បំណុលភាគច្រើនមិនអាចចូលដំណេកបានស្កប់ស្កល់ឡើយ ។ លើសពីនេះទៅទៀត ពួកគេក៏តែងតែព្រួយបារម្ភជានិច្ចផងដែរដែលធ្វើឲ្យពួកគេងាយនឹងប្រឈមនឹងការស្ត្រេស ។
៣. ធ្វើការច្រើនពេកកាត់បន្ថយអាយុរបស់អ្នក៖
ដើម្បីបង្កើនប្រាក់ចំណូល មនុស្សម្នាក់អាចធ្វើការថែមម៉ោង ឬធ្វើការច្រើនកន្លែងជាដើម ប៉ុន្តែទម្លាប់ទាំងនេះជាអ្វីដែលបង្កើនហានិភ័យរបស់អ្នកក្នុងការមានជម្ងឺបេះដូង ។ យោងទៅតាម Lancet Medical Journal បានឲ្យដឹងថា អ្នកដែលធ្វើការពី ៥៥ ម៉ោង ឬច្រើនជាងនេះក្នុងមួយសប្តាហ៍មានឱកាស ១៣% ច្រើនជាងមនុស្សធម្មតាក្នុងការមានជម្ងឺគាំងបេះដូង និង ៣៣% ច្រើនជាងមនុស្សធម្មតាក្នុងការមានជម្ងឺដាច់សរសៃឈាមខួរក្បាល ។
៤. សំចៃពេកកាត់បន្ថយសុភមង្គលក្នុងជីវិត៖
ពេលដែលអ្នកងប់ងល់នឹងការសន្សំលុយ និងការរកលុយពេក អ្នកមិនអាចមានពេលសម្រាប់រស់នៅដោយសប្បាយចិត្តបានឡើយ ។ ប្រាកដណាស់ ការសន្សំលុយជារឿងល្អ ប៉ុន្តែកុំហាមឃាត់ខ្លួនឯងឲ្យសប្បាយម្តងម្កាល ៕ កែសម្រួលដោយ ៖ សុឃាក់
ចែករំលែកព័តមាននេះ