រាជធានីភ្នំពេញ ៖ កម្ពុជាបានបញ្ជូនឯកអគ្គរាជទូតថ្មីចំនួន៩រូប ជំនួសឯកអគ្គរាជទូតដែលចប់អាណត្តិរយៈពេល៣ឆ្នាំ ដើម្បីបំពេញបេសកម្មនៅបណ្តាប្រទេសចំនួន៩ ដែលជាមិត្តភក្តិ ។ ឯកអគ្គរាជទូតខ្មែរ ដែលត្រូវចេញទៅបំពេញការងារការទូតនៅបរទេស សម្តេច ហេង សំរិនប្រធានរដ្ឋសភា បានស្នើឲ្យយកចិត្តទុកដាក់ពីផលប្រយោជន៍ជាតិ និងប្រជាជនជាធំ ខណៈគោលនយោបាយការបរទេសថ្មីប្រកាន់យកការកៀរគរបរទេសមកធ្វើវិយោគទន់នៅកម្ពុជាឲ្យកាន់តែច្រើនថែមទៀត ។
ខណៈអនុញ្ញាតឲ្យឯកអគ្គរាជទូតទាំង៩រូប ចូលរួមពិភាក្សា និងជម្រាបលានាព្រឹក ថ្ងៃទី២៥ ខែតុលា ឆ្នាំ២០១៩ នៅវិមានរដ្ឋសភា និងមុនចេញពីធ្វើបេសកម្មលើឆាកអន្តរជាតិ សម្តេច ហេង សំរិន ប្រធានរដ្ឋសភាបានជម្រាបឯកអគ្គរាជទូតនៃព្រះរាជាណាចក្រកម្ពុជាដែលត្រៀមចេញទៅបំពេញបេសកកម្មការទូតនៅក្រៅប្រទេសថា នៅពេលបំពេញការងារ ត្រូវតម្កល់ប្រយោជន៍ជាតិជាធំ ។ ទោះក្នុងកាលៈទេសៈណាក៏ដោយត្រូវរក្សាការពារ និងលើកតម្លៃជាតិជានិច្ច ។ ត្រូវរក្សាការសម្ងាត់របស់ជាតិ និងអនុវត្តឱ្យបានខ្ជាប់ខ្ជួននូវគោលនយោបាយការបរទេសរបស់កម្ពុជា ។
សម្តេចប្រធានរដ្ឋសភា បានលើកឡើងបន្តថា បេសកកម្មការទូតត្រូវបង្ហាញ និងប្រកាន់ខ្ជាប់នូវអត្តសញ្ញាណជាតិ និងសេចក្តីថ្លៃថ្នូរដោយត្រូវបន្តលើកកម្ពស់ផ្សព្វផ្សាយឱ្យបរទេសស្គាល់កម្ពុជាឱ្យបានច្បាស់ទាំងផ្នែកសិល្បៈ វប្បធម៌ ប្រពៃណីរបស់ខ្មែរ ដែលឆ្លុះបញ្ចាំងឱ្យឃើញពីអត្តសញ្ញាណរបស់ជាតិ ដែលមានវប្បធម៌ផូរផង់តាំងពីសម័យអង្គរមក ។ សម្តេចក៏បានផ្តាំផ្ញើដល់ឯកអគ្គរាជទូតទាំងអស់ចុះស្វែងយល់សុខទុក្ខ និងក្តាប់ព័ត៌មានឲ្យបានច្បាស់លាស់ ជាក់ស្តែងអំពីប្រជាពលរដ្ឋ សិស្ស-និស្សិត និងពលករខ្មែរ ដែលកំពុងរស់នៅក្រៅប្រទេស ។
សូមបង្កលក្ខណៈងាយស្រួល លើសេវាកម្មនានារបស់ស្ថានទូតលើកកម្ពស់សុខុមាលភាព និងការពារផលប្រយោជន៍របស់ពួកគាត់ ។ សម្តេចប្រធានរដ្ឋសភាបានជំរុញតំណាងកម្ពុជាតាមប្រទេសនានាដែលទើបតែងតាំងនោះបន្តជំរុញ និងលើកកម្ពស់ការផ្សព្វផ្សាយសំដៅទាក់ទាញអ្នកវិនិយោគ និងទេសចរណ៍បរទេសមកប្រទេសយើងឱ្យកាន់តែច្រើនថែមទៀតដោយផ្អែកលើសក្តានុពលដែលប្រទេសមានស្រាប់ ហើយត្រូវបង្កើនកិច្ចសហប្រតិបត្តិការល្អជាមួយឯកអគ្គរដ្ឋទូត-រាជទូតនៃបណ្តាប្រទេសដទៃទៀត ប្រចាំនៅប្រទេសនោះផងដែរ ។
លោកទូតថ្មីក៏បានគូសបញ្ជាក់ថា ក្រសួងការបរទេសកម្ពុជាមានគោលនយោបាយថ្មី គឺធ្វើការទូតបែបថ្មី មិនមែនធ្វើការទូតបែបប្រពៃណីទេ តែធ្វើតាមបែបសេដ្ឋកិច្ច ។ ការងារសំខាន់របស់យើង គឺផ្តោតលើបញ្ហាសេដ្ឋកិច្ច ដោយយើងនឹងព្យាយាមដល់ធុរៈកិច្ចឲ្យបានច្រើន ហើយពាំនាំនូវអ្វីដែលជាសក្តានុពលរបស់កម្ពុជាទៅប្រាប់ដល់អ្នកវិនិយោគ ដើម្បីឲ្យគេមកធ្វើវិនិយោគនៅកម្ពុជាឲ្យបានកាន់តែច្រើន ។
សូមជម្រាបថា ឯកអគ្គរាជទូតថ្មីទាំង៩រូបដែលនឹងទៅបំពេញបេសកម្មនៅក្រៅប្រទេសឆាប់ៗនេះ រួមមាន ១-លោក ចាយ ណាវុធ ឯកអគ្គរាជទូតកម្ពុជា ប្រចាំសាធារណរដ្ឋសង្គមនិយមវៀតណាម ២-លោក អ៊ាត សីលា ឯកអគ្គរាជទូតកម្ពុជា ប្រចាំសហព័ន្ធរុស្ស៊ី ៣-លោក ចាន់ រតនា ឯកអគ្គរាជទូតកម្ពុជា ប្រចាំប្រទេសអូស្ត្រាលី ៤-លោកអាន សុខខឿន ឯកអគ្គរាជទូតកម្ពុជា ប្រចាំប្រទេសស្វីស ៥-លោក ឈូក ប៊ុនណា ឯកអគ្គរាជទូតកម្ពុជា ប្រចាំសាធារណរដ្ឋសហភាពមីយ៉ាន់ម៉ា ៦-លោក ចឺយ វិចិត្រ ឯកអគ្គរាជទូតកម្ពុជា ប្រចាំប្រទេសម៉ាឡេស៊ី ៧-លោកជំទាវ បាន បូរ៉ុម ឯកអគ្គរាជទូតកម្ពុជា ប្រចាំសាធារណរដ្ឋគូបា ៨-លោក ហ៊ុន ហាន ឯកអគ្គរាជទូតកម្ពុជា ប្រចាំរដ្ឋគូវ៉ែត និង៩-លោក ហុក សុភា ឯកអគ្គរាជទូតកម្ពុជាប្រចាំប្រទេសប្រ៊ុយណេដារូសាឡាម ៕ កែសម្រួលដោយ ៖ សុឃាក់
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ