ជប៉ុនសន្យាជួយរៀបចំផែនការមេសម្រាប់អភិវឌ្ឍកំពង់ផែក្រុងព្រះសីហនុ
- ភ្នំពេញ
រាជធានីភ្នំពេញ ៖ លោក Masahiro MIKAMi មានប្រសាសន៍ថា ជប៉ុននឹងជួយរៀបចំផែនការមេសម្រាប់អភិវឌ្ឍកំពង់ផែក្រុងព្រះសីហនុ ។ លោក Masahiro…
រាជធានីភ្នំពេញ ៖ លោក Masahiro MIKAMi មានប្រសាសន៍ថា ជប៉ុននឹងជួយរៀបចំផែនការមេសម្រាប់អភិវឌ្ឍកំពង់ផែក្រុងព្រះសីហនុ ។ លោក Masahiro…
រាជធានីភ្នំពេញ ៖ លោក Masahiro MIKAMi មានប្រសាសន៍ថា ជប៉ុននឹងជួយរៀបចំផែនការមេសម្រាប់អភិវឌ្ឍកំពង់ផែក្រុងព្រះសីហនុ ។ លោក Masahiro MIKAMI ឯកអគ្គរាជទូត ជប៉ុនថ្មីប្រចាំនៅព្រះរាជាណាចក្រកម្ពុជា បានមានប្រសាសន៍បែបនេះនាព្រឹកថ្ងៃទី២៣ ខែតុលា ឆ្នាំ២០១៩ នៅក្នុងឱកាសដែលលោកចូលជួបសម្ដែងការគួរសមនិងពិភាក្សាការងារជាមួយសម្ដេចតេជោនាយករដ្ឋមន្ត្រី នៅវិមានសន្តិភាព បន្ទាប់ពីលោកទើបនឹងថ្វាយសារតាំងព្រះករុណាព្រះមហាក្សត្រនៃព្រះរាជាណាចក្រកម្ពុជា។
សម្ដេចតេជោនាយករដ្ឋមន្ត្រី បានស្វាគមន៍យ៉ាងកក់ក្តៅចំពោះលោក Masahiro MIKAMI ដែលត្រូវបានតែងតាំងជាឯកអគ្គរាជទូតវិសាមញ្ញនិងពេញសមត្ថភាពរបស់ជប៉ុនប្រចាំនៅព្រះរាជាណាចក្រកម្ពុជា ។
សម្ដេចតេជោនាយករដ្ឋមន្ត្រី បានបញ្ជាក់ថា កម្ពុជាចង់ឲ្យជប៉ុនរៀបចំផែនការមេក្នុងការអភិវឌ្ឍកំពង់ផែក្រុងព្រះសីហនុឲ្យបានទទួលជោគជ័យ ព្រោះការកសាងកំពង់ផែទឹកជ្រៅនៅខេត្តព្រះសីហនុ នឹងជួយពង្រឹងសមត្ថភាពកំពង់ផែក្នុងការទទួលកប៉ាល់ធំៗចូលចតដោយមិនបាច់ផ្ទេរទំនិញមួយចំនួននៅកំពង់ផែវៀតណាម សិង្ហបុរីនិងម៉ាឡេស៊ីជាដើម ។ លោកអគ្គរាជទូតជប៉ុនថ្មីបញ្ជាក់ថា ទំនាក់ទំនងទ្វេភាគីរវាងកម្ពុជានិងជប៉ុនកាន់តែល្អ ។
ប្រទេសជប៉ុននៅតែបន្តធ្វើកិច្ចសហប្រតិបត្តិការជាមួយប្រទេសកម្ពុជា រួមទាំងគាំទ្រក្នុងការជំរុញកិច្ចសហប្រតិបត្តិការទ្វេភាគីរវាងប្រទេសទាំងពីរឲ្យកាន់តប្រសើរឡើងថែមទៀតដូចជាផ្នែកនយោបាយ សេដ្ឋកិច្ច វប្បធម៌ និងវិស័យផ្សេងទៀត ។
លោកឯកអគ្គរាជទូត បានប្ដេជ្ញាចិត្តថា នៅក្នុងអាណតិ្តការទូតរបស់លោកនៅកម្ពុជា នឹងខិតខំពង្រឹងទំនាក់ទំនងកិច្ចសហប្រតិបត្តិការទ្វេភាគីឱ្យកាន់តែមានរីកចម្រើន ទទួលផលផ្លែផ្កានិងជោគជ័យកាន់តែធំធេងទៀតរវាងប្រទេសទាំងពីរ ។ រាជរដ្ឋាភិបាលជប៉ុននឹងបន្តជួយដល់ព្រះរាជាណាចក្រកម្ពុជា ក្នុងការជំរុញការនាំចេញផលិតផលរបស់កម្ពុជាទៅកាន់់ទីផ្សារអន្តរជាតិ។
សម្ដេចតេជោ ហុ៊ន សែន បានអរគុណជប៉ុនដែលបានចូលរួមចំណែកផ្ដល់ជំនួយយ៉ាងច្រើនបំផុតដល់កម្ពុជា ពិសេសលើវិស័យហេដ្ឋារចនាសម្ព័ន្ធ ។ ជំនួយរបស់ប្រជាជននិងរដ្ឋាភិបាលជប៉ុន បានរួមចំណែកក្នុងការកសាងនិងស្ដារប្រទេសកម្ពុជា ។ សម្ដេចតេជោបញ្ជាក់ថា ទំនាក់ទំនងរវាងប្រទេសទាំងពីរបានឡើងដល់កម្រិតខ្ពស់ ជាកម្រិតដៃគូយុទ្ធសាស្ត្រ ដោយថ្នាក់ដឹកនាំកំពូលនៃប្រទេសទាំងពីរ ។
ការហោះហើរត្រង់រវាងប្រទេសទាំងពីរ ក៏បានជួយសម្រួលដល់ការធ្វើដំណើរការទូត អ្នកវិនិយោគ និងទេសចរផងដែររវាងប្រទេសទាំងពីរ ។ ទំហំពាណិជ្ជកម្មរវាង កម្ពុជានិងជប៉ុនបានកើនឡើងជាលំដាប់ ហើយ សម្ដេចចង់ឃើញទំហំពាណិជ្ជកម្មរវាងប្រទេសទាំងពីរបន្តមានការរីកចម្រើនថែមទៀត រួមទាំងការបណ្ដាក់ទុនពីវិនិយោគិនជប៉ុននៅកម្ពុជានៅពេលខាងមុខ ។
ជប៉ុន ក៏បានផ្ដល់ជំនួយលើវិស័យយោធាដល់កម្ពុជា ក្នុងការបណ្ដុះបណ្ដាលយោធាកម្ពុជានៅប្រទេសជប៉ុន គឺជាលើកដំបូងសម្រាប់កម្ពុជា ។កម្ពុជានៅតែបន្តអនុវត្តនីតិរដ្ឋ ដើម្បីពង្រឹងប្រជាធិបតេយ្យនៅព្រះរាជាណាចក្រកម្ពុជា ហើយអ្វីដែលជាអាទិភាពរបស់រាជរដ្ឋាភិបាលគឺការរក្សាសន្តិភាពឲ្យបានពេញលេញ ។
ដំណើរការលទ្ធិប្រជាធិបតេយ្យនៅកម្ពុជា នឹងបន្តឡើងទៅមុខ។ លោកឯកអគ្គរាជទូតជប៉ុន បញ្ជាក់ជូនសម្ដេចតេជោថា ជប៉ុននៅតែបន្តផ្ដល់ជំនួយលើវិស័យដោះមីនដល់កម្ពុជា និងយុទ្ធភណ្ឌមិនទាន់ផ្ទុះ ។ ជប៉ុនក៏ចាប់អារម្មណ៍ទៅលើការផ្ដល់ជំនួយលើវិស័យអគ្គិសនីនៅកម្ពុជា រួមទាំងបន្តធ្វើផែនការមេសម្រាប់អភិវឌ្ឍន៍កំពង់ផែខេត្តព្រះសីហនុ ។
សម្ដេចតេជោ អរគុណដល់ជប៉ុនដែលបានជួយលើវិស័យដោះមីននៅកម្ពុជា និងបានគូសបញ្ជាក់ថា ការដោះមីននិងយុទ្ធភណ្ឌមិនទាន់ផ្ទុះនៅតែបន្ត បើទោះបីជាមានការធ្លាក់ចុះចំនួនមីនក៏ដោយ ។ ការងារនេះនៅតែជាការងារអាទិភាពរបស់រាជរដ្ឋាភិបាលកម្ពុជា ៕
ចែករំលែកព័តមាននេះ