ខេត្តកំពង់ចាម ៖ គ្រួសារមួយមានគ្នាសរុបចំនួន៥នាក់ រួមទាំងកូននៅក្នុងផ្ទៃផង ពិតជាជីវិតទីទ័លក្រតោកយ៉ាកបំផុតមែន បានសម្រេចចិត្តមកសង់ផ្ទះធ្វើពីឫស្សី ជញ្ជាំងធ្លុះធ្លាយពីម្ខាងទៅម្ខាង ដោយសារតែមានជីវភាពក្រីក្របានរុញច្រានមកនៅក្រោមស្ពានដោយយកស្ពានធ្វើដំបូល ។ ខ្ទមតូចចង្អៀត…
ខេត្តកំពង់ចាម ៖ គ្រួសារមួយមានគ្នាសរុបចំនួន៥នាក់ រួមទាំងកូននៅក្នុងផ្ទៃផង ពិតជាជីវិតទីទ័លក្រតោកយ៉ាកបំផុតមែន បានសម្រេចចិត្តមកសង់ផ្ទះធ្វើពីឫស្សី ជញ្ជាំងធ្លុះធ្លាយពីម្ខាងទៅម្ខាង ដោយសារតែមានជីវភាពក្រីក្របានរុញច្រានមកនៅក្រោមស្ពានដោយយកស្ពានធ្វើដំបូល ។
ខ្ទមតូចចង្អៀត ទំហំប្រហែល៣ម៉ែត្របួនជ្រុង ស្ថិតនៅក្រោមគល់ស្ពានបេតុងគៀនជ្រៃ ឃុំគៀនជ្រៃ ស្រុកកំពង់សៀម ។ ពាក្យចាស់ពោលថា «ទៀងមិនឈ្នះទាល់» ហើយការមករស់នៅក្រោមស្ពាននេះមិនមែនជាគ្រួសារមិនចង់មានផ្ទះជ្រកដូចគេឯងនោះទេ តែគ្មានលុយគ្មានដីបានក្លាយជាមនុស្សរស់នៅក្រោមស្ពានបែបនេះខុសគេអុីចឹងទៅ ។
ស្ត្រីឈ្មោះ ជូ ស្រីមុំ វ័យ៣១ឆ្នាំ បានប្រាប់ឲ្យដឹងនៅព្រឹកថ្ងៃទី២២ តុលាថា គាត់មករស់នៅលើផ្ទះឈើតូចជាមួយនឹងម្តាយចំណាស់ ជាស្ត្រីមេម៉ាយដែលនៅជាប់មាត់ព្រែកក្នុងអតីតឡូត៍នេសាទលេខ១ ។ គាត់ថាដោយផ្ទះតូចចង្អៀតពេកពិបាកនិងរស់នៅក៏បានសម្រេចចិត្ត ឲ្យប្តីមកធ្វើផ្ទះនៅក្រោមស្ពានគៀនជ្រៃ ធ្វើពីឫស្សីទាំងអស់និងបានរស់នៅជិត២ឆ្នាំហើយ ព្រោះតែក្រមិនមានលុយទិញដីធ្វើផ្ទះនឹងគេ ។
ស្ត្រីរូបនេះបានប្រាប់បន្តថា គាត់មានកូនប្រុសចំនួន២នាក់ រួមនិងកូនក្នុងផ្ទៃ២ខែម្នាក់ទៀតឡើងដល់ទៅ៣នាក់ ក្នុងនោះកូនបងអាយុ៥ឆ្នាំ រៀនថ្នាក់មត្តេយ្យ ហើយប្តីវិញនៅព្រឹកថ្ងៃទី២២ តុលា បានចេញទៅធ្វើកម្មករពត់ដែកអេតចាយឲ្យគេ ក្នុង១ថ្ងៃបានប្រាក់២ម៉ឺនរៀលនៅកន្លែងទិញអេតចាយមួយក្នុងក្រុងកំពង់ចាម ។ កម្រៃដែលបានមកដោះស្រាយជីវភាពទាំងលំបាកលំបិន ។
គាត់រៀបរាប់ថា មូលហេតុដែលនាំគ្នាមកសង់ផ្ទះនៅក្រោមស្ពាន ដោយសារតែមិនមានដីនៅ ហើយច្រាំងទន្លេចេះតែបន្តបាក់រាល់ឆ្នាំមិនអាចរស់នៅតាមច្រាំងទន្លេបានទេ ។ ក្នុងក្តីស្រមៃការគិតរបស់គាត់នោះ គឺចង់បានផ្ទះតូចល្មមមួយ សម្រាប់ជាកន្លែងជ្រកកោនឱ្យបានសមរម្យ ប្រសិនបើមានសប្បុរសជនជួយគាត់សប្បាយចិត្តណាស់ ព្រោះការរស់នៅក្រោមស្ពាននេះមិនចង់នៅប៉ុន្មានទេ ព្រោះរដូវទឹកសម្រកតែងបានហូរច្រោះដីដល់គ្រឹះសសរស្ពាន ធ្វើឲ្យអ្នកគៀនជ្រៃមានក្តីកង្វល់គ្រប់ៗគ្នា ។
លោកស្រី អ៊ា ចាន់ថុល មេឃុំគៀនជ្រៃ ប្រាប់ថា ស្ត្រីដែលជាម្តាយរបស់ស្រីមុំ ពីអតីតកាលមានផ្ទះរស់នៅជាប់នឹងគល់ស្ពានគៀនជ្រៃ ។ ប៉ុន្តែដោយសារច្រាំងទន្លេបានបាក់កន្លងមក ពេលរុះរើផ្ទះ ត្រូវបានក្រុមការងារមូលដ្ឋានចុះមកជួយរុះរើហើយថែមទាំងជូនលុយបន្ថែមទៀត ដាក់មករស់នៅកៀកនិងគល់ស្ពាន ។
លោកស្រីមេឃុំបានទទួលស្គាល់ថា ស្ត្រីដែលរស់នៅក្រោមស្ពានគៀនជ្រៃនេះពិតជាមានជីវភាពក្រីក្រមែន ។ ដោយឃើញការលំបាកនេះ គាត់បានសុំដីវត្តគៀនជ្រៃក្រៅបាន១កន្លែង ហើយក៏នឹងសុំឈើចាស់ៗនៅវត្តដើម្បីសង់ផ្ទះជូនគ្រួសារក្រីក្រនេះ ។ លោកស្រីមេឃុំបន្តថា លោកស្រីក៏មានបំណងសុំដល់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ដែលជាប្រធានក្រុមការងារចុះជួយស្រុកកំពង់សៀម ក្នុងបំណងសុំឲ្យជួយសង់ផ្ទះឲ្យគ្រួសារនេះដែរ ប៉ុន្តែមិនទាន់ដឹងថាយ៉ាងណាទេ ព្រោះជាបំណង ។
លោកស្រីក៏ធ្លាប់បានឲ្យគ្រួសារនេះចាកចេញពីក្រោមស្ពានគៀនជ្រៃ ដោយមិនអនុញ្ញាតឲ្យរស់នៅក្នុងសភាពដូច្នេះទេ ប៉ុន្តែមិនទាន់ធ្វើបាន ។ លោកស្រីមេឃុំថា កន្លងមកឲ្យតែមានចែកអំណោយដល់ជនក្រីក្រ គ្រួសារនេះតែងតែបានទទួលរាល់លើកមិនដែលអាក់ខានម្តងណាទេ ព្រោះអាណិតដែរ ប៉ុន្តែមិនមានលទ្ធភាពជួយបានភ្លាមៗ ។
ព័ត៌មានចុងក្រោយ តាមរយៈទូរស័ព្ទ លោករដ្ឋមន្ត្រី វេង សាខុន បានប្រាប់កោះសន្តិភាពថា លោកបានបញ្ជាឱ្យក្រុមការងាររបស់លោកដែលចុះជួយស្រុកកំពង់សៀមចាត់ចែងសង់ផ្ទះជូនគ្រួសារនេះក្នុងពេលឆាប់ៗនេះហើយ ៕
ចែករំលែកព័តមាននេះ