រាជធានីភ្នំពេញ ៖ ទីបំផុតទណ្ឌិតចំនួន៩០នាក់ (ស្រី១៧នាក់) ត្រូវបានលើកលែង និងបន្ធូរបន្ថយទោសក្នុងពិធីបុណ្យអុំទូកបណ្តែតប្រទីប សំពះព្រះខែ និងអកអំបុកដែលនឹងប្រព្រឹត្តទៅនៅពេលខាងមុខនេះ ប៉ុន្តែលោក កឹម…
រាជធានីភ្នំពេញ ៖ ទីបំផុតទណ្ឌិតចំនួន៩០នាក់ (ស្រី១៧នាក់) ត្រូវបានលើកលែង និងបន្ធូរបន្ថយទោសក្នុងពិធីបុណ្យអុំទូកបណ្តែតប្រទីប សំពះព្រះខែ និងអកអំបុកដែលនឹងប្រព្រឹត្តទៅនៅពេលខាងមុខនេះ ប៉ុន្តែលោក កឹម សុខា អតីតប្រធានគណបក្សសង្គ្រោះជាតិមិនបានលើកលែង ឬបន្ធូរបន្ថយទោសនោះទេ ។ នេះបើតាមអ្នកនាំពាក្យក្រសួងយុត្តិធម៌ ។
លោកគឹម សន្តិភាព អ្នកនាំពាក្យក្រសួងយុត្តិធម៌បានឲ្យដឹងនៅថ្ងៃទី២៩ ខែតុលានេះថា ក្រោយពីកិច្ចប្រជុំគណៈកម្មការជាតិពិនិត្យបញ្ជីស្នើសុំបន្ថូរបន្ថយទោស និងលើកលែងទោសដល់ទណ្ឌិតក្នុងឱកាសពិធីបុណ្យអុំទូក បណ្តែតប្រទីប សំពះព្រះខែ និងអកអំបុក (តាំងតុ) អង្គប្រជុំបានសម្រេចធ្វើសំណើរគោរពជូនប្រមុខរាជរដ្ឋាភិបាល ដើម្បីពិនិត្យ និងសម្រេចទូលថ្វាយព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុតក្នុងការផ្តល់ការអនុគ្រោះទោសដល់ទណ្ឌិតសរុប៩០នាក់ (ស្រី១៧ នាក់)ដែលក្នុងនោះ ៖បន្ថយទោស៦ខែ ចំនួន៥៨នាក់ (ស្រី១៣ នាក់) បន្ថយទោស៩ខែ ចំនួន១៤នាក់ (ស្រីម្នាក់) បន្ថយទោស១២ខែ ចំនួន០៨នាក់ (ស្រីម្នាក់)និងលើកលែងទោសចំនួន១០នាក់ (ស្រី០២នាក់) ។
សូមជម្រាបថា ពិធីបុណ្យអុំទូក បណ្តែតប្រទីប សំពះព្រះខែ និងអកអំបុកដែលប្រព្រឹត្តទៅនាថ្ងៃទី១០-១១ និង១២ ខែវិចិ្ឆកា ឆ្នាំ២០១៩ ខាងមុខនេះលើសំណើរសុំអនុគ្រោះទោសដល់ទណ្ឌិតសរុប៥១២នាក់ (ស្រី៥៨នាក់) ។
លោកកឹម សន្តិភាពបានឲ្យដឹងថា អ្នកដែលត្រូវបានលើកលែង និងបន្ធូរបន្ថយទោសថ្ងៃបុណ្យអ៊ុំទូកនោះមិនមានឈ្មោះ លោកកឹម សុខា នោះទេ ។ លោកបញ្ជាក់ថា ៖«លោកកឹម សុខាអត់មានទេ។ ខ្ញុំសូមជម្រាបថា ការផ្តល់លក្ខខណ្ឌនៃការលើកលែងទោស គឺត្រូវមានលក្ខខណ្ឌចាំបាច់ គឺត្រូវមានសាលាក្រមជាស្ថាពពីស្ថាប័នតុលាការ ។ ដូច្នេះសម្រាប់លោក កឹម សុខា គឺកំពុងស្ថិតក្នុងនីតិវិធីរស់តុលាការនៅឡើយ ។ ស្ថិតក្នុងនីតិវិធីរបស់ក្រៅស៊ើបសួរនៅឡើយ អីញ្ចឹងគាត់មិនទាន់មានសាលក្រមស្ថាពរ ដូច្នេះគាត់ពុំត្រូវបានទទួលការពិនិត្យអនុគ្រោះទេ»។ លោកថា ៖«ទោះបីជាទណ្ឌិតនឹងមកពីគណបក្សនយោបាយណាក៏ដោយ គឺត្រូវតែទទួលទោសទៅតាមច្បាប់ដែលមានធរមាន ។ អីញ្ចឹងតុលាការ និងគណៈកម្មាធិការជាតិក៏មិនដែលពិនិត្យលើបញ្ហានឹងដែរ» ។
ចំណែកទណ្ឌិតជាជនបរទេសគ្រប់ជាតិសាសមានសរុបជាង១ពាន់នាក់ ហើយភាគច្រើនជាបុរស់ដោយចំណោមទណ្ឌិតបុរសមានទណ្ឌិតស្ត្រីជាជនបរទេសមាន៥០ ឬ៦៩នាក់តែប៉ុណ្ណោះ ។
បើតាមលោក អ៊ុច ពង្សបានឲ្យដឹងថា ជនបរទេសដែលជាប់នៅពន្ធនាគារភាគីច្រើនបាន ប្រព្រឹត្តបទល្មើសគ្រឿងញៀន បទល្មើសប្លន់ ។ បទល្មើសឆកបោកតាមអនឡាញ ។ ទណ្ឌិត បរទេសនោះភាគីច្រើនជាជនជាតិចិនខ្លះ និងវៀតណាមខ្លះ ៕ កែសម្រួលដោយ ៖ សុឃាក់
ចែករំលែកព័តមាននេះ