រាជធានីភ្នំពេញ៖ នៅប៉ុន្នានឆ្នាំចុងក្រោយនេះគេសង្កេតឃើញថាការវិនិយោគមួយចំនួននៅក្នុងវិស័យកសិកម្មបានកំពុងលេចឡើងនូវសញ្ញាថ្មីនៅលើទីផ្សារក្នុងស្រុកហើយមានការគាំំទ្រនៅប្រទេសចិននោះគឺផ្លែចេកអំបូងលឿង។ផ្អែកលើការគាំទ្រពីទីផ្សារចិនទៅលើគុណភាពល្អនិងការវេចខ្ចប់មានអនាម័យល្អជាងបណ្តាប្រទេសដើរមុនកម្ពុជាអ្នកជំនាញមើលឃើញថានៅឆ្នាំបន្ទាប់នឹងមានក្រុមហ៊ុនវិនិយោគលើដំណាំចេកនេះនឹងកើនឡើងថែមទៀត ខណៈការនាំចេញរយៈពេល២ឆ្នាំចុងក្រោយនេះ ។
ប្រធានក្រុមប្រឹក្សាសហព័ន្ធស្រូវអង្ករកម្ពុជាហើយក៏ជាម្ចាស់ក្រុមហ៊ុនដាំចេកអំបូងលឿងសម្រាប់នាំចេញទៅទីផ្សារប្រទេសចិនក្នុងចំណោមក្រុមហ៊ុនផ្សេងទៀតបានឱ្យដឹងថា ដំណាំចេក កម្ពុជាទើបមានដាំរយៈពេល២ឆ្នាំចុងក្រោយនេះតែកម្ពុជាអាចនាំចេញបានជាង១១ម៉ឺនតោនហើយទទួលបានការឆ្លើយតបពីចិនថាចេកអំបូងលឿងកម្ពុជាមានគុណភាពខ្ពស់គ្មានជាតិគីមីហយការវេចខ្ចប់មានសោភ័ណភាពល្អជាងប្រទេសខ្លះបានធ្វើការយូរឆ្នាំហើយ។
លោក ឧកញ៉ា ហ៊ុនឡាក់ ប្រធានក្រុមប្រឹក្សាសហព័ន្ធស្រូវអង្ករកម្ពុជាមានប្រសាសន៍ថា«កម្ពុជាទើបនាំចេញចេកចេញកាលពីខែមេសាឆ្នាំ២០១៩ជាផ្លូវការឆ្ពោះទៅកាន់ទីផ្សាចិន។តែទន្ទឹមនឹងនេះ ប្រទេសចិនគេពេញចិត្តដំណាំចេញជាពិសេសផ្លែចេកស្រស់ដែលនាំចេញពីកម្ពុជា ។គេឆ្លើយតបមកវិញថាផ្លែចេកកម្ពុជាមានគុណភាពខ្ពស់និងមិនមានជាតិគីមីហើយម្យ៉ាងទៀតពាក់ព័ន្ធសោភណ័ភាពការវេចខ្ចប់គេ(ចិន)វាយតម្លៃខ្ពស់ថាកម្ពុជាទើបតែធ្វើតែធ្វើបានល្អជាប្រទេសខ្លះបានធ្វើយូរឆ្នាំហើយ។ជារួមមកយើងកំពុងធ្វើដំណើរលើផ្លូវមួយដែលទីផ្សារគេចង់បាន»។
បើតាមប្រធានក្រុមប្រឹក្សាសហព័ន្ធស្រូវអង្ករកម្ពុជា តាមទិន្នន័យរបស់ក្រសួងបាននាំចេញផ្លែចេកស្រស់បានជាង១១ម៉ឺនតោននៅក្នុងរយៈពេល៩ខែឆ្នាំ២០១៩កន្លងទៅនេះ ហើយការវិនិយោគនៅគ្រាបន្ទាប់នឹងមានក្រុមហ៊ុនដាំសម្រាប់នាំចេញកើនឡើងថែមទៀត។ លោកឧកញ៉ា បានសង្កត់ធ្ងន់ថា« ការដាំចេញអំបូងលឿងពីមួយឆ្នាំទៅមួយឆ្នាំខ្ញុំថាវានឹងកើនឡើងដោយសារការបើកច្រកទីផ្សារអនុញ្ញាតឱ្យនាំចូលទៅប្រទេសចិន កាលដំបូងមានតែ៥ក្រុមហ៊ុនទេតែមកពេលនេះគេទទួល៤ក្រុមហ៊ុនផ្សេងទៀត បានន័យថានៅឆ្នាំនេះនឹងមាន៩ក្រុមហ៊ុន ហើយនៅឆ្នាំបន្ទាប់ទៀតខ្ញុំថានឹងមានក្រុមហ៊ុនកើនឡើងថែមទៀត ព្រោះនៅប្រទេសខ្លះ អាកាសធាតុមិនអំណោយផលក្នុងការដាំដំណាំចេញអំបូងលឿង។តម្រូវការនៅទីផ្សារចិនវានៅតែមាន អីចឹងវាទាមទារដូចនៅកម្ពុជាមានអាកាសធាតុក្តៅសើមវានឹងអាចឆ្លើយតបសម្រាប់ដំណាំចេក។អីចឹងខ្ញុំថាចំពោះការវិនិយោគលើដំណាំចេកសម្រាប់នាំចេញវានឹងកើនឡើងនៅឆ្នាំបន្តបន្ទាប់ទៀត»។
តាមលោកឧកញ៉ ហ៊ុនឡាក់ តម្លៃចេកអំបូងលឿងគិតជាមធ្យមមួយតោនថ្លៃប្រមាណ៦០០ដុល្លារអាមេរិក ហើយនៅក្នុងបរិមាណនាំចេញសរុបជាង១១ម៉ឺនតោនកន្លងទៅនេះក្នុងនោះក្រុមហ៊ុនលោកនាំចេញមានប្រហែល១០ភាគរយ ហើយនៅឆ្នាំក្រោយអាចនឹងកើនឡើងបន្ថែមទៀតដោយសារផ្ទៃដាំដុះកំពុងធ្វើការពង្រីកជាបន្តបន្ទាប់។
សូមបញ្ជាក់ថាអគ្គនាយកដ្ឋានកសិកម្ម នៃក្រសួងកសិកម្មរុក្ខាប្រមាញ់និងនេសាទ ថ្មីៗនេះក៏បានអោយដឹងថា វិនិយោគិនចិននៃទីក្រុងប៉េកាំង បានចាប់អារម្មណ៍ និងគ្រោងដាក់ទុនប្រមាណ ៣០លានដុល្លារអាមេរិក ដើម្បីវិនិយោគដាំដុះដំណាំចេកអំបូងលឿង លើផ្ទៃដី ប្រមាណ ១.៥០០ហិចតា ។
តាមលោក Li Zhijun អគ្គនាយកនៃមន្ទីរកសិកម្ម និងកិច្ចការជនបទក្រុងប៉េកាំងនៃប្រទេសចិនលើកឡើងថា កម្ពុជានឹងចិនមានទំនាក់ទំនងជាមួយគ្នាយូរមកហើយ ។ពេលនេះ គួរតែដល់ពេលដែលភាគីទាំងពីរ ត្រូវការពង្រីកនូវវិស័យកសិកម្មបន្ថែមទៀត ដោយសារតែតម្រូវការផលិតផលកសិកម្មពីកម្ពុជា នៅក្នុងប្រទេសចិនកំពុងមានទីផ្សារខ្ពស់តួយ៉ាងចេកអំបូងលឿង កំពុងមានតម្រូវការខ្លាំងនៅក្នុងប្រទេសចិន ។ លោកបានលើកឡើងថា «ដើម្បីឱ្យផ្គត់ផ្គង់ចេកពីកម្ពុជា នៅក្នុងប្រទេសចិន ជាពិសេសនៅទីក្រុងប៉េកាំង កាន់តែមានប្រសិទ្ធភាព និងគុណភាពផងដែរនោះ ក្រុមហ៊ុន Beijing Capital Agribusiness Group មានទីស្នាក់ការធំនៅទីក្រុងប៉េកាំងកំពុងធ្វើការសិក្សា រៀបចំផែនការវិនិយោគតម្លៃជាង ៣០លានដុល្លារអាមេរិកដើម្បីធ្វើការដាំដុះដំណាំចេកអំបូងលឿងនៅកម្ពុជា លើផ្ទៃដីជាង១ .៥០០ហិកតានាពេលអនាគត »៕ កែសម្រួលដោយ ៖ សុឃាក់
ចែករំលែកព័តមាននេះ