ខេត្តប៉ៃលិន ៖ សេចក្តីរាយការណ៍បឋមបានឲ្យដឹងថា រហូតមកដល់វេលាម៉ោង១១ និង០៤នាទីព្រឹក ថ្ងៃទី២៣ ខែតុលានេះ ការិយាល័យប្រឆាំងគ្រឿងញៀនបានបង្ហាញមុខស្ត្រីជនសង្ស័យម្នាក់ ខណៈយកគ្រឿងបរិភោគទៅឱ្យជនជាប់ឃុំ បែរជាលាក់បង្កប់គ្រឿងញៀននៅក្នុងអាវទ្រនាប់ ហើយនឹងត្រូវបញ្ជូនទៅតុលាការឱ្យចាត់ការបន្ត ។
ប្រភពព័ត៌មានពីលោក យ៉ុង សារិទ្ធិ នាយរងការិយាល័យប្រឆាំងគ្រឿងញៀនបានឱ្យដឹងថា បន្ទាប់ពីទទួលបានព័ត៌មានស្តីពីករណីរក្សាទុកដឹកជញ្ជូន ឬជួញដូរដោយខុសច្បាប់សារធាតុញៀនកាលពីវេលាម៉ោង១៤ និង៣០នាទី ថ្ងៃទី២២ ខែតុលានេះ នៅក្នុងពន្ធនាគារខេត្តប៉ៃលិន ស្ថិតក្នុងភូមិទឹកចេញ ឃុំស្ទឹងកាច់ ស្រុកសាលាក្រៅ ខាងលោកបានរាយការណ៍ជូនលោក តូច សុភក្តី ព្រះរាជអាជ្ញាអមសាលាដំបូងខេត្ត ដើម្បីដឹកនាំកម្លាំងនគរបាលសហការជាមួយកម្លាំងអនុរក្សពន្ធនាគារខេត្តប៉ៃលិនបានចុះទៅនាំខ្លួនស្ត្រីជនសង្ស័យម្នាក់ឈ្មោះ គួង សុគាត់ ហៅស្រីពេជ្រ អាយុ២៧ឆ្នាំ មុខរបរមិនពិតប្រាកដ បច្ចុប្បន្នរស់នៅក្នុងភូមិអូរអំបិល ឃុំអូរអំបិល ស្រុកសិរីសោភ័ណ ខេត្តបន្ទាយមានជ័យ ។
លោកបន្តទៀតថា ខាងមន្ត្រីអនុរក្សពន្ធនាគារឆែកឆេរឃើញក្នុងខ្លួនស្ត្រីជនសង្ស័យមានម្សៅក្រាមពណ៌សថ្លា (ម៉ាទឹកកកICE) ១កញ្ចប់ បម្រុងយកទៅឱ្យអ្នកទោសដែលជាប់ក្នុងពន្ធនាគារខេត្តប៉ៃលិន ដើម្បីចែកចាយជួញដូរ និងប្រើប្រាស់បន្តក្នុងពន្ធនាគារ ។
បច្ចុប្បន្ននគរបាលកំពុងរៀបចំសំនុំរឿង ដើម្បីបញ្ជូនស្ត្រីជនសង្ស័យទៅតុលាការ ឱ្យចាត់ការតា មនីតិវិធីច្បាប់ ។
បញ្ជាក់ ៖ កាលពីមុនមិនធ្លាប់មានករណីលួចដាក់គ្រឿងញៀនតាមខ្លួនយកចូលទៅក្នុងពន្ធនាគារបែបនេះឡើយ ប៉ុន្តែដោយសារមានជនជាប់ទោសជាង១០០នាក់ ត្រូវគេបញ្ជូនមកពីពន្ធនាគារខេត្តបន្ទាយមានជ័យ កាលពីពេលថ្មីៗកន្លងទៅនេះ ស្រាប់តែសាច់ញាតិ និងបងប្អូនខិតខូចរបស់ពួកគេចូលទៅសួរសុខទុក្ខ និងយកនំចំណីម្ហូបអាហារទៅជូនជនជាប់ឃុំក៏លួចលាក់ដាក់បង្កប់គ្រឿងញៀនក្នុងខ្លួន ដើម្បីយកទៅឱ្យប្រើប្រាស់ក្នុងពន្ធនាគារបន្តទៀត។ តែសំណាងល្អត្រូវមន្ត្រីអនុរក្សចាប់ឃាត់ខ្លួនទាន់ពេលវេលាកុំអី សូម្បីតែក្នុងពន្ធនាគារក៏មានករណីប្រើប្រាស់គ្រឿងញៀនដែរ ៕ កែសម្រួលដោយ ៖សុឃាក់
ចែករំលែកព័តមាននេះ