រាជធានីភ្នំពេញ ៖ ក្រសួងធនធានទឹក និងឧតុនិយម បានឲ្យដឹងថា ចាប់ពីថ្ងៃទី១ដល់ថ្ងៃទី៧ ខែវិច្ឆិកា ឆ្នាំ២០១៩ កម្ពុជានឹងរងឥទ្ធិពលខ្យល់ព្យុះឈ្មោះម៉ាត់ម៉ូ(MATMO) ដែលកើតឡើងនៅថ្ងៃទី៣១ ខែតុលា ។
យោងតាមសេចក្តីជូនដំណឹងរបស់ក្រសួងធនធានទឹកនិងឧតុនិយម ចេញផ្សាយនៅថ្ងៃទី២៨ខែតុលា ស្តីពីស្ថានភាពអាកាសធាតុចាប់ពីថ្ងៃទី១ដល់ថ្ងៃទី៧ ខែវិច្ឆិកា ឆ្នាំ២០១៩ បានឲ្យដឹងថា តាមរយៈនៃការតាមដាននូវលក្ខណៈអាកាសធាតុជាប្រចាំក្នុងតំបន់ និងដោយឡែកសម្រាប់កម្ពុជាបង្ហាញឲ្យឃើញថា មានសម្ពាធទាបសកម្មមួយ (Active Low Pressure) កំពុងចូលមកដល់ក្នុងសមុទ្រចិនខាងត្បូង ។
សម្ពាធទាបសកម្មនេះ នឹងវិវត្តខ្លួនជាលំដាប់ទៅជាកូនព្យុះ(Tropical Storm)ទី២២ ដែលអាចមានឈ្មោះម៉ាត់ម៉ូ (MATMO) ចូលដល់ភាគខាងត្បូងវៀតណាម នៅថ្ងៃទី៣១ ខែតុលា ។
សេចក្តីជូនដំណឹងបន្តថា ព្យុះនេះនឹងបន្ថយឥទ្ធិពលទៅជាសម្ពាធទាបសកម្ម (Active Low) រួចចូលមកកម្ពុជាយើងភាគខាងត្បូង នៅថ្ងៃទី១ ខែវិច្ឆិកា ។ ស្ថានភាពបែបនេះនឹងធ្វើឲ្យចាប់ពីថ្ងៃទី១-៧ ខែវិច្ឆិកា តាមបណ្តារាជធានី ខេត្តនានា នឹងមានភ្លៀងធ្លាក់រាយប៉ាយជាបន្តបន្ទាប់ ក្នុងនោះ ៖
១-តំបន់វាលទំនាបកណ្ដាល តំបន់មាត់សមុទ្រនឹងអាចមានភ្លៀងធ្លាក់រាយប៉ាយនៅក្នុងកម្រិតបរិមាណពីបង្គួរទៅច្រើន ។
២-បណ្ដាខេត្តដទៃទៀត នឹងអាចមានភ្លៀងធ្លាក់រាយប៉ាយនៅក្នុងកម្រិតបរិមាណពីមធ្យមទៅបង្គួរ ។
ក្រសួងធនធានទឹកនិងឧតុនិយម ក៏បានអំពាវនាវថា យោងតាមស្ថានភាពធាតុអាកាសដូចបានព្យាករណ៍ខាងលើ សូមសាធារណជនជ្រាបជាព័ត៌មាន និងសូមប្រុងប្រយ័ត្នចំពោះភ្លៀង ផ្គរ រន្ទះ ខ្យល់កន្ត្រាក់ និងរលកសមុទ្រខ្លាំង ៕
ចែករំលែកព័តមាននេះ