រាជធានីភ្នំពេញ ៖ ដោយមើលឃើញពីកំណើនអគារខ្ពស់ៗធំៗនៅកម្ពុជា និងដើម្បីទប់ស្កាត់ការបំពុលបរិស្ថានផងនោះ ក្រុមហ៊ុន SD Synergy Cambodia ដែលជាក្រុមហ៊ុនក្នុងស្រុករបស់កម្ពុជា បាននាំចូលនូវឧបករណ៍សម្រាប់ជួយដោះស្រាយប្រព័ន្ធទឹកកខ្វក់ ដែលចេញពីម៉ាស៊ីនត្រជាក់ និងម៉ាស៊ីនកំដៅ នៅតាមអគារធំៗ ដែលឧបករណ៍នេះវាបានជួយការពារបរិស្ថានបានមួយចំណែក ហើយក៏ត្រូវបានប្រទេសរីកចម្រើនលើពិភពលោកបានប្រើវាផងដែរ ។
កាលពីល្ងាចថ្ងៃទី២៤ តុលា ២០១៩ កន្លងទៅនេះ ក្រុមហ៊ុននាំចូលឧបករណ៍ដោះស្រាយបញ្ហាប្រព័ន្ធទឹកកខ្វក់នេះ បានរៀបចំពិធីសម្ពោធយ៉ាងឱឡារិកនៅសណ្ឋាគារសុខាភ្នំពេញ ដោយមានការចូលរួមពីម្ចាស់អគារធំៗជាច្រើននៅកម្ពុជា ។
បើតាមលោក ម៉េត សុខសាន្ត អគ្គនាយកនៃក្រុមហ៊ុន SD Synergy Cambodia ដែលនាំចូលឧបករណ៍ប្រភេទនេះដំបូងគេបង្អស់នៅកម្ពុជា បានមានប្រសាសន៍ថា កត្តាដែលជំរុញឱ្យក្រុមហ៊ុននាំចូលឧបករណ៍នេះមកកាន់ប្រទេសកម្ពុជា ពីព្រោះដោយសារតែសេដ្ឋកិច្ចកម្ពុជា កាន់តែមានកំណើន ហើយកំណើនអគារធំៗនៅកម្ពុជាក៏កាន់តែច្រើនដែរ ដូច្នេះហើយគ្រប់អគារទាំងនោះត្រូវការដោះស្រាយប្រព័ន្ធទឹកដែលចេញពីអគារ ជាពិសេសប្រព័ន្ធទឹកចេញពីម៉ាស៊ីនត្រជាក់ ម៉ាស៊ីនកំដៅ ដែលទឹកទាំងនោះជាប្រភេទទឹកកខ្វក់ ។
លោកបន្តថា ឧបករណ៍នេះ វាបានជួយច្រើនដល់ម្ចាស់អគារ និងសង្គមជាតិទាំងមូល ជាក់ស្ដែងនៅពេលប្រព័ន្ធទឹកស្អាតនៅតាមម៉ាស៊ីនត្រជាក់នីមួយៗវានឹងធ្វើអោយបរិស្ថាននៅជុំវិញអគារទាំងនោះនឹងស្អាតល្អ ហើយម្ចាស់អគារក៏អាចកាត់បន្ថយនូវការចំណាយនានា ពីព្រោះថា បើសិនជាប្រព័ន្ធទឹកម៉ាស៊ីនត្រជាក់ស្អាតវានឹងធ្វើអោយដំណើរការនៃម៉ាស៊ីនត្រជាក់កាន់តែស្រួលដែលវានឹងមិនស៊ីភ្លើងច្រើនដូចម៉ាស៊ីនត្រជាក់ដែលមានប្រព័ន្ធទឹកខ្វក់នោះឡើយ ។
លោកបន្តទៀតថា ឧបករណ៍ជំនួយនេះវានឹងកាត់បន្ថយនូវការប្រើប្រាស់សារធាតុគីមីដែលកន្លងមកភាគច្រើនគេប្រើសារធាតុគីមី ដើម្បីអោយទឹកស្អាត ហើយការប្រើប្រាស់សារធាតុគីមីកាន់តែច្រើនវានឹងប៉ះពាល់ដល់សុខភាព និងបរិស្ថានដែលយើងរស់នៅផងដែរ តែសម្រាប់ឧបករណ៍ជំនួយនេះ គេបំពាក់វានៅតាមជញ្ជាំង ហើយវានឹងធ្វើការសម្អាតទឹកកខ្វក់នោះដែលចេញពីប្រព័ន្ធម៉ាស៊ីនត្រជាក់ និងកំដៅធំៗនៅតាមអគារ ។
គួរបញ្ជាក់ថា បច្ចេកវិទ្យានេះផងដែរ ត្រូវបានប្រើយ៉ាងទូលំទូលាយនៅសហគមន៍អឺរ៉ុប ប្រទេសចិន ម៉ាកាវ និង ហុងកុង ចាប់តាំងពីឆ្នាំ២០០០ មកម្ល៉េះ វាធ្វើអោយប្រសើរឡើងនូវប្រព័ន្ធចរន្តទឹកវិលរបស់ម៉ាស៊ីន និងជួយការពារទប់ទល់ទៅនឹងកត្តាបីយ៉ាង៖
១) ប្រឆាំងនឹងការលូតលាស់នៃអតិសុខុមប្រាណដែលជាផលប៉ះពាល់ទៅដល់ប្រព័ន្ធម៉ាស៊ីនរបស់អ្នក
២) ការពារច្រេះ
៣) និងការពារកុំអោយមានស្និម រឺកំណកធាតុរឹងនៃរ៉ែផ្សេងៗ។
ទាំងអស់នេះ បានចូលរួមចំណែកក្នុងការសន្សំសំចៃថាមពលរហូតទៅដល់៣០% សំរាប់ក្រុមហ៊ុន ឬអគារ ។ ជាមួយនឹងជំនាញខាងប្រសិទ្ធភាពថាមពលចាប់តាំងពីឆ្នាំ២០១៥ ក្រុមហ៊ុន អេសឌី ស៊ីនើជី (ខេមបូឌា) នឹងជួយដល់អតិថិជនអោយទទួលបាននូវការសន្សំសំចៃថាមពល ក៏ដូចជាលើកកម្ពស់ផលិតភាព និងការពារបរិស្ថាន៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ