រាជធានីភ្នំពេញ ៖ បុគ្គលិកកម្មករសំណង់ប្រុសស្រីរាប់រយនាក់បាននាំគ្នាតវ៉ាទាមទារឲ្យថៅកែក្រុមហ៊ុន Sino Great wall បើកប្រាក់ខែអោយពួកគាត់ បន្ទាប់ពីលេចឮដំណឹងថាអគារក្រុមហ៊ុនខាងលើនឹងត្រូវបានផ្លាស់ប្ដូរថៅកែថ្មី ។ ហេតុការណ៍ខាងលើនេះបង្កឲ្យមានការភ្ញាក់ផ្អើលដល់អជ្ញាធរ…
រាជធានីភ្នំពេញ ៖ បុគ្គលិកកម្មករសំណង់ប្រុសស្រីរាប់រយនាក់បាននាំគ្នាតវ៉ាទាមទារឲ្យថៅកែក្រុមហ៊ុន Sino Great wall បើកប្រាក់ខែអោយពួកគាត់ បន្ទាប់ពីលេចឮដំណឹងថាអគារក្រុមហ៊ុនខាងលើនឹងត្រូវបានផ្លាស់ប្ដូរថៅកែថ្មី ។
ហេតុការណ៍ខាងលើនេះបង្កឲ្យមានការភ្ញាក់ផ្អើលដល់អជ្ញាធរ និងសមត្ថកិច្ចចុះទៅសម្របសម្រួលកាលពីវេលាម៉ោង៥ល្ងាចថ្ងៃទី២២ ខែតុលា ឆ្នាំ២០១៩ នៅចំណុចអគារកំពុងសាងសង់របស់ក្រុមហ៊ុន Sino Great wall ជិតស្ពានហង្សកោះពេជ្រ ផ្លូវក្រសួងការបរទេស សង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីកន្លែងកើតហេតុបានឲ្យដឹងថា មុននឹងឈានដល់ការតវ៉ាខាងលើនេះកើតឡើង គឺកម្មករប្រុសស្រី ព្រមទាំងជនជាតិចិនផងមានចំនួនរាប់រយនាក់បាននាំគ្នាធ្វើការដូចសព្វដង លុះជិតដល់ម៉ោងចប់ការងារ ក៏ឮមេការជាជនជាតិចិននិយាយថា ក្រុមហ៊ុនខាងលើនឹងត្រូវផ្លាស់ប្តូរថៅកែថ្មីអោយមកគ្រប់គ្រង ។
តាមប្រភពព័ត៌មាននៅកន្លែងកើតហេតុបានឱ្យដឹងបន្តថា ដោយសារឮបែបនេះ ទើបធ្វើឱ្យពួកគាត់ជាកម្មករប្រុសស្រី មានទាំងជនជាតិចិន បាននាំគ្នាឈប់ធ្វើការ និងប្រមូលផ្ដុំគ្នា តវ៉ាអោយថៅកែក្រុមហ៊ុនបើកប្រាក់ខែអោយពួកគាត់ ព្រោះមានអ្នកខ្លះបានធ្វើការអស់រយៈពេល២ខែជាងមិនទាន់បើកប្រាក់ខែ និងមានមេការខ្លះ ត្រូវបានថៅកែជំពាក់មិនទាន់បើកប្រាក់ខែអោយគ្រប់នោះទេ ទើបពួកគាត់ភ័យខ្លាចថៅកែចាស់រត់គេចទៅស្រុកវិញបាត់ ក៏ប្រមូលផ្ដុំគ្នាតវ៉ាតែម្ដងទៅ ។
ក្នុងហេតុការណ៍ខាងលើនេះ ក៏ការចូលរួមពីអាជ្ញាធរមូលដ្ឋាន និងកម្លាំងសមត្ថកិច្ច នគរបាល និងកម្លាំងសមត្ថកិច្ច កងរាជអាវុធហត្ថខណ្ឌចំការមនចុះទៅសម្របសម្រួល កុំអោយមានបាតុភាពណាមួយកើតឡើងជាយថាហេតុ ផងដែរ។
ក្នុងការសម្របសម្រួលគ្នានោះដែរ រហូតដល់ម៉ោង៨យប់ថ្ងៃដដែល ទើបតំណាងក្រុមហ៊ុន និងតំណាងកម្មករសម្រួលគ្នាត្រូវ ដោយខាងក្រុមហ៊ុនយល់ព្រមបើកប្រាក់ខែអោយពួកគាត់ទាំងអស់នៅព្រឹកថ្ងៃទី២៣ តុលា តែការបើកលុយនេះ គឺអោយមេការតំណាងក្រុម ទៅបើក រួចហើយទើបយកមកបើកអោយកូនក្រុមជាបន្តបន្ទាប់ទៀត ទើបកម្មករប្រុសស្រីទាំងអស់យល់ព្រម ហើយក៏បំបែកគ្នាទៅសំរាករៀងៗខ្លួន ៕ (កែសម្រួលដោយ ៖ ធីតា)
ចែករំលែកព័តមាននេះ