ពេលដែលនៅយុវវ័យ មនុស្សភាគច្រើនអនុញ្ញាតឲ្យមិត្តភក្តិជុំវិញខ្លួនជះឥទ្ធិពលលើការសម្រេចចិត្តដើម្បីចូលចំណោមអ្នកដទៃចុះ ។ ពេលដែលធំពេញវ័យហើយ ទម្លាប់នេះមិនខុសគ្នាច្រើនប៉ុន្មានឡើយ ។ មនុស្សពេញវ័យក៏ជួបនឹងសម្ពាធក្នុងការស្លៀកពាក់ឲ្យបានស្អាតបាត និងមានការងារល្អៗដែរ ។
លើសពីនេះទៅទៀត ការមើលឃើញទម្លាប់ចាយវាយរបស់អ្នកដទៃអាចដាក់សម្ពាធឲ្យអ្នកគិតថាអ្នកត្រូវតែធ្វើដូចគេដែរ ។ យ៉ាងណាក្តី ការទទួលយលសម្ពាធទាំងនេះគ្រាន់តែជាការខ្ជះខ្ជាយលុយដែលអ្នករកបានដោយពិបាកប៉ុណ្ណោះ ។ ដូច្នេះ ប្រសិនបើអ្នកជួបប្រទះនឹងសម្ពាធទាំងនេះ ចូរអានមូលហេតុខាងក្រោមនេះ ដើម្បីជៀសវាងការចាយវាយដើម្បីអួតអ្នកដទៃ ៖
១. អ្នកនឹងស្តាយក្រោយ៖
ការចាយវាយលើសម្ភារៈអាចជួយឲ្យអ្នកសប្បាយចិត្តក្នុងរយៈពេលខ្លី ប៉ុន្តែវាមិនជួយឲ្យអ្នកសម្រេចគោលដៅនៅថ្ងៃអនាគតរបស់អ្នកទេ ។ មិនថាអ្នកកំពុងសន្សំដើម្បីសម្រេចគោលដៅអ្វីទេ គោលដៅទាំងនោះគួរតែមានតម្លៃជាងសម្ភារៈដែលអ្នកទិញដើម្បីអួតអាងអ្នកដទៃ ។
២. មិត្តរបស់អ្នកខ្លះក៏កំពុងកុហកអ្នកដទៃដែរ ៖
មុនពេលអនុញ្ញាតឲ្យខ្លួនស្តាប់តាមសម្ពាធពីមនុស្សជុំវិញខ្លួន អ្នកត្រូវសួរខ្លួនឯងជាមុនសិនថាតើមិត្តរបស់អ្នកពិតជាមានស្ថានការល្អជាងអ្នកពិតមែនទេ? មានករណីខ្លះ ពួកគេក៏កំពុងតែខ្ចីលុយអ្នកដទៃដើម្បីបង្ហាញពីជីវិតដែលឡូយឆាយដែរ ។ តើអ្នកពិតជាចង់មានជីវភាពដូចគេពិតមែនទេ?
៣. អ្នកមិនអាចធ្វើឲ្យមនុស្សគ្រប់គ្នាសប្បាយចិត្តទេ៖
មិនថាអ្នកចាយវាយច្រើនប៉ុណ្ណាលើសម្លៀកបំពាក់ ផ្ទះសម្បែង ឬរថយន្តល្អៗទេ មិត្តទាំងនោះរបស់អ្នកមិនសប្បាយចិត្តជំនួសអ្នកឡើយ ។ លើសពីនេះទៅទៀត អ្នកមើលរំលងអ្វីដែលអ្នកចង់បានព្រោះអ្នកគិតតែពីធ្វើអ្វីតាមអ្នកដទៃគិតថាល្អ ។
៤. ជីវិតមិនមែនជាការប្រកួតប្រជែងទេ៖
ជីវិតប្រៀបបានជាការធ្វើដំណើរ ។ អ្នកមិនទទួលបានរង្វាន់ ឬពានពីការទិញសម្ភារៈច្រើនឡើយ ។ រាល់ការផ្សាយពាណិជ្ជកម្មដែលអ្នកមើលឃើញលើទូរទស្សន៍ និងប្រព័ន្ធសង្គមតែងតែប្រាប់ថាអ្វីដែលអ្នកមានគឺមិនគ្រប់គ្រាន់ឲ្យអ្នកសប្បាយចិត្តឡើយ ។ ប៉ុន្តែអ្នកមិនចាំបាច់ជឿទេ និងធ្វើអ្វីដែលអ្នកគិតថាល្អជាងគេសម្រាប់អ្នកផ្ទាល់ ។
៥. មិត្តដែលពិតប្រាកដមិនខ្វល់ថាអ្នកមានអ្វីទេ៖
មិត្តដែលអ្នកគួររាប់រកមិនខ្វល់ទេថាអ្នកមានផ្ទះធំឬតូច រថយន្តទំនើបឬចាស់ និងស្មាតហ្វូនថ្មីជាងគេឬហួសសម័យទេ ។ មិត្តពិតប្រាកដផ្តោតសំខាន់លើអត្តចរិតរបស់អ្នក និងពេលវេលាដែលពួកអ្នកចំណាយជាមួយគ្នា ៕ កែសម្រួលដោយ ៖ សុឃាក់
ចែករំលែកព័តមាននេះ