រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ម៉ូតូម៉ាកឃ្លិកសេរី២០១៨ មួយគ្រឿងត្រូវបានក្រុមចោរ២នាក់ ធ្វើសកម្មភាកយក រួមជាមួយប្រាក់ជាង៦ពាន់ដុល្លារ នៅក្នុងកែប ខណៈពេលដែលម្ចាស់ឈប់ទិញភេសជ្ជៈដោយទុកសោជាប់ម៉ូតូ ។…
រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ម៉ូតូម៉ាកឃ្លិកសេរី២០១៨ មួយគ្រឿងត្រូវបានក្រុមចោរ២នាក់ ធ្វើសកម្មភាកយក រួមជាមួយប្រាក់ជាង៦ពាន់ដុល្លារ នៅក្នុងកែប ខណៈពេលដែលម្ចាស់ឈប់ទិញភេសជ្ជៈដោយទុកសោជាប់ម៉ូតូ ។ ទោះបីជាយ៉ាងណា ម៉ូតូត្រូវបានសមត្ថកិច្ចរួមទាំងបងប្អូន ម្ចាស់ម៉ូតូនាំតាមរកតាមរយៈជីភីអេសឈានទៅឃាត់ខ្លួនបានជនសង្ស័យម្នាក់ ព្រមទាំងដកហូតបានម៉ូតូត្រឡប់មកវិញ តែប្រាក់ត្រូវបក្សពួកម្នាក់ទៀតយកគេចខ្លួនបាត់ ។
ហេតុការណ៍ឃាត់ខ្លួនជនសង្ស័យបង្កឲ្យមានការភ្ញាក់ផ្អើល កាលពីវេលាម៉ោងប្រមាណ១រសៀល ថ្ងៃទី២៨ ខែតុលានេះ នៅចំណុចផ្លូវបេតុងក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ។
ជនសង្ស័យដែលត្រូវឃាត់ខ្លួនឈ្មោះ ប៊ុត វុទ្ធី ភេទប្រុស អាយុ៣១ឆ្នាំ ជាកម្មកររោងចក្រ ស្នាក់នៅផ្ទះជួលម្តុំណូគា សង្កាត់អូបែកក្អម ខណ្ឌសែនសុខ ។ ចំណែកជនរងគ្រោះជាម្ចាស់ម៉ូតូឈ្មោះ ផល សុជាតា ភេទស្រី អាយុ៣១ឆ្នាំ ជាអាជីវក មានលំនៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ។
តាមព័ត៌មានពីម្ចាស់បានឲ្យដឹងថា នៅវេលាម៉ោងប្រមាណ១២និង៣០នាទីខ្លួនបានជិះម៉ូតូម៉ាកឃ្លិក សេរី២០១៨ ពាក់ស្លាកលេខ ភ្នំពេញ១HD.២១២៤ ពណ៌សមួយគ្រឿងធ្វើដំណើរទៅផ្សារឈូកមាស ក្នុងភូមិវិមានទ្រង់សង្កាត់ក្រាំងធ្នង់ ហើយក៏បានឈប់ម៉ូតូទិញភេសជ្ជៈតាមផ្លូវ ដោយទុកសោជាប់ម៉ូតូ ។
តាមស្ត្រីរូបនោះបានឲ្យដឹងទៀត ខណៈនោះស្រាប់តែជនសង្ស័យម្នាក់បានមកធ្វើសកម្មភាពលួចជិះគេចខ្លួនទៅបាត់ដោយយកទាំងប្រាក់សរុបចំនួន៦៤០០ដុល្លារ ទូរស័ព្ទ២គ្រឿង និងម៉ាស៊ីនវីងមួយគ្រឿង ដែលដាក់ក្នុងកាបូបទុកក្រោមកែបម៉ូតូ ។ ស្ត្រីរូបនោះបានបន្តទៀតថា កាលពីប្រមាណកន្លះខែមុនខ្លួនបានដេកយល់សប្តិភ្លើងឆេះម៉ូតូ ហើយមិននឹកស្មានថា ចោលលួចយកទាំងប្រាក់ដែលដាក់នៅក្រោមកែបម៉ូតូ ។
តាមព័ត៌មានឲ្យដឹងទៀតថា បន្ទាប់ពីបាត់ម៉ូតូម្ចាស់រួមទាំងបងប្អូនបានទៅប្តឹងនគរបាល និងនាំគ្នាដើររកតាមប្រព័ន្ធ GPS រហូតនៅដល់វត្តជុំក្នុងសង្កាត់គោករការ ខណ្ឌព្រែកព្នៅក៏បានប្រទះឃើញជនសង្ស័យម្នាក់ជិះម៉ូតូដែលលួចទៅហើយ ត្រូវបានកម្លាំងនគរបាលប៉ុស្តិ៍ក្រាំងធ្នង់ និង ក្រុមគ្រួសារម្ចាស់ម៉ូតូដេញតាមរហូតមកជិតដល់ប៉ុស្តិ៍ក្រាំងធ្នង់ចាប់បាន បន្ទាប់ពីជនសង្ស័យគ្រោះថ្នាក់ចរាចរណ៍ ។
តាមព័ត៌មានឲ្យដឹងទៀតថា បន្ទាប់ពីឃាត់បានជនសង្ស័យនគរបាលបាននាំជនសង្ស័យទៅរកបក្សពួក និងកាបូបប្រាក់នៅក្នុងភូមិ ព្រៃខ្មែរ សង្កាត់គោករការ តែបក្សពួកដឹងខ្លួនទាន់គេចខ្លួនបាត់រកឃើញតែកាបូប និងម៉ាស៊ីនវីង ចំណែកប្រាក់ត្រូវជននោះយកគេចខ្លួនបាត់ ។ នៅក្នុងការរុករកជនសង្ស័យនគរបាលក៏បានដកហូតម៉ូតូម៉ាកវីនន័រ ពណ៌ខៀវមួយគ្រឿង ពាក់ស្លាកលេខ ភ្នំពេញ1GQ.១១៥៦ដែលជនសង្ស័យជិះធ្វើសកម្មភាពផងដែរ ។
ជនសង្ស័យបានសារភាពថា ខ្លួនមានបក្សពួក២នាក់ ម្នាក់ដែលគេចខ្លួនឈ្មោះ ណន មាសអាយុ៣២ឆ្នាំ ។ នៅមុនពេលកើតហេតុខ្លួនបានជិះម៉ូតូទៅយកឈ្មោះ មាស នៅសង្កាត់គោករការ ហើយនាំគ្នាដើររកស៊ី ហើយក៏បានលួចយកម៉ូតូម៉ាឃ្លិចមួយគ្រឿងយកទៅផ្ទះឈ្មោះមាស ហើយបានផ្តាច់ប្រពន្ធជីភីអេសចោល យកម៉ូតូជិះចេញក៏ប្រទះនឹងនគរបាល និងក្រុមគ្រួសារជនរងគ្រោះដេញតាមចាប់បានតែម្តង ៕ កែសម្រួលដោយ ៖ សុឃាក់
ចែករំលែកព័តមាននេះ