ខេត្តស្វាយរៀង ៖ មានករណីប្រទះឃើញសពបុរសចំណាស់ស្លាប់ក្នុងទឹកបឹង ត្រូវបានគេសង្ស័យថា ទំនងជាជនរងគ្រោះហែលទឹករាយមង ក៏បណ្តាលឱ្យមងរុំជើង និងខ្លួន ហើយរើមិនរួចក៏លង់ទឹកស្លាប់កាលពីវេលាម៉ោង១និង២០នាទីរសៀលថ្ងៃទី២៣ ខែតុលា ឆ្នាំ២០១៩…
ខេត្តស្វាយរៀង ៖ មានករណីប្រទះឃើញសពបុរសចំណាស់ស្លាប់ក្នុងទឹកបឹង ត្រូវបានគេសង្ស័យថា ទំនងជាជនរងគ្រោះហែលទឹករាយមង ក៏បណ្តាលឱ្យមងរុំជើង និងខ្លួន ហើយរើមិនរួចក៏លង់ទឹកស្លាប់កាលពីវេលាម៉ោង១និង២០នាទីរសៀលថ្ងៃទី២៣ ខែតុលា ឆ្នាំ២០១៩ នៅចំណុចក្នុងបឹងកំពឹស ស្ថិតនៅភូមិត្រពាំងពិការ ឃុំអំពឹល ស្រុករមាសហែក។
បើតាមសមត្ថកិច្ចបានឱ្យដឹងថា ជនរងគ្រោះដែលស្លាប់ឈ្មោះទូច ឃិន ភេទប្រុស អាយុ៧២ឆ្នាំ មុខរបរកសិករ មានទីលំនៅភូមិត្រពាំងពិការ ឃុំអំពិល ស្រុករមាសហែក។
តាមប្រភពដដែលបានឱ្យដឹងថា នៅមុនពេលកើតហេតុ ជនរងគ្រោះបានទៅដាក់មងនៅបឹងកំពឹសខាងត្បូងផ្ទះចម្ងាយ១៥០០ម៉ែត្រ លុះពេលប្រពន្ធបាត់ប្ដីយូរពេក មិនឃើញត្រឡប់មកផ្ទះវិញ គាត់ក៏បានរកបងប្អូនក្នុងភូមិទៅតាមរកនៅក្នុងបឹងដែលជាកន្លែងជនរងគ្រោះធ្លាប់ដាក់មង ។
តាមប្រភពដដែលបានបន្តថា លុះពេលនាំគ្នាទៅដល់កន្លែងកើតហេតុនៅវេលាម៉ោង៥និង៣០នាទីល្ងាចថ្ងៃទី២៣ តុលា នោះ ឃើញកន្ត្រកដាក់មងអណ្ដែតលើទឹក ពេលនោះបងប្អូននិងអ្នកភូមិក៏បានចុះរាវរកក្នុងទឹកបឹងដែលមានជម្រៅត្រឹម.កក៏ប្រទះឃើញសពជនរងគ្រោះត្រូវបានមងរុំព័ទ្ធដៃជើង និងខ្លួន។
តាមប្រភពដដែលបានបន្តទៀតថា ពេលនោះបងប្អូន និងអ្នកភូមិបានលើកសពជនរងគ្រោះឡើងលើគោក រួចហើយរាយការណ៍ជូនសមត្ថកិច្ចប៉ុស្តិ៍ឱ្យចុះទៅពិនិត្យ និងបានរកឃើញថា ជនរងគ្រោះពិតជាស្លាប់ដោយសារមងរុំ បណ្តាលឲ្យលង់ទឹកស្លាប់ប្រាកដមែន ។ ដោយសមត្ថកិច្ចសន្និដ្ឋានថា ទំនងជាជនរងគ្រោះហែលទឹករាយមង បណ្តាលឲ្យមងរុំជើង និងខ្លួន ហើយរើមិនរួចក៏លង់ទឹកស្លាប់ប្រហែលជានៅអំឡុងម៉ោង៣រសៀលថ្ងៃដដែល។
បន្ទាប់ពីពិនិត្យរួច សមត្ថកិច្ចបានប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ