រាជធានីភ្នំពេញ ៖ ព្រឹទ្ធសភានៃព្រះរាជាណាចក្រកម្ពុជាបានប្រកាសគាំទ្រចំពោះការខិតខំរបស់រាជរដ្ឋាភិបាលក្នុងអភិវឌ្ឍន៍ប្រទេសជាតិនាពេលកន្លងមក និងយុទ្ធសាស្ត្របន្តបន្ទាប់នៅពេលខាងមុខ ។ ការគាំទ្រនេះ ធ្វើឡើង ខណៈព្រឹទ្ធសភាបានបើកកិច្ចប្រជុំពេញអង្គព្រឹទ្ធសភា ដើម្បីស្តាប់របាយការណ៍គណៈកម្មាធិការអចិន្ត្រៃយ៍ស្តីពីសកម្មភាពការងាររបស់ព្រឹទ្ធសភានៅចន្លោះសម័យប្រជុំលើកទី៣ និងលើកទី៤ ព្រឹទ្ធសភា នីតិកាលទី៤ ។
លោកម៉ម ប៊ុននាង សមាជិក និងអ្នកនាំពាក្យព្រឹទ្ធសភាបានឲ្យដឹងថា នៅព្រឹកថ្ងៃទី២៤ ខែតុលា ឆ្នាំ២០១៩ ព្រឹទ្ធសភានៃព្រះរាជាណាចក្រកម្ពុជាបានបើកសម័យប្រជុំលើកទី៤ ព្រឹទ្ធសភា នីតិកាលទី៤ ក្រោមអធិបតីភាពដ៏ខ្ពង់ខ្ពស់របស់ លោក ស៊ឹម កា ប្រធានស្តីទីព្រឹទ្ធសភានៃព្រះរាជាណាចក្រកម្ពុជាស្តាប់របាយការណ៍គណៈកម្មាធិការអចិន្ត្រៃយ៍ស្តីពីសកម្មភាពការងាររបស់ព្រឹទ្ធសភា នៅចន្លោះសម័យប្រជុំលើកទី៣ និងលើកទី៤ ព្រឹទ្ធសភា នីតិកាលទី៤ ។
អ្នកនាំពាក្យបានឲ្យដឹងថា ក្នុងសម័យប្រជុំមានសមាជិកព្រឹទ្ធសភាមានវត្តមានចំនួន៥៨រូប ។ លោកក៏បានឲ្យដឹងថា នៅក្នុងរយៈពេលបីខែនេះព្រឹទ្ធសភាបានប្រជុំគណៈកម្មាធិការអចិន្ត្រៃយ៍ចំនួន០៤លើក និងប្រជុំវិសាមញ្ញចំនួន០២លើក ដោយពិនិត្យ និងឱ្យយោបល់លើសេចក្តីព្រាងច្បាប់ចំនួន០៥ច្បាប់ ។ ព្រឹទ្ធសភាបានទទួលពាក្យបណ្តឹងចំនួន១៦ករណី ប្រជុំផ្ទៃក្នុងគណៈកម្មការចំនួន១០លើកចុះបេសកកម្មក្នុងប្រទេសចំនួន១០លើក បំពេញបេសកកម្មក្រៅប្រទេសចំនួន០៦លើក ចូលរួមសិក្ខាសាលា វេទិកា និងកិច្ចប្រជុំនានាចំនួន១៧៦លើក និងចូលរួមពិធីផ្លូវការផ្សេងៗចំនួន៣៥០លើក ព្រមទាំងចុះមូលដ្ឋានដោយឡែករៀងៗខ្លួនចំនួន១៩១លើក ។
លោកបន្តថា ក្រុមសមាជិកព្រឹទ្ធសភាប្រចាំភូមិភាគ និងក្រុមសមាជិកាព្រឹទ្ធសភាបានរៀបចំវេទិកា សាធារណៈចំនួន៣លើក នៅខេត្តពោធិ៍សាត់ ខេត្តត្បូងឃ្មុំ និងរាជធានីភ្នំពេញ ដើម្បីដោះ-ស្រាយបញ្ហាប្រឈម និងសំណូមពររបស់ក្រុមប្រឹក្សាឃុំ សង្កាត់ និងជីអណ្តូង ទឹកស្អាត ជីកស្រះទឹក ដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនប្រជាពលរដ្ឋនៅរាជធានីភ្នំពេញ ខេត្តកណ្តាល តាកែវ កំពត កែប ឧត្តរមានជ័យ ព្រះវិហារ កំពង់ធំ ប៉ៃលិន បាត់ដំបង និងខេត្តបន្ទាយមានជ័យ ព្រមទាំងចូលរួមក្នុងពិធីផ្សេងៗ ។
លោកបន្ថែមថា នៅក្នុងអំឡុងពេលចន្លោះសម័យប្រជុំលើកទី៣ និងលើកទី៤នេះ ក់ដឹកនាំគណៈកម្មាធិការអចិន្ត្រៃយ៍គណៈកម្មការ ក្រុមភូមិភាគនានា សមាជិក សមាជិកា ព្រឹទ្ធសភានីតិកាលទី៤ បានរួមគ្នាខិតខំបំពេញភារកិច្ចរៀងៗខ្លួនទាំងក្នុងប្រទេស និងក្រៅប្រទេសប្រកបដោយស្មារតីទទួលខុសត្រូវខ្ពស់ ហើយសម្រេចបានលទ្ធផលផ្លែផ្កា ជាគុណប្រយោជន៍ដល់ជាតិ និងប្រជាពលរដ្ឋ ។ លោកក៏បានលើកឡើងទៀតថា ព្រឹទ្ធសភា សូមសម្តែងនូវការដឹងគុណយ៉ាងជ្រាលជ្រៅចំពោះការគាំទ្រដ៏ថ្លៃថ្លាពីគ្រប់មជ្ឈដ្ឋាន និងគ្រប់ស្ថាប័ន ដែលញុំាងឱ្យព្រឹទ្ធសភាដំណើរការទៅមុខដោយរលូន និងល្អប្រពៃ ៕ កែសម្រួលដោយ ៖ សុឃាក់
ចែករំលែកព័តមាននេះ