សម្តេចនាយករដ្ឋមន្ត្រីប្រកាសដកថ្លៃសេវាសំរាមចេញពីវិក្កយបត្រភ្លើង…
- ភ្នំពេញ
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានសម្រេចដកវិក្កយបត្រថ្លៃសំរាមចេញពីវិក្កយបត្រថ្លៃភ្លើង ចាប់ពីខែមករា ឆ្នាំ២០២០តទៅ ។ សម្តេចតេជោ…
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានសម្រេចដកវិក្កយបត្រថ្លៃសំរាមចេញពីវិក្កយបត្រថ្លៃភ្លើង ចាប់ពីខែមករា ឆ្នាំ២០២០តទៅ ។ សម្តេចតេជោ ហ៊ុន សែន បានសរសេរលើបណ្តាញសង្គម កាលពីល្ងាចថ្ងៃទី២២ ខែតុលាថា ដោយក្តាប់បាននូវការលំបាករបស់បងប្អូនប្រជាពលរដ្ឋនៅរាជធានីភ្នំពេញ អំពីការដាក់ថ្លៃសេវាប្រមូលសំរាមក្រុមហ៊ុនស៊ីនទ្រី ក្នុងវិក្កយបត្ររបស់អគ្គិសនីកម្ពុជា ល្ងាចថ្ងៃនេះខ្ញុំបានសម្រេចតាមសំណើរបស់អគ្គិសនីកម្ពុជា ដោយដកថ្លៃសេវាប្រមូលសំរាមចេញពីវិក្កយបត្រថ្មីរបស់អគ្គិសនីកម្ពុជា ចាប់ពីថ្ងៃទី១ ខែមករា ឆ្នាំ២០២០តទៅ ។
សម្តេចតេជោបន្តថា យន្តការយកថ្លៃសេវាប្រមូលសំរាមទៅថ្ងៃមុខនឹងត្រូវប្រើយន្តការផ្សេងជំនួសវិញ ដែលកិច្ចការនេះខ្ញុំបានប្រគល់ភារកិច្ចជូនលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ធ្វើការប្រជុំ និងដោះស្រាយ ។ជាមួយគ្នានេះ សម្តេចតេជោក៏បានសូមឲ្យបងប្អូនប្រជាពលរដ្ឋជាទីស្រឡាញ់ មេត្តាជ្រាបជាព័ត៌មានផងដែរ ។
សួមជម្រាបថា កាលពីថ្ងៃទី២២ ខែតុលា ក្នុងពិធីប្រគល់សញ្ញាបត្រដល់និស្សិតបញ្ចប់ការ សិក្សានៅសាកលវិទ្យាល័យបៀប្រាយ សម្តេចតេជោនាយករដ្ឋមន្ត្រី បានសម្រេចដកហួតយកក្រុមហ៊ុនស៊ីនទ្រីទៅជាក្រុមហ៊ុនរដ្ឋ រួចហើយធ្វើការសងថ្លៃខូចខាតដល់ក្រុមហ៊ុនផងដែរ ពោលគឺមិនឲ្យក្រុមហ៊ុនខាតបង់នោះទេ ។
សម្តេចតេជោបានឲ្យដឹងថា ចំពោះបញ្ហាសំរាមនេះ សម្តេចបានផ្តល់យោបល់ដោយ សម្រេចបែងចែកជាតំបន់ៗ ក្នុងការដេញថ្លៃពីសំណាក់ក្រុមហ៊ុននានា ដោយមិនអនុញ្ញាតឲ្យមានតែក្រុមហ៊ុនមួយនោះទេ គឺអាចមានក្រុមហ៊ុន៣ទៅ៤ ក្នុងការចូលរួមដេញថ្លៃ ដើម្បីកុំឲ្យមានការកកស្ទះ ឬមានបញ្ហាសំរាមទៀត ។
សម្តេចបន្តថា បើមានតែក្រុមហ៊ុនមួយដដែលទោះបីជាក្រុមហ៊ុនស៊ីនទ្រីខិតខំធ្វើយ៉ាងណាក៏មិនអាចប្រមូលសំរាមអស់ដែរ ព្រោះថាឥឡូវទីក្រុងភ្នំពេញមានទំហំធំជាងមុន ហើយសំរាមក៏មានច្រើនជាងមុនដែរ ៕
ចែករំលែកព័តមាននេះ