មហាសេដ្ឋីដែលចាត់ទុកជាអ្នកដែលរកលុយបានច្រើនជាងគេ លើលោកមានប្រមាណតែ២២០០នាក់ប៉ុណ្ណោះ ឬប្រមាណជា ០.០០០០៣% នៃចំនួនមនុស្សទូទាំងពិភពលោក ។ ប៉ុន្តែទ្រព្យសម្បត្តិរបស់ពួកគេនេះ ក៏បង្ខំឲ្យពួកគេត្រូវចាយវាយច្រើនដែរ ដូចជា ទៅលើសន្តិសុខ ការស្នាក់នៅ និងថ្លៃមេធាវីជាដើម ។
ឧទាហរណ៍ដូចជា លោក ម៉ាក ហ្សាក់កាបឺក (Mark Zuckerberg) ដែលចំណាយប្រមាណ១០ លានដុល្លារក្នុងមួយឆ្នាំលើសន្តិសុខរបស់ក្រុមគ្រួសារ ឬប្រមាណ១០ម៉ឺនដុល្លារក្នុងមួយថ្ងៃ ។ យ៉ាងណាក្តីក្រៅពីការចាយវាយលើកត្តាដែលចាំបាច់នេះហើយមហាសេដ្ឋីខាងលើក៏ចាយវាយលើអ្វីផ្សេងដែរ ដូចដែលមាននៅខាងក្រោមនេះ ៖
១. រថយន្ត ៖
មហាក្សត្ររបស់ប្រទេសព្រុយនេដែលមានទ្រព្យសម្បត្តិប្រមាណ២០ ប៊ីលានដុល្លារត្រូវបានគេរាយការណ៍ថា ទិញរថយន្តដល់ទៅ២៥០០ គ្រឿង ព្រោះទ្រង់ចូលចិត្តការបើកបរ ។ ជាមួយគ្នានេះដែរ រាជ្យបុត្រ អាល់វ៉ាលីដ ប៊ីន តាឡា (Al-Waleed bin Talal) របស់ប្រទេសអារ៉ាប៊ីសាអូឌីតវិញបានទិញរថយន្ត Mercedes ដែលដាំពេជ្រតម្លៃដល់ទៅ ៤.៨ លានដុល្លារ ដែលជារថយន្តមានតម្លៃថ្លៃជាងគេលើលោកដែលមានពេជ្យដល់ទៅ ៣០ ម៉ឺនគ្រាប់ ។
២. ផ្ទះ៖
អាជីវករជនជាតិម៉ាឡេស៊ីដែលមិនត្រូវបានបញ្ចេញឈ្មោះម្នាក់ធ្លាប់បានទិញនាវា The History Supreme ដែលជានាវាតម្លៃថ្លៃជាងគេលើលោកមានតម្លៃប្រមាណ ៤.៨ ប៊ីលានដុល្លារ ។ នៅផ្នែកខាងក្រៅរបស់នាវានេះគឺត្រូវបានស្រោបមាស ។ នាវានេះអាចអនុញ្ញាតឲ្យមនុស្សស្នាក់នៅដោយងាយស្រួលបាន ។ លើសពីនេះទៅទៀត លោកមហាសេដ្ឋី មូគេស អាមបានី (Mukesh Ambani) ដែលជាជនជាតិឥណ្ឌាវិញបានទិញអគារ Skyscaper ប្រមាណ ២៧ ជាន់តម្លៃ ១ ប៊ីលានដុល្លារ ដែលមានកម្ពស់ស្មើអគារ ៤០ជាន់ ។
៣. សប្បុរសធម៌៖
ក្រៅពីការចាយវាយខាងលើហើយ មហាសេដ្ឋីមួយចំនួនក៏ប្តេជ្ញាក្នុងផ្នែកសប្បុរសធម៌ដែរដូចជាលោក ប៊ីល ហ្គេតស៍ (Bill Gates) ដែលបរិច្ចាគទ្រព្យសម្បត្តិប្រមាណ ២៧ ប៊ីលានដុល្លារដើម្បីសប្បុរសធម៌ជាដើម ។ ក្នុងពេលថ្មីៗនេះ លោកបានបរិច្ចាគ ៤.៦ ប៊ីលានដុល្លារដើម្បីប្រឆាំងនឹងជម្ងឺគ្រុនចាញ់ទៀតផង ។
លោក វ៉ារេន បាហ្វេ (Warren Buffett) ដែលមានទ្រព្យសម្បត្តិសរុប ៨៤ ប៊ីលានដុល្លារវិញ បានបរិច្ចាគប្រមាណ ២១ ប៊ីលានដុល្លារមកហើយ ហើយក្នុងពេលថ្មីនេះនេះបានបរិច្ចាគ ៣ ប៊ីលានដុល្លារឲ្យទៅមូលនិធិ Bill and Melinda Gates Foundation ដើម្បីដោះស្រាយបញ្ហាសុខភាព ការអភិវឌ្ឍន៍ និងការអប់រំ ៕ កែសម្រួលដោយ ៖ សុឃាក់
ចែករំលែកព័តមាននេះ