រាជធានីភ្នំពេញ ៖ ក្នុងជំនួបពិភាក្សាទ្វេភាគីជាមួយសម្តេចតេជោហ៊ុន សែន ឯកអគ្គរាជទូតជប៉ុននឹងបន្តសកម្មភាពជួយដោះមីននៅកម្ពុជា ។ លោក Masahiro Mikami ឯកអគ្គរាជទូតជប៉ុនថ្មីប្រចាំនៅកម្ពុជាបានលើកឡើងក្នុងជំនួបនាព្រឹក…
រាជធានីភ្នំពេញ ៖ ក្នុងជំនួបពិភាក្សាទ្វេភាគីជាមួយសម្តេចតេជោហ៊ុន សែន ឯកអគ្គរាជទូតជប៉ុននឹងបន្តសកម្មភាពជួយដោះមីននៅកម្ពុជា ។ លោក Masahiro Mikami ឯកអគ្គរាជទូតជប៉ុនថ្មីប្រចាំនៅកម្ពុជាបានលើកឡើងក្នុងជំនួបនាព្រឹក ថ្ងៃទី២៣ តុលា នៅវិមានសន្តិភាព លោកឯកអគ្គរាជទូតជប៉ុនបានមានប្រសាសន៍ពីអ្វីដែលជប៉ុននឹងបន្តជួយដល់កម្ពុជាជាបន្តទៀត ជាពិសេស គឺពាក់ព័ន្ធការវិនិយោគរបស់ក្រុមហ៊ុនជប៉ុនមកកម្ពុជា ។
លោកបញ្ជាក់ថា«ជប៉ុននឹងសកម្មភាពដែលសហការជាមួយនឹងស៊ីម៉ាក់ ក្នុងការដោះមីននៅកម្ពុជាផងដែរ ជប៉ុននឹងបន្តលើការផ្ដល់ជំនួយលើវិស័យថាមពលអគ្គិសនី និងធ្វើផែនការមេសម្រាប់កំពង់ផែស្វ័យយ័តទឹកជ្រៅនៅខេត្តព្រះសីហនុ ។ ត្រង់ចំណុចនេះ សម្តេចតេជោហ៊ុន សែន បានមានប្រសាសន៍ថា ចង់ឲ្យជប៉ុនសម្រេចនូវផែនការមេនេះ ដើម្បីឲ្យទទួលបាននូវភាពជោគជ័យ មានន័យថា ធ្វើយ៉ាងណា ដើម្បីឲ្យកប៉ាល់ធំៗនោះចុះចតដោយផ្ទាល់នៅកំពង់ផែទឹកជ្រៅនេះតែម្ដង ដោយមិនចាំបាច់មានការផ្ទេរទៅតាមបណ្ដាប្រទេសជិតខាងឡើយ ។
សម្ដេចតេជោនាយករដ្ឋមន្ត្រីបានស្វាគមន៍ចំពោះលោកអគ្គរាជទូតជប៉ុនប្រចាំនៅកម្ពុជា និងបានអបអរសាទរចំពោះឯកឧត្តមដែលត្រូវបានតែងតាំងជាអគ្គរាជទូតប្រចាំកម្ពុជានៅពេលនេះ ។ ចំណែកលោក ឯកអគ្គរាជទូតជប៉ុនក៏បានថ្លែងអំណរគុណចំពោះសម្ដេចតេជោដែលបានអនុញ្ញាតឲ្យលោកបានជួបសំដែងការគួរសមនាពេលនេះ ។
ជាពិសេសលោកក៏បានថ្លែងអំណរគុណចំពោះសម្ដេចតេជោនាយករដ្ឋមន្ត្រីក៏ដូចជា រាជរដ្ឋាភិបាលកម្ពុជាដែលបានចូលរួមរំលែកទុក្ខ ចំពោះប្រជាជនជប៉ុនដែលគ្រោះដោយសារព្យុះ កាលពីពេលថ្មីៗកន្លងទៅនេះ ។ លើសពីនេះលោកទូតក៏បានថ្លែងអំណរគុណចំពោះរដ្ឋាភិបាលកម្ពុជាជាពិសេសចំពោះការយាងរបស់ព្រះករុណាព្រះមហាក្សត្រសម្ដេចព្រះនរោត្ដម សីហមុនី យាងចូលរួមក្នុងការគ្រងរាជ្យថ្មីរបស់ព្រះចៅអធិរាជរបស់ប្រទេសជប៉ុន កាលពីពេលថ្មីៗនេះ ។
លោកបានគូសបញ្ជាក់ថា បច្ចុប្បន្ន ទំនាក់ទំនងភាគីរវាងកម្ពុជា និងជប៉ុន គឺមានទំនាក់ទំនងល្អ ។ លោកបានគូសបញ្ជាក់ថា កន្លងមកកម្ពុជាបានឆ្លងកាត់នៅសង្គ្រាមស៊ីវិល ក៏ប៉ុន្តែពេលនេះឃើញថា កម្ពុជាមានការអភិវឌ្ឍរីកចម្រើនយ៉ាងឆាប់រហ័ស ក្រោមការដឹកនាំរបស់សម្ដេចតេជោជានាយករដ្ឋមន្ត្រី ។ សម្ដេចបានបន្តទៀតថា កន្លងមកជប៉ុនក៏បានចូលរួមចំណែកក្នុងការផ្ដល់ជំនួយប្រទេសកម្ពុជាដូចជា ការកសាងនូវវិស័យហេដ្ឋារចនាសម្ព័ន្ធ ដែលរួមចំណែកក្នុងការអភិវឌ្ឍនឹងធ្វើអោយកម្ពុជារីកចម្រើនផងដែរ ។
បច្ចុប្បន្ននេះទំនាក់ទំនងទ្វេភាគីរវាងប្រទេសយើងទាំងពីរមានដល់កម្រិតខ្ពស់ ពិសេសក្នុងកម្រិតដៃគូយុទ្ធសាស្ត្រ ដោយសារតែកន្លងមកមានការផ្លាស់ប្ដូរនៃថ្នាក់ដឹកនាំកំពូលរវាងប្រទេសទាំងពីរ ហើយលើសពីនេះទៅទៀតបច្ចុប្បន្នយើងមានការហោះហើរត្រង់ទៅមករវាងប្រទេសទាំងពីរផងដែរ ដែលអាចជួយសម្រួលដល់ការធ្វើដំណើរសម្រាប់អ្នកវិនិយោគ និងភ្ញៀវទេសចរណ៍ផងដែរ ។
សម្ដេចតេជោ ក៏បានបញ្ជាក់អំពីទំហំពាណិជ្ជកម្មរវាងប្រទេសទាំងពីរមានការកើនឡើងមានការកើនឡើងជាលំដាប់ ហើយសម្តេចចង់បន្តឃើញទំហំពាណិជ្ជកម្មរវាងប្រទេសកម្ពុជា និងជប៉ុនមានការកើនឡើងជាបន្តទៀតរួមទាំងការបណ្ដាក់ទុនពីអ្នកវិនិយោគជប៉ុនមកកម្ពុជាផងដែរ ។សម្ដេចតេជោចង់ឲ្យបង្កើនកិច្ចសហប្រតិបត្តិការរវាងប្រទេសយើងទាំងពីរបន្ថែមទៀតជាពិសេសលើការពង្រីកនូវសេដ្ឋកិច្ច ពាណិជ្ជកម្ម និងវិស័យផ្សេងៗជាច្រើនទៀត ៕ កែសម្រួលដោយ ៖សុឃាក់
ចែករំលែកព័តមាននេះ