រាជធានីភ្នំពេញ៖ រដ្ឋបាលរាជធានីភ្នំពេញបានសន្យាដោះស្រាយតម្រូវការចាំបាច់ជាច្រើនជូនប្រជាពលរដ្ឋនៅក្នុងខណ្ឌឬស្សីកែវដើម្បីសម្រាលការលំបាកក្នុងជីវភាពភាពប្រចាំថ្ងៃរបស់ប្រជាពលរដ្ឋក្នុងមូលដ្ឋាន ។ អាជ្ញាធរាជធានីភ្នំពេញបានបង្ហាញផែនការពន្លឿនការដោះស្រាយតម្រូវការចាំបាច់នានារបស់ប្រជាពលរដ្ឋដូចជាការជួសជុសជង្ហុកសំបុកមាន់ ស្តារប្រព័ន្ធប្រឡាយលូ ដាក់ភ្លើងបំភ្លើង ផ្លូវសាធារណៈ បញ្ហាក្មេងទំនើង សំរាម ចោរកម្មនិងល្បែងស៊ីសងនៅមូលដ្ឋាន រួមទាំងការបង្ខិតសេវារដ្ឋបាលសាធារណៈឲ្យកាន់តែនៅកៀកជិតប្រជាពលរដ្ឋ ។
ថ្លែងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញអាណត្តិទី៣ នៅខណ្ឌឬស្សីកែវ នៅព្រឹកថ្ងៃទី២៤ តុលា លោក ហួត ហៃ អភិបាលរងរាជធានីភ្នំពេញបានថ្លែងថា អាជ្ញាធរនឹងពន្លឿនការដោះស្រាយបញ្ហាទាំងនេះជាបន្ទាន់នៅពេលឆាប់ៗនេះ ដើម្បីឆ្លើយតបទៅនឹងសំណើនិងសំណូមពរ ដែលជាការលើកឡើងរបស់ប្រជាពលរដ្ឋនៅក្នុងវេទិកាសាធារណៈនេះ ។
លោកបានបញ្ជាក់ថា ចំពោះបញ្ហាណាដែលធំៗពាក់ព័ន្ធជាមួយនឹងថ្នាក់ជាតិ រដ្ឋបាលរាជធានីភ្នំពេញនឹងបន្តពិភាក្សាជាមួយគ្រប់ស្ថាប័នពាក់ព័ន្ធដើម្បីពន្លឿនការដោះស្រាយជួយប្រជាពលរដ្ឋឲ្យបានទាន់ពេលវេលាដែលឈានទៅកាត់បន្ថយការលំបាករបស់ប្រជាពលរដ្ឋ ។
រាជធានីភ្នំពេញមានបញ្ហាធំៗចំនួន៣គឺ បញ្ហាស្ទះចរាចរណ៍ លូ និងសំរាម បញ្ហាទាំង៣នេះអាជ្ញាជំរុញការពន្លឿនដោះស្រាយជាអាទិភាពមុនគេដើម្បីធានាឲ្យទីក្រុងមានសណ្តាប់ធ្នាប់ និងសោភ័ណភាព ដែលបំរើដល់ការរស់នៅរបស់ប្រជាពលរដ្ឋ ។
លោក ប៉ា សុជាតិវង្ស ប្រធានក្រុមប្រឹក្សារាជធានីភ្នំពេញបានថ្លែងថា វេទិកាសាធារណៈដែលរៀបចំដោយអាជ្ញារាជធានីភ្នំពេញនេះពិតជាមានសារៈសំខាន់ណាស់ដែលបានដឹងពីព័ត៌មាន និងតម្រូវការថ្មីៗរបស់ប្រជាពលរដ្ឋនៅតាមមូលដ្ឋានដើម្បីអោយអាជ្ញាធរចាត់វិធានការណ៍ដោះស្រាយអោយចំទិសដៅជូនប្រជាពលរដ្ឋ ៕
កែសម្រួលដោយ ៖ សំណាង
ចែករំលែកព័តមាននេះ