រាជធានីភ្នំពេញ ៖ រថយន្តទ្រុងម៉ាកហ៊ីយ៉ាន់ដាយដឹកទឹកកក១គ្រឿងបានបើកបរបោះពួយក្នុងល្បឿនលឿនហើយបានជ្រុលទៅបុកជាមួយរថយន្តម៉ាកស្តាតិច១គ្រឿងទៀតដែលកំពុងឆ្លងផ្លូវបណ្ដាលឲ្យរថយន្តម៉ាកស្តារិចនោះរ៉េចង្កូតខ្ទាតជ្រុលទៅបុករុញម៉ូតូ១គ្រឿងម៉ាកហុងដាឌ្រីមសេ១២៥ផ្ទប់ជាមួយរថយន្តម៉ាកសាំយ៉ងដឹកសិស្ស១គ្រឿងទៀតដែលកំពុងឆ្លងផ្លូវដែរបណ្ដាលឲ្យរបួសស្ត្រីអ្នកជិះម៉ូតូម្នាក់ធ្ងន់ធ្ងរ និងត្រូវបានក្រុមគ្រួសារដឹកតាមម៉ូតូឌុបបញ្ជូនទៅសង្គ្រោះបន្ទាន់ភ្លាមផងដែរ ។
ឧប្បត្តិហេតុនេះបានកើតឡើងកាលពីវេលាម៉៨ព្រឹកថ្ងៃទី២៤ ខែតុលា ឆ្នាំ២០១៩ នៅលើកំណាត់ផ្លូវជាតិលេខ៤ ត្រង់ចំណុចមុខច្រកចូលផែស្ងួតអូល័រ វើលវ៉ាយ ស្ថិតនៅក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះឈ្មោះ តាំង សុគន្ធា អាយុ៤៥ឆ្នាំ មុខរបរកម្មការិនីរោងចក្រ មានទីលំនៅក្នុងភូមិព្រៃកំបុត សង្កាត់ចោមចៅ២ ខណ្ឌពោធិ៍សែនជ័យ រងរបួសបែកមុខ និងដាច់ម្រាមដៃខាងឆ្វេងអស់២ ហើយគាត់គឺជាអ្នកជិះម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០០៥ ពណ៌ខ្មៅ គ្មានស្លាកលេខ ។ ចំណែករថយន្តទ្រុងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3A-5982 ដឹកទឹកសុទ្ធ និងទឹកកក បានបុករថយន្តម៉ាកស្តារិច ពណ៌ទឹកប្រាក់ ពាក់ស្លាកលេខ ភ្នំពេញ 2AH-1416 រីឯរងយន្តសាំយ៉ុងដឹកសិស្ស ពណ៍ស ពាក់ស្លាកលេខ ភ្នំពេញ 2AA-3018 ។
តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្តហ៊ីយ៉ាន់ដាយទ្រុងដឹកទឹកសុទ្ធ និងទឹកកក បានបើកបរធ្វើដំណើរតាមបណ្តោយផ្លូវជាតិលេខ៤ ក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុខាងលើបានបុកជាមួយរថយន្តស្តារិច ដែលកំពុងបើកបរឆ្លងផ្លូវជាតិលេខ៤ ក្នុងទិសដៅពីជើងទៅត្បូងបណ្ដាលឲ្យរថយន្តស្តារិចនោះជ្រុលទៅបុកម៉ូតូរបស់ស្ត្រីរងគ្រោះដែលបើកបរឆ្លងផ្លូវជាតិលេខ៤ក្នុងទិសដៅពីត្បូងទៅជើង ។
ព្រមទាំងរុញទៅបុកផ្ទប់ជាមួយរថយន្តដឹកសិស្សម៉ាកសាំយ៉ុងដែលកំពុងបើកបម្រុងឆ្លងផ្លូវក្នុងទិសដៅពីត្បូងទៅជើងស្របជាមួយម៉ូតូដែរ ។ ក្រោយកើតហេតុរថយន្តទាំង៣គ្រឿងរួមជាមួយម៉ូតូហុងដាឌ្រីមបានរងការខូចខាតយ៉ាងដំណំ ចំណែកស្ត្រីរងគ្រោះបានរងរបួសធ្ងន់ធ្ងរ និងត្រូវបានក្រុមគ្រូសារដឹកតាមម៉ូតូឌុបយកទៅពេទ្យដោយខ្លួនឯង ។ បន្ទាប់មកនគរបាលចរាចរណ៍ខណ្ឌពោធិ៍សែនជ័យបានចុះទៅធ្វើការវាស់វែង និងនាំយករថយន្តនិងម៉ូតូទៅរក្សាទុករង់ចាំការដោះស្រាយតាមច្បាប ៕
កែសម្រួលដោយ ៖ សំណាង
ចែករំលែកព័តមាននេះ