ខេត្តត្បូងឃ្មុំ ៖ នៅលើកំណាត់ផ្លូវជាតិលេខ៧ គេសង្កេតឃើញមានរថយន្តតូចធំដឹកទំនិញ ឬកសិផលបើកឆ្លងកាត់ដើម្បីថ្លឹងរថយន្តនៅស្ថានីយថ្លឹងរថយន្តថ្នល់ទទឹង ស្ថិតនៅក្នុងឃុំជប់ ស្រុកត្បូងឃ្មុំ ដោយក្នុងមួយថ្ងៃៗមានរហូតដល់រាប់រយគ្រឿងឯណោះ។ ទោះបីជាយ៉ាងណា អ្នកប្រកបរបរបើករថយន្តដឹកទំនិញ និងកសិផលក៏បានត្អូញត្អែរពីការចំណាយបង់ថ្លៃថ្លឹងរថយន្តនៅស្ថានីយថ្លឹងរថយន្តនេះផងដែរ ។
បើតាមអ្នកបើកបររថយន្តធុនធំម្នាក់សុំមិនបញ្ចេញឈ្មោះបានប្រាប់ឲ្យដឹងថា គាត់ត្រូវងើបពីងងឹតចេញពីផ្ទះដោយមានកម្មករប្រុសស្រីចំនួន៩នាក់ ដើម្បីទៅដឹកអុសធ្វើអំពីដើមកៅស៊ូនៅចំណុចកំពាន់ ក្នុងស្រុកមេមត់ ដែលមានព្រំប្រទល់ជាប់នឹងប្រទេសវៀតណាម ដើម្បីយកមកលក់នៅតាមសិប្បកម្មឡឥដ្ឋ ដើម្បីបានប្រាក់យកមកដោះស្រាយជីវភាពគ្រួសារ។
អ្នកបើកបររថយន្តធុនធំខាងលើបានប្រាប់បន្តថា កាលពីរសៀលថ្ងៃទី២៦ តុលា ឆ្នាំ២០១៩ កន្លងទៅ រថយន្តរបស់គាត់បានផ្ទុកអុសធ្វើពីដើមកៅស៊ូពេញទ្រុងខាងក្រោយ លុះពេលបើកមកដល់ឃុំជប់ ស្រុកត្បូងឃ្មុំ បានចូលថ្លឹងរថយន្តនៅស្ថានីយថ្លឹងរថយន្តថ្នល់ទទឹង ហើយគាត់ត្រូវចំណាយប្រាក់ចំនួន៧ម៉ឺនរៀលទៅឱ្យក្រុមមន្ត្រីនៅក្នុងស្ថានីយថ្លឹងរថយន្តផងដែរ។
អ្នកបើកបររថយន្តធុនធំខាងលើបានប្រាប់បន្តថា ក្រោយពីថ្លឹងរថយន្ដរួច គាត់បានបន្តដំណើរមកមុខទៀតក្នុងទិសដៅពីកើតមកលិចលុះមកដល់ចំណុចផ្ដុំបន្ទាយទាហានថ្នល់ទទឹងក៏បានឈប់រថយន្តបន្តិច ដើម្បីពិនិត្យមើលកង់រថយន្ត ហើយក៏បានបើកមកដល់សិប្បកម្មឡឥដ្ឋមួយកន្លែង ស្ថិតក្នុងភូមិទួលវិហា ឃុំជីរោទ៍ទី២ ស្រុកត្បូងឃ្មុំ ដើម្បីទម្លាក់អុសឱ្យគេ ទំរាំនឹងរួចរាល់ត្រូវចំណាយពេលរហូតដល់ល្ងាច។
អ្នកបើកបររថយន្តធុនធំខាងលើបានប្រាប់បន្តថា ជាធម្មតាអុសដែលដឹកតាមរថយន្តក្នុងមួយថ្ងៃបានតែមួយជើង ដោយត្រូវទូទាត់ទៅលើការចំណាយដូចជាប្រេង, កម្មករ និងនៅស្ថានីយថ្លឹងរថយន្ត គឺគាត់នៅសល់ប្រាក់ប្រមាណជាង៣០ម៉ឺនរៀល ហើយគាត់មិនដែលចំណេញឲ្យលើសពីនេះនោះទេ។ រថយន្តដឹកអុសពេលដែលចូលមកដល់ស្ថានីយថ្លឹងរថយន្តថ្នល់ទទឹង គឺត្រូវបង់ប្រាក់ទៅឱ្យមន្ត្រីនៅស្ថានីយថ្លឹងរថយន្តតាមប្រភេទរថយន្តតូចឬធំ ។
ទោះបីយ៉ាងណា ពាក់ព័ន្ធនឹងបញ្ហាខាងលើនេះដែរ នារសៀលថ្ងៃទី២៨ តុលា ២០១៩ កោះសន្តិភាពមិនអាចសុំការបំភ្លឺពីលោកគី ដាណារិទ្ធ ប្រធានមន្ទីរសាធារណការនិងដឹកជញ្ជូនខេត្តត្បូងឃ្មុំបាននោះទេ៕ (កែសម្រួលដោយ ៖ ធីតា)
ចែករំលែកព័តមាននេះ