រាជធានីភ្នំពេញ ៖ បុរសម្នាក់ដែលលួចទៅបង្កាត់ភ្លើងស្នេហ៍ជាមួយស្រីថ្មី បានត្រូវប្រពន្ធតាមទាន់ហើយចាក់សោទ្វារបន្ទប់ជួលពីខាងក្រៅ រួចទើបឆោឡោបង្កឲ្យមានការភ្ញាក់ផ្អើលអ្នកជិតខាង និងប្តឹងសមត្ថកិច្ច កាលពីវេលាម៉ោងប្រមាណ៧យប់ថ្ងៃទី២៤ ខែតុលា នៅភូមិចោមចៅ សង្កាត់ចោមចៅទី២ ខណ្ឌពោធិ៍សែនជ័យ ។
ស្ត្រីជាប្រពន្ធឈ្មោះ ហ៊ិន ដាលីន អាយុ២៧ ឆ្នាំ ជាកម្មការិនីរោងច្រក ស្នាក់នៅម្តុំផ្សារឯករាជ្យ៣ សង្កាត់ស្ទឹងមានជ័យ ខណ្ឌមានជ័យ ។ ចំណែកប្តីដែលលួចលាក់មានស្រីថ្មីឈ្មោះ គា ធារិទ្ធ អាយុ៣១ឆ្នាំ ដោយឡែកស្រីថ្មីរបស់ប្តីជាកម្មការិនីកាត់ដេរដែរ ។ ពួកគេទាំង៣នាក់ មានស្រុកកំណើតនៅខេត្តកំពង់ធំ ដូចគ្នា ។
ប្រភពព័ត៌មានពីស្ត្រីជាប្រពន្ធឲ្យដឹងថា រូបនាងនិងប្តីបានរៀបអាពាហ៍ពិពាហ៍អស់រយៈពេល៧ឆ្នាំមកហើយ និងមានកូនស្រី២នាក់ ដែលកូនបងបច្ចុប្បន្នអាយុ៦ឆ្នាំ និងកូនស្រីប្អូនអាយុ៤ឆ្នាំ ។ កន្លងមក ប្តីនាងស្រឡាញ់ក្រុមគ្រួសារប្រពន្ធកូនខ្លាំងណាស់ ជាប្តីល្អ ជាឪពុកល្អ ។ ថ្មីៗកន្លងមកនេះ ស្រាប់តែប្តីនាងលួចមានស្រីថ្មី ធ្វើឲ្យទំនាក់ទំនងប្តីប្រពន្ធហាក់មានភាពរកាំរកូស ។
កន្លងមក ប្រាក់ខែប្តីបានប៉ុន្មានឲ្យប្រពន្ធទាំងអស់ មិនដែលទុកមួយរៀលទេ ។ លុះពេលមានស្រីថ្មី មិនដែលឲ្យប្រាក់ខែប្រពន្ធគ្រប់ចំនួនទេ និងមានការឈ្លោះប្រកែកគ្នារហូតប្រើហិង្សាមកលើរូបនាងចំនួន៣ដងមកហើយ ។
ប្រភពដដែលបន្តថា ពេលនាងដឹងថាប្តីមានស្រីថ្មី គឺប្រមាណជិត១ឆ្នាំមកហើយ ថែមទាំងស្រីថ្មីនោះជាអ្នកភូមិជាមួយគ្នាទៀតផង ។ នាងបានហៅប្តីនិងស្រីកំណាន់នោះ ទៅធ្វើកិច្ចសន្យានៅឯស្រុកកំណើតម្តងរួចមកហើយ កាលពីមុនរដូវបុណ្យភ្ជុំបិណ្ឌកន្លងមក និងបានអះអាងនៅចំពោះមុខអាជ្ញាធរមូលដ្ឋានថា ឈប់ទាក់ទងគ្នាទៀតហើយ ។ ប្តីនិងស្រីកំណាន់នោះ បានយល ព្រមផ្តាច់ទំនាក់ទំនងគ្នា ដោយស្រីកំណាន់រូបនោះបានអះអាងថា រូបគេមិនយកប្តីគេនិងយករបស់ដែលគេទេ ។
តាំងពីធ្វើកិច្ចសន្យាអស់រយៈពេលជាង៣ខែមក ប្តីនាងបានសុំលែងលះគ្នា ហើយនាងបានទាមទារប្រាក់ចិញ្ចឹមកូនចំនួន៣.០០០ដុល្លារ ឯប្តីប្រាប់ថាអត់មានទេ សុំឲ្យប្រចាំខែក្នុងមួយខែ១៥០ដុល្លារ តែនាងមិនព្រម ។ ប្តីនេះមិនបានរស់នៅជាមួយនាងទៀតទេ ដោយប្រាប់ថា ទៅរស់នៅផ្ទះជួលជាមួយបងប្អូនរបស់ខ្លួនជិតកន្លែងធ្វើការ ។
រយៈពេលជាង៣ខែមកហើយ ដែលប្តីនាងមានអាកប្បកិរិយាខុសប្លែកពីធម្មតា ដោយប្រពន្ធធ្វើអ្វីក៏មិនត្រូវចិត្ត ថែមទាំងប្រើអំពើហិង្សាមកលើនាងចំនួន៣ដងទៀតផង ។ លុះនៅវេលាម៉ោងប្រមាណ៧យប់ថ្ងៃទី២៤ ខែតុលានោះ នាងបានតាមរកប្តីដែលដឹងថាកំពុងសម្រាកនៅផ្ទះជួលខាងលើ ។ នៅពេលទៅដល់ ប្រពន្ធបានលួចមើលតាមបង្អួចឃើញប្តីនៅក្នុងបន្ទប់ជួលខាងលើនោះមែន ។
ដំបូងឡើយមិននឹកស្មានថា ប្តីនាងរស់នៅជាមួយស្រីកំណាន់ដែលមានកិច្ចសន្យារួចមកហើយនេះទេ ក៏បានលបមើលតាមបង្អួចឃើញស្រីកំណាន់នៅជាមួយជាប្តី ធ្វើឲ្យនាងទប់ចិត្តស្ទើរតែមិនបាន ។ ភ្លាមនោះ នាងបានទៅខ្ចីសោពីអ្នកជិតខាងបន្ទប់ជួលយកមកចាក់ពីខាងក្រៅ រួចហើយទូរស័ព្ទប្តឹងសមត្ថកិច្ចឲ្យមកជួយអន្តរាគមន៍ នាំបុរសជាប្តីនិងស្រីកំណាន់ទៅប៉ុស្តិ៍នគរបាលចោមចៅទី២ ។
ពេលសមត្ថកិច្ចមកដល់ បាននាំបុរសជាប្តីទៅ មុន ចំណែកស្រីកំណាន់មិនព្រមចេញមកទេ គឺនៅសម្ងំក្នុងបន្ទប់ទឹកតាំងពីប្រពន្ធមកដល់ភ្លាមៗ រហូតដល់សមត្ថកិច្ចនៅរង់ចាំជិតកន្លះម៉ោង ទើបស្រីកំណាន់នោះពាក់មួកការពារសុវត្ថិភាពដើរចេញមកឡើងជិះម៉ូតូជាមួយសមត្ថកិច្ចចេញទៅ ។
ក្រោយពេលកើតហេតុ សមត្ថកិច្ចបាននាំបុរសជាប្តីនិងស្រីកំណាន់ចិត្តទៅសាកសួរនៅប៉ុស្តិ៍នគរបាលរដ្ឋបាលចោមចៅទី២ និងមិនឲ្យអ្នកសារព័ត៌មានសាកសួរ និងយកព័ត៌មានបន្តទៀតទេ ។ ហេតុនេះហើយទើបមិនដឹងថា ភាគីទាំង៣នាក់ខាងលើ បានដោះស្រាយចប់សព្វគ្រប់ឬយ៉ាងណានោះឡើយ ៕
ចែករំលែកព័តមាននេះ