រាជធានីភ្នំពេញ ៖ រដ្ឋាភិបាលប្រទេសគុយបា បានអរគុណកម្ពុជាជាថ្មីដែលគាំទ្រដល់ការដកទណ្ឌកម្មសេដ្ឋកិច្ចអាមេរិកមកលើគុយបា ។ ការអរគុណរបស់ប្រទេសគុយបា ជាថ្មីម្តងទៀត តាមរយៈលោក ជួន ដឺ ជេហ្សឹស ហីដាល់ហ្គូ ហ្គាតូ ប៉េរ៉េស (H.E. Mr. Juan de Jesús Hidalgo-Gato Péres) ឯកអគ្គរាជទូតនៃសាធារណរដ្ឋគុយបា ប្រចាំព្រះរាជាណាចក្រកម្ពុជា ដែលត្រូវបានចប់អាណត្តិក្នុងជំនួបសម្តែងការគួរសម និងជម្រាបលាសម្តេចហេង សំរិន ប្រធានរដ្ឋសភា នាព្រឹកថ្ងៃទី២៤ តុលានេះ នៅវិមានរដ្ឋសភា នៅព្រឹកថ្ងៃទី២៤ ខែតុលា មុនពេលដែលលោកត្រូវចាកចេញពីកម្ពុជា ខណៈដែលការបំពេញបេសកកម្មការទូតនៅកម្ពុជាបានបញ្ចប់ គឺបញ្ចប់ដោយជោគជ័យ ។
ក្នុងជំនួបទ្វេភាគីលោកទូតប្រទេសគុយបា បានថ្លែងអំណរគុណចំពោះកម្ពុជាដែលបានគាំទ្រដល់ការដកទណ្ឌកម្មសេដ្ឋកិច្ចរបស់អាមេរិកមកលើប្រទេសគុយបា ។ លោកក៏បានវាយតម្លៃខ្ពស់ចំពោះមិត្តភាព និងកិច្ចសហប្រតិបត្តិការដ៏ល្អរវាងប្រទេសទាំងពីរកម្ពុជា-គុយបាទាំងនៅស្ថាប័ននីតិប្បញ្ញត្តិ និងនីតិប្រតិបត្តិ ។ ជាមួយគ្នានោះដែរ លោកទូតបានថ្លែងអំណរគុណយ៉ាងជ្រាលជ្រៅចំពោះសម្តេច ហេង សំរិន ប្រធានរដ្ឋសភាដែលបានគាំទ្ររដ្ឋាភិបាល និងប្រជាជនគុយបានៅគ្រប់កាលៈទេសៈ ។
លោកឯកអគ្គរដ្ឋទូតគុយបា ចប់អាណត្តិបានគូសបញ្ជាក់ថា ជោគជ័យនៅក្នុងបេសកកម្មការទូតរបស់ឯកឧត្តម គឺមានការគាំទ្រពីថ្នាក់ដឹកនាំស្ថាប័ននីតិប្បញ្ញត្តិ និងនីតិប្រតិបត្តិរបស់កម្ពុជា ដែលនៅក្នុងនោះមានសម្តេចអគ្គមហាពញាចក្រី ហេង សំរិន ផងដែរ ។ ក្នុងជំនួបនោះសម្តេច ហេង សំរិន បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងក្នុងអាណត្តិការទូតរបស់លោកដែលបានរួមចំណែកដ៏ធំធេងក្នុងការបន្តពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបត្តិការល្អរវាងប្រទេសទាំងពីរ កម្ពុជា-គុយបា ឲ្យកាន់តែរឹងមាំរីកចម្រើនជាបន្តបន្ទាប់ ។
សម្តេចប្រធានរដ្ឋសភាបានលើកឡើងថា គុយបាជាប្រទេសមួយនៅក្នុងចំណោមប្រទេសមិនច្រើនទេ លើពិភពលោកដែលធ្លាប់បានយកចិត្តទុកដាក់ និងជួយឧបត្ថម្ភគាំទ្រកម្ពុជា ក្រោយពីបានរំដោះពីរបបប្រល័យពូជសាសន៍ ប៉ុល ពត កាលពីជាង៤០ឆ្នាំមុនហើយក្នុងដំណាក់កាលជាបន្តបន្ទាប់ គុយបា ក៏បានបន្តរួមចំណែកដល់កាអភិវឌ្ឍន៍នៅកម្ពុជារហូតដល់បច្ចុប្បន្នធ្វើអោយកម្ពុជាចាត់ទុកគុយបាជាមិត្តដ៏ល្អនៅគ្រប់កាលៈទេសៈ ។
លោកជួន ដឺ ជេហ្សឹស ហីដាល់ហ្គូហ្គាតូ ប៉េរ៉េស បានស្នើសុំសម្តេចប្រធានរដ្ឋសភាគាំទ្រ ដល់បេសកកម្មការទូតរបស់ឯកអគ្គរដ្ឋទូតគុយបា ប្រចាំនៅកម្ពុជាក្នុងអាណត្តិក្រោយៗទៀត ៕ កែសម្រួលដោយ ៖ សុឃាក់
ចែករំលែកព័តមាននេះ