ខេត្តកំពង់ធំ ៖ បុរសម្នាក់ស្លាប់នៅនឹងកន្លែងកើតហេតុ ចំណែកបុរសម្នាក់ទៀតបានរងរបួសធ្ងន់ ត្រូវគេបញ្ជូនទៅសង្គ្រោះនៅមន្ទីរពេទ្យឯរាជធានីភ្នំពេញ បន្ទាប់ពីជនរងគ្រោះទាំង២នាក់ជួបគ្រោះថ្នាក់ចរាចរណ៍រវាងម៉ូតូមួយគ្រឿងបុកជាមួយរថយន្តយីឌុបមួយគ្រឿងក្នុងទិសដៅបញ្ច្រាសគ្នា ។
ហេតុការណ៍ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី២៣ ខែតុលា ឆ្នាំ២០១៩ លើកំណាត់ផ្លូវជាតិលេខ៦ ស្ថិតក្នុងភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ ។
ភាគីខាងម៉ូតូមួយគ្រឿងជិះគ្នា២នាក់ ម៉ាកហុងដាឌ្រីម ធុនC125 ពណ៌ខ្មៅ ពាក់ផ្លាកលេខ កំពង់ធំ ១J-៤៨៦៥ បើកបរដោយឈ្មោះ ជុំ ចាន់សំណាង ភេទប្រុស អាយុ១៦ឆ្នាំ រងរបួសធ្ងន់ និងអ្នករួមដំណើរម្នាក់ឈ្មោះ សែន ចាន់រ៉ុង ភេទប្រុស អាយុ១៦ឆ្នាំ ជាសិស្ស បានស្លាប់នៅកន្លែងកើតហេតុ ។ ជនរងគ្រោះទាំងពីររស់នៅភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ ។
ចំណែកភាគីខាងរថយន្តយីឌុបមួយគ្រឿងម៉ាក FUSU ពណ៌ក្រហម ពាក់ផ្លាកលេខ ភ្នំពេញ៣C-០៩៣១ មានសណ្តោងស៊ឺមីរ៉ឺម៉ក ពណ៌សលាយខៀវ គ្មានស្លាកលេខ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។
ក្រោយពេលកើតហេតុ រថយន្ត និងម៉ូតូត្រូវបានសមត្ថកិច្ចយកមករក្សាទុកនៅប៉ុស្តិ៍រដ្ឋបាលស្រយ៉ូវ ដើម្បីរង់ចាំធ្វើការដោះស្រាយគ្នាពេលក្រោយ ។ ចំណែកសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ