រាជធានីភ្នំពេញ ៖ ក្នុងពេលកម្ពុជាកំពុងព្រួយបារម្ភពីការបាត់បង់ប្រព័ន្ធអនុគ្រោះពន្ធ ដែលផ្ដល់ដោយសហភាពអឺរ៉ុបដែលហៅថាគ្រប់យ៉ាងលើកលែងតែអាវុធ (Everything But Arms-EBA) បណ្ដាប្រទេសសមាជិកសហភាពអឺរ៉ុបមួយចំនួន ក៏បានសន្យាជួយការពារមិនអោយសហភាពអឺរ៉ុបដកប្រព័ន្ធអនុគ្រោះពន្ធ EBA នេះដែរ ។
នៅក្នុងជំនួបរវាងលោក ប្រាក់សុខុន ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេស, លោក Kreso Glavac ឯកអគ្គរដ្ឋទូតក្រូអាត ប្រចាំប្រទេសកម្ពុជា ដែលចប់អាណត្តិបានប្ដេជ្ញាការពារមិនអោយសហភាពអឺរ៉ុបដកប្រព័ន្ធអនុគ្រោះលើមុខទំនិញគ្រប់ប្រភេទពីកម្ពុជា ។
លោក Kreso Glavac បានបន្តថា ឆ្នាំ២០២០ខាងមុខនេះក្រូអាតនឹងក្លាយជាប្រធានប្តូរវេននៃសហភាពអឺរ៉ុប ដូច្នេះក្រូអាតអាចមានសិទ្ធិលើកឡើងពីបញ្ហា EBA ដែលអឹរ៉ុបកំពុងពិចារណាដកពីកម្ពុជា ។ ហើយបើសិនជាកម្ពុជា មានបញ្ហាអ្វីក៏ដោយជាមួយសហភាពអឺរ៉ុប ក៏ក្រូអាតនៅតែបន្តពង្រឹងទំនាក់ទំនងរវាងប្រទេសទាំងពីរ អោយកាន់តែរឹងមាំ ។
បើតាមលោក កេត សោផាន់ អ្នកនាំពាក្យក្រសួងការបរទេស បានមានប្រសាសន៍ថា ឯកអគ្គរដ្ឋទូតលើកឡើងថា ថ្មីត្បិតតែក្រូអាតជាប្រទេសតូចក៏ពិតមែន ប៉ុន្តែមានបេះដូងបើកទូលាយ គឺជាមិត្តដ៏ល្អរបស់កម្ពុជា ។ ដើម្បីធានាទំនាក់ទំនងការទូតកម្ពុជា-ក្រូអាត គឺបានឯកភាពរៀបចំពិធីចុះហត្ថលេខា បើកការពិគ្រោះយោបល់នយោបាយការទូត ក្នុងការបង្កើនកិច្ចសហប្រតិបត្តិការ ដោយត្រៀមកំណត់គោលដៅ នៃពាណិជ្ជកម្ម សេដ្ឋកិច្ចរវាងប្រទេសទាំង២។ ក្រូអាតនឹងក្លាយជាប្រធាន ប្ដូរវេន នៃសភាពអឺរ៉ុប ចាប់ពីខែមករា ដល់ខែកក្កដា ឆ្នាំ២០២០។
តាមអ្នកនាំពាក្យខាងលើ, ឯកអគ្គរដ្ឋទូត បានបញ្ជាក់យ៉ាងច្បាស់ថា កម្ពុជាមានមិត្តភក្ដិនៅក្នុង EU ហើយក្រូអាតជាមិត្តភក្ដិដ៏ល្អរបស់ EU ។ ក្រូអាតនឹងគាំទ្រកម្ពុជា នៅពេលដែលកម្ពុជាមានបញ្ហាជាមួយ EU ។ ក្រូអាតនឹងខិតខំពន្យល់សមាជិក EU ផ្សេងទៀតក្នុងពេលដែលមានបញ្ហាលើកឡើងពាក់ព័ន្ធជាមួយកម្ពុជា ។
សូមបញ្ជាក់ថា ប្រទេសដែលទទួលបានការអនុគ្រោះពន្ធ លើគ្រប់មុខទំនិញ លើកលែងសព្វាវុធ ពីសហភាពអឺរ៉ុបមាន៤៩ប្រទេស ។ ក្នុងនោះបណ្ដាប្រទេសនៅអាហ្វ្រិក មានចំនួនច្រើនជាងគេ។ ក្នុងករណីសហភាពអឺរ៉ុបសម្រេចជាផ្លូវការដក EBA ពីកម្ពុជា សម្ដេចតេជោ ហ៊ុន សែន ប្រមុខរាជរដ្ឋាភិ បាលកម្ពុជា អះអាងថា ទីផ្សារអឺរ៉ុប នៅតែបើកចំហ សម្រាប់កម្ពុជាដដែល ប៉ុន្តែគ្រាន់តែមានបន្ថែមតម្លៃពន្ធដារមួយចំនួនប៉ុណ្ណោះ ។ កម្ពុជាត្រូវតែខិតខំកសាង អភិវឌ្ឍន៍ខ្លួនឲ្យរួចផុតពីភាពក្រីក្រ ដើម្បីមានកម្លាំងសេដ្ឋកិច្ចរឹងមាំ នៅពេលនោះហើយ EBA ក៏នឹងត្រូវដកចេញជាស្វ័យប្រវត្តិ ។ ការផ្តល់នូវប្រព័ន្ធអនុគ្រោះពាណិជ្ជកម្ម EBA គឺសម្រាប់ប្រទេសក្រីក្រ ក្នុងការនាំយកផលិតផលនិងទំនិញនានាមកកាន់ទីផ្សារ EU ដោយមានការអនុគ្រោះពន្ធ ហើយមិនអាចផ្តល់ជូនជារៀងរហូតនោះឡើយ ។
សហភាពអឺរ៉ុប បានចាប់ផ្តើមនីតិវិធីជាផ្លូវការផ្អាក ជាបណ្តោះអាសន្ន លើប្រព័ន្ធអនុគ្រោះពន្ធ លើមុខ ទំនិញគ្រប់ប្រភេទ លើកលែងតែអាវុធ កាលពីថ្ងៃទី១៣ ខែកុម្ភៈ ឆ្នាំ២០១៩ មុននឹងអាចឈានទៅរកការព្យួរ នាខែកុម្ភៈឆ្នាំ២០២០ ប្រសិនបើរកឃើញថា កម្ពុជាអនុវត្តមិនត្រឹមត្រូវទៅរកភាពល្អប្រសើរគ្រប់គ្រាន់លើបញ្ហាសិទ្ធិមនុស្សនិងប្រជាធិបតេយ្យ ៕ កែសម្រួលដោយ ៖សុឃាក់
ចែករំលែកព័តមាននេះ