រាជធានីភ្នំពេញ ៖ សាលាដំបូងរាជធានីភ្នំពេញ នៅព្រឹកថ្ងៃទី២៤ តុលា នេះ បានលើកយកសំណុំរឿងឃាតកម្មមួយមកបើកសវនាការជនុំជម្រះទោសពាក់ព័ន្ធរឿងមន្រ្តីយោធាម្នាក់ចាក់សម្លាប់បុរសជាជនជាតិចិនដោយចោទថា បានទំនាក់ទំនងសាហាយស្មន់ជាមួយប្រពន្ធខ្លួន ដែលមិនទាន់មានសាលក្រមលែងលះដាច់ស្រេច ។
សវនាការនេះ បន្ទាប់ពីសាកសួរដេញដោលចប់សព្វគ្រប់ចៅក្រមជំនុំជម្រះ បានលើកពេលប្រកាសសាលក្រមផ្តន្ទាទោសលើជនជាប់ចោទ ទៅថ្ងៃទី១ វិច្ឆិកា ឆ្នាំ២០១៩ ខាងមុខ ។ ជនជាប់ចោទក្នុងសំណុំរឿងនេះឈ្មោះ គង់ កុសល់ ភេទប្រុស អាយុ៣៣ឆ្នាំ មុខរបរមិនទាន់ចាប់ខ្លួនជាយោធា នៅអង្គភាពវរៈ៩១ ។ នៅចំពោះមុខរង្វង់ក្រចកសេះ ជនជាប់ចោទបានសារភាពអំពីសកម្មភាពដែលខ្លួនប្រព្រឹត្តដូច្នោះថា បានជាខ្លួនសម្លាប់បុរសជាសង្សារប្រពន្ធ ដោយសារតែខឹងនិងពួកគេហាមឃាត់មិនឱ្យកូនប្រុស-ស្រីជួបមុខឪពុក ។
ជនជាប់ចោទបន្តថា ខ្លួននិងប្រពន្ធបានរៀបការត្រឹមត្រូវតាមប្រពៃណីខ្មែរនឹងរួមរស់ជាមួយគ្នារហូតមានកូនប្រុស ស្រី២នាក់ ។ តែក្រោយមកការរស់នៅមិនសូវចុះសម្រុងគ្នា ចេះតែមានភាពរកាំរកូស គ្មានសេចក្តីសុខទាំងសងខាងបណ្តាលឲ្យគ្រួសារមានការបែកបាក់ នឹងរស់នៅមិនជុំគ្នា រហូតឈានដល់ការព្រមព្រៀងប្តឹងលែងលះជាប្តីប្រពន្ធ ។ ប៉ុន្តែនៅក្នុងដំណាក់ កាលកំពុងជាប់បណ្តឹងលែងលះនោះ ភាគីទាំងពីរមិនទាន់ទទួលបានសាលក្រមស្ថាពរនៅឡើយទេ ស្រាប់តែប្រពន្ធលួចទាក់ទងថៅកែជនជាតិចិនម្នាក់ យកគ្នាធ្វើជាប្ដីប្រពន្ធបណ្តើរពេញមុខតែម្ដង ។
នៅថ្ងៃកើតហេតុ ខ្លួនបានទៅហូបស៊ុបនៅហាងមួយឈ្មោះ ហ្វាមីលី ក៏បានជួបប្រពន្ធ.កូន.នឹងម៉ែក្មេក រួមទាំងជនជាតិចិនដែលសាហាយប្រពន្ធនោះផងដែរ ។ ចម្លើយបន្តទៀតថា ពេលឃើញដូច្នោះខ្លួនក៏បក់ដៃហៅកូនទាំង២ ដើម្បីសួរសុខទុក្ខ តែបែជាប្រុសសាហាយ នឹងប្រពន្ធ រួមទាំងម៉ែក្មេក ហាមឃាត់មិនឲ្យកូនមកជួបខ្លួនជាឪពុកទេ ។ ទង្វើនោះហើយជាហេតុបណ្ដាល ឲ្យខ្លួនផ្ទុះកំហឹង ក៏ស្ទុះទៅទាញយកកាំបិទចុងស្រួចនៅក្នុងហាងលក់ស៊ុប ចាក់ទៅលើបុរសជនជាតិចិនជាច្រើនកាំបិត បណ្តាលហូរឈាមដេកដួលស្លាប់នៅកន្លែងតែម្ដងទៅ ។
ចំណែកប្រពន្ធ និងម៉ែក្មេកបានជួយប្រវាយប្រតប់ខ្លួនការពារប្រុសសាហាយនោះក៏ត្រូវរងមុតកាំបិទចុងស្រួចជាច្រើនកន្លែងដែរ ។ ក្រោយកើត ហេតុខ្លួនក៏បានជិៈម៉តូរត់ចេញ នឹងទៅលាក់ខ្លួនដល់ខេត្តព្រះ វិហារ តែត្រូវសមត្ថកិច្ចតាមចាប់ខ្លួនមកវិញ ។ ក្នុងសវនាការជនជាប់ចោទបានសារភាពទាំងស្រុង នូវទង្វើដែលគេបានប្រព្រឹត្ត ហើយចុងក្រោយជនជាប់ ក៏បានសំណូមពរស្នើសុំឲ្យតុលាការមានការបន្ធូបន្ថយទោសចំពោះរូបគេ ដែលបានជ្រុលដៃចាក់រហូតដល់ស្លាប់ជនរងគ្រោះ ក៏ព្រោះតែកំហឹងផ្ទុះភ្លាមឡើងនៅចំពោះមុខ ។ សូមរម្រឹកថា ករណីឃាកម្មខាងលើនេះបានកើតឡើង កាលពីវេលាម៉ោង៨យប់ថ្ងៃទី២៤ ខែធ្នូ ឆ្នាំ២០១៨ នៅចំណុចភោជនីយដ្ឋាន ហ្វាមីលី ស្ថិតនៅតាមផ្លូវលេខ១០១ សង្កាត់ បឹងត្របែក ខណ្ឌចំការមន រាជធានីភ្នំពេញ ។
អំពើឃាតកម្មនោះបណ្ដាលឲ្យបុរសជនជាតិចិតម្នាក់ស្លាប់ នៅក្នុងថ្លុកឈាម និងស្រ្តី២នាក់រងបួសធ្ងន់ធ្ងរផងដែរ ។ ជនរងគ្រោះ១-ឈ្មោះ Song Qingjun ភេទប្រុស អាយុ៤៦ ឆ្នាំ ជនជាតិចិន ស្នាក់នៅផ្ទះជួល ផ្លូវលេខ៣១០ សង្កាត់បឹងកេងកងទី២ ខណ្ឌចំការមន រាជធានីភ្នំពេញ មានមុខរបរប្រធានក្រុមហ៊ុន ស្លាប់ ។ ២-ឈ្មោះ គង់ សុផារ៉ា ភេទស្រី អាយុ៣២ ឆ្នាំ ជនជាតិខ្មែរ ស្នាក់នៅផ្ទះលេខ ១៣៥ ផ្លូវលេខ ៣៥៧ ភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ ជាប្រពន្ធជនដៃដល់បានរងរបួស ដៃនិងជើងទាំងសងខាង និង៣-ឈ្មោះ ម៉ែន អេង ភេទស្រី អាយុ៥៦ ឆ្នាំ ជនជាតិខ្មែរ ជាម្ដាយ (គង់ សុផារ៉ា) មុខរបរ លក់បបរ រងរបួសជើងឆ្វេង ។
ចែករំលែកព័តមាននេះ