ខេត្តកំពង់ចាម ៖ បុរសជាជាងដែកម្នាក់ខណៈឡើងប្រក់ដំបូលឃ្លាំងរបស់ក្រុមហ៊ុនមួយកន្លែង ស្រាប់តែជាន់ចំសង្ក័សីមិនទាន់បាញ់វីសភ្ជាប់ បណ្តាលឱ្យផុងធ្លាក់ពីលើដំបូលដែលមានកម្ពស់ជិត១០ម៉ែត្ររងរបួសយ៉ាងធ្ងន់ធ្ងរ ហើយត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យដែរ ប៉ុន្តែដោយសាររបួសធ្ងន់ធ្ងរពេក ជនរងគ្រោះក៏បានស្លាប់ ។
ហេតុការណ៍ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី២៧ តុលា ឆ្នាំ២០១៩ នៅចំណុចឃ្លាំងក្នុងរោងចក្រក្រុមហ៊ុន ឡុង ស្រេង ហ័រជៀន ស្ថិតក្នុងភូមិមាឃបី ឃុំព្រែកកក់ ស្រុកស្ទឹងត្រង់ ។
តាមប្រភពពីមន្ត្រីអាវុធហត្ថស្រុកស្ទឹងត្រង់បានឲ្យដឹងថា ជនរងគ្រោះដែលស្លាប់ខាងលើឈ្មោះពេជ្រ ម៉េងសែ ភេទប្រុស អាយុ៣១ឆ្នាំ ជាជាងដែក មានទីលំនៅក្នុងភូមិបឹងដែង ឃុំព្រែកកក់ ស្រុកស្ទឹងត្រង់ ។
លោកវរសេនីយ៍ឯកប៉ាក ជាតិ អធិការនគរបាលស្រុកស្ទឹងត្រង់ បានឱ្យដឹងថា ក្រោយពីមានហេតុការណ៍ខាងលើនេះកើតឡើង កម្លាំងជំនាញរបស់ស្រុកបានចុះទៅដល់កន្លែងកើតហេតុ ដើម្បីធ្វើការត្រួតពិនិត្យបានរកឃើញថា ពេលឡើងប្រក់ដំបូលឃ្លាំង ជនរងគ្រោះបានជាន់ចំស័ង្កសីដែលមិនទាន់បាញ់វីសភ្ជាប់ ទើបបណ្តាលឱ្យផុងធ្លាក់ពីលើដំបូលឃ្លាំងដែលមានកម្ពស់៩,៣០ម៉ែត្ររងរបួសយ៉ាងធ្ងន់ធ្ងរ ហើយត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យខេត្តដែរ ប៉ុន្តែដោយសាររបួសធ្ងន់ធ្ងរពេក ជនរងគ្រោះក៏បានស្លាប់នៅវេលាម៉ោង៦យប់ថ្ងៃដដែល ។
បច្ចុប្បន្ន សពជនរងគ្រោះត្រូវបានក្រុមគ្រួសារសាច់ញាតិដឹកយកមកធ្វើបុណ្យតាមប្រពៃណីផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ