រាជធានីភ្នំពេញ ៖ បុរស២នាក់ជិះក្នុងរថយន្តមួយគ្រឿងម៉ាកសាំយ៉ុងមានដឹកខោទឹកនោមកូនក្មេង ខណៈកំពុងបើកយឺតៗលក់តាមផ្លូវសុខៗ ស្រាប់តែធុំក្លិនឈ្ងៀម ព្រមទាំងមានផ្សែង និងអណ្តាតភ្លើងឆាបឆេះចេញពីម៉ាស៊ីនផ្នែកខាងមុខយ៉ាងសន្ធោសន្ធៅ ធ្វើឱ្យបុរស២នាក់ខាងលើស្រែកផ្អើលឆោឡោដល់ក្រុមជាងរថយន្តនៅក្បែរកន្លែងកើតហេតុនាំគ្នាយកបំពង់ពន្លត់អគ្គិភ័យមកជួយបាញ់ពន្លត់ និងជួយជញ្ជូនខោទឹកនោមកូនក្មេងយកចេញមកក្រៅទាន់ ។
ហេតុការណ៍ខាងលើបានបង្កការភ្ញាក់ផ្អើលកើតឡើងកាលពីវាលាម៉ោង១០និង១៥នាទីព្រឹក ថ្ងៃទី ២៤ ខែ តុលា ឆ្នាំ ២០១៩ នៅចំណុចផ្លូវលេខ៧០ កែងផ្លូវលេខR6 ក្នុងសង្កាត់ស្រះចក ខណ្ឌដូនពេញ។
រថយន្តមួយគ្រឿងខាងលើជិះគ្នា២នាក់ ម៉ាកសាំយ៉ុង ពណ៌ទឹកប្រាក់ ពាក់ស្លាកលេខ ភ្នំពេញ ២AD-៦៨០៨ អ្នកបើកបរ និងអ្នករួមដំណើរមិនស្គាល់អត្តសញ្ញាណនោះទេ ហើយរថយន្តនេះមានដឹកខោទឹកនោមកូនក្មេងសម្រាប់លក់ផងដែរ ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុ គេឃើញបុរស២នាក់ជិះក្នុង រថយន្តមួយគ្រឿងខាងលើ ដោយមានដឹកខោទឹកនោមរបស់កូនក្មេងពេញមួយរថយន្ត ធ្វើដំណើរចេញពីម្តុំអង់តែនទួលគោក ហើយបើករថយន្តលក់ខោទឹកនោមកូនក្មេងតាមបណ្តោយផ្លូវលេខ៧០ ក្នុងទិសដៅពីលិចទៅកើត។
តាមប្រភពដដែលបានបន្តថា ខណៈអ្នកបើកបរកំពុងតែបើករថយន្តលក់ខោទឹកនោមកូនក្មេងតាមផ្លូវនោះ ក៏ស្រាប់តែធុំក្លិនឈ្ងៀម និងមានផ្សែងខ្មៅហុយទ្រលោមចូលក្នុងកាប៊ីនផងដែរ ដោយឃើញហេតុការណ៍បែបនេះ អ្នកបើកបរក៏បានបើករថយន្តមកឈប់ត្រង់ចំណុចខាងលើ រួចនាំគ្នាចុះមើល ក៏ឃើញអណ្តាតភ្លើងកំពុងតែឆាបឆេះចេញពីម៉ាស៊ីនរថយន្តផ្នែកខាងមុខ ទើបនាំគ្នាស្រែកផ្អើលឆោឡោឡើងតែម្តង។
តាមប្រភពដដែលបានបន្តទៀតថា ពេលដែលឮសម្រែករបស់បុរសទាំងពីរនាក់ខាងលើស្រែកថា «ភ្លើងឆេះរថយន្ត» ក៏ធ្វើអោយមានការភ្ញាក់ផ្អើលទៅដល់ក្រុមជាងជួសជុលរថយន្តតាមការ៉ាស់នៅក្បែរៗកន្លែងកើតហេតុនាំគ្នាស្រវេស្រវ៉ាយកបំពង់ពន្លត់អគ្គិភ័យជាច្រើនបំពង់ និងយកទឹកមកជួយពន្លត់ ចំណែកអ្នកខ្លះទៀតក៏បាននាំគ្នាជួយជញ្ជូនខោទឹកនោមកូនក្មេងដែលមាននៅក្នុងរថយន្តយកចេញមកក្រៅអស់ទាន់ពេលវេលាផងដែរ ហើយក៏មានកម្លាំងសមត្ថកិច្ចមូលដ្ឋានចុះមកដល់កន្លែងកើតហេតុភ្លាមៗផងដែរ។
ពាក់ព័ន្ធនឹងករណីឆេះ រថយន្តមួយគ្រឿងខាងលើនេះដែរ គឺមូលហេតុបណ្តាលមកពីឆ្លងចរន្តអគ្គិសនីចេញពីម៉ាស៊ីនផ្នែកខាងមុខ និងឆេះរាលដាលមកដល់កៅអីខាងក្នុងការប៊ីន បណ្តាលអោយរថយន្តរងការខូចខាតទាំងស្រុង តែមិនបង្កឱ្យមនុស្សណាម្នាក់រងគ្រោះថ្នាក់នោះឡើយ។
ក្រោយពេលកើតហេតុ ដោយមិនបានបង្កឱ្យមនុស្សណាម្នាក់រងគ្រោះថ្នាក់ និងមិនប៉ះពាល់ដល់ទ្រព្យសម្បត្តិអ្នកដទៃនោះ ទើបកម្លាំងសមត្ថកិច្ចបានអនុញ្ញាតអោយម្ចាស់រថយន្តម៉ាកសាំយ៉ុងមួយគ្រឿងខាងលើរករថយន្តផ្សេងទៀតមកអូសយកទៅធ្វើការជួសជុលដោយខ្លួនឯង ព្រមទាំងដឹកខោទឹកនោមកូនក្មេងយកទៅវិញផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ