ខេត្តបន្ទាយមានជ័យ ៖ កម្មកររាប់រយនាក់នៅរោងចក្រកាត់ដេរសម្លៀកបំពាក់យីហោ អឹមអិលអ៊ិនធីមេតអឹភែរីល «ML INTIMATE APPAREL (CAMBODIA )LTD» ដែលមានថៅកែជាជនជាតិចិន…
ខេត្តបន្ទាយមានជ័យ ៖ កម្មកររាប់រយនាក់នៅរោងចក្រកាត់ដេរសម្លៀកបំពាក់យីហោ អឹមអិលអ៊ិនធីមេតអឹភែរីល «ML INTIMATE APPAREL (CAMBODIA )LTD» ដែលមានថៅកែជាជនជាតិចិន ហើយរោងចក្រមួយនេះស្ថិតក្នុងតំបន់ឧស្សាហកម្មអូរនាង ក្រុងប៉ោយប៉ែត បានផ្ទុះការតវ៉ាទាមទារឲ្យក្រុមហ៊ុនមួយបើកប្រាក់ពលកម្មពួកគាត់ឲ្យបានទៀងទាត់ ព្រោះមិនអាចដោះស្រាយជីវភាពគ្រួសារបាន។
ការតវ៉ានេះធ្វើឡើងតាំងពីម៉ោងប្រហែល៥ល្ងាចថ្ងៃទី២២ តុលា ឆ្នាំ២០១៩ រហូតដល់វេលាម៉ោងជាង៧យប់ថ្ងៃដដែល ទើបក្រុមកម្មករខាងលើត្រឡប់ទៅវិញ។
តាមប្រភពពីក្រុមកម្មករបានលើកឡើងថា ដោយសារប្រាក់កម្រៃការងារពួកគាត់ដែលត្រូវបើក១ខែ២ដង បែរជាបើករហូត៤ដងខុសពីគោលការណ៍ដែលក្រសួងបានកំណត់ ព្រោះតែថៅកែរោងចក្រព្យាយាមលើក ឬពន្យារពេលថ្ងៃនេះថ្ងៃនោះ ។ សំខាន់ពួកគាត់មិនអាចដោះស្រាយជីវភាពគ្រួសារបានទើបនាំគ្នាតវ៉ាតែម្តង។
តាមប្រភពពីក្រុមកម្មករបានបន្តថា រោងចក្រកាត់ដេរសម្លៀកបំពាក់យីហោ «អឹមអិលអ៊ិនធីមេតអឹភែរីល» នេះគឺពិបាកបើកប្រាក់ការងារជាច្រើនខែមកហើយ ។ ដោយក្រុមកម្មករលើកឡើងពីផលលំបាកថា ពួកគាត់សុទ្ធតែជំពាក់ប្រាក់កម្ចីរបស់ធនាគារ ម្យ៉ាងត្រូវការចំណាយទៅលើថ្លៃហូបចុក និងបង់ថ្លៃផ្ទះជួល ចំណែកអ្នកខ្លះមានកូនតូចត្រូវការទិញចំណីអាហារឲ្យកូនៗ ហើយបើថៅកែរោងចក្របើកប្រាក់ពលកម្មមិនទៀងទាត់បែបនេះតើឲ្យពួកគាត់សង្ឃឹមអ្វី។ ពួកគាត់បានទទូចសុំអាជ្ញាធរខេត្ត ពិសេសក្រសួងការងារសូមជូយពិនិត្យបញ្ហានេះផង។
ក្រុមកម្មករនិយាយថា តាមច្បាប់ការងាររបស់ក្រសួងគឺតម្រូវឲ្យថៅកែរោងចក្របើកប្រាក់ការងារឲ្យកម្មករក្នុង១ខែ២ដង ប៉ុន្តែពួកគាត់ថា រោងចក្រកាត់ដេរខាងលើមិនបានគោរពតាមគោលការណ៍របស់ក្រសួងនើទេ។ ផ្ទុយទៅវិញ ថៅកែរបស់ពួកគាត់បើកប្រាក់ការងារឲ្យមិនទៀងទាត់ឡើយ ពោលគឺ១ខែបើកឲ្យរហូត៤ដង ហើយពេលខ្លះបើកប្រាក់ខែឲ្យមិនគ្រប់ទៀតផង។ ពួកគាត់ថា ថ្ងៃនេះដល់ពេលដែលត្រូវបើកប្រាក់ការងារហើយ តែថៅកែបានលើកពេលសុំបើកឲ្យនៅថ្ងៃសុក្រវិញ។ មុនពេលបែកគ្នានៅវេលាយប់ដដែលនេះក្រុមកម្មករនិយយាថា បើចាប់ពីថ្ងៃស្អែកទៅ ថៅកែមិនបើកប្រាក់ខែឲ្យទេ ពួកគាត់នឹងលើកគ្នាទៅឈរតវ៉ាមុខរោងចក្ររាល់ថ្ងៃ ហើយមិនចូលធ្វើការទៀតផង។
ពាក់ព័ន្ធនឹងករណីខាងលើនេះ កោះសន្តិភាពមិនទាន់អាចរកការបកស្រាយបំភ្លឺពីតំណាងរោងចក្រខាងលើបាននៅឡើយទេ ព្រោះមិនស្គាល់លេខទូរស័ព្ទ ម្យ៉ាងទៀតជាពេលយប់ទៅហើយ។
ជុំវិញករណីខាងលើនេះ លោកគាត ហ៊ុល អភិបាលនៃគណៈអភិបាលក្រុងប៉ោយប៉ែត បានប្រាប់តាមទូរស័ព្ទថា ក្រុមកម្មករបានរំសាយវិញហើយ ។ លោកបន្តថា លោកប្រធានមន្ទីរការងារខេត្តបាននឹងកំពុងចុះទៅចំណុចកើតហេតុដើម្បីជួបជាមួយថៅកែរោងចក្រខាងលើរកដំណោះស្រាយផងដែរ ។
ទីបំផុតការតវ៉ាទាមទារបើកប្រាក់ការងាររបស់ក្រុមកម្មករនៅរោងចក្រខាងលើនេះត្រូវបានបញ្ចប់យ៉ាងរលូន ហើយតំណាងរោងចក្រ និងកម្មករយល់ព្រមទទួយកតាមលក្ខខណ្ឌរៀងៗខ្លួន ។ ដោយខាងរោងចក្រសន្យាបើកប្រាក់ឲ្យកម្មករនៅថ្ងៃស្អែក ហើយក្រុមកម្មករក៏ព្រមចូលបំរើការងារជាធម្មតា។
គួរបញ្ជាក់ថា មុនការតវ៉ារបស់ក្រុមកម្មកររោងចក្រខាងលើនេះបានបញ្ចប់កាលពីយប់ថ្ងៃទី២២ តុលា ឆ្នាំ២០១៩ លោករស់ សារ៉ុម ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត បានដឹកនាំក្រុមការងារចុះដល់កន្លែងកើតហេតុជួបជាមួយថៅកែរោងចក្រសាកសួរនិងស្វែងរកដំណោះស្រាយ។
នៅព្រឹកថ្ងៃទី២៣ តុលានេះ លោករស់ សារ៉ុម រួមជាមួយលោកគាត ហ៊ុល អភិបាលនៃគណៈអភិបាលក្រុងប៉ោយប៉ែតបានដឹកនាំក្រុមការងារជួបប្រជុំរកដំណោះស្រាយជាមួយតំណាងរោងចក្រ និងតំណាងក្រុមកម្មករនៅសាលប្រជុំមួយក្នុងតំបន់ឧស្សាហកម្មអូរនាង ។ លោកក៏បានលើកឡើងប្រាប់កម្មករថា ក្រុមមន្ត្រីរបស់លោកមានប្រចាំការតាមតំបន់ឧស្សាហកម្ម ហើយបើមានបញ្ហាណាមួយកើតឡើង ត្រូវជួបជាមួយមន្ត្រីតំណាងក្រសួងការងារ ឬជួបតំណាងរោងចក្រចៀសវាងធ្វើអ្វីមួយដែលខុសច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ