ខេត្តសៀមរាប ៖ ខណ្ឌរដ្ឋបាលព្រៃឈើសៀមរាប បានសម្រេចយកឈើដែលរឹបអូសទាំងកណ្ដាលអធ្រាត្រប្រគេនជូនវត្តប្រាសាទអធ្វារវិញ បន្ទាប់ពីមានការរិះគន់តាមបណ្ដាញសារព័ត៌មាន និងបណ្ដាញសង្គមមួយចំនួនកន្លងទៅថ្មីៗនេះ ។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត នាព្រឹកថ្ងៃទី២២ ខែតុលា បានដឹកនាំមន្ត្រីខណ្ឌរដ្ឋបាលព្រៃឈើនាំយកឈើ ដែលបានរឹបអូសកាលពីយប់ថ្ងៃមុន ទៅប្រគេនព្រះសង្ឃវត្តប្រាសាទអធ្វារវិញ និងបានចូលរួមបច្ច័យជាថវិកាចំនួន១លានរៀល ដើម្បីរួមចំណែកកសាងវត្តផងដែរ ។ លោក ទា គឹមសុទ្ធ បានថ្លែងប្រាប់អ្នកសារព័ត៌មាននៅវត្តប្រាសាទអធ្វារថា ការប្រគេនឈើដល់ព្រះសង្ឃវិញនេះ គឺធ្វើតាមអនុសាសន៍ណែនាំរបស់លោក វេង សាខុន រដ្ឋមន្ត្រីក្រសួង កសិកម្មរុក្ខាប្រមាញ់ និងនេសាទ និងលោកអភិបាលខេត្ត ។
លោក ទា គឹមសុទ្ធ បញ្ជាក់ថា ដោយមានសេក្ដីរាយការណ៍ពីករណីកាប់ដើមឈើនៅវត្តប្រាសាទអធ្វារ ទើបកម្លាំងនគរបាលប្រឆាំងបទល្មើសសេដ្ឋកិច្ចខេត្ត សហការជាមួយខណ្ឌរដ្ឋបាលព្រៃឈើសៀមរាប និងអាជ្ញាធរពាក់ព័ន្ធ ចុះទៅពិនិត្យជាក់ស្ដែង និងប្រទះឃើញឈើអាររួចជាប្រភេទឈើទាលចំនួន៤៦សន្លឹក និងឈើមូលចំនួន២កំណាត់ ។
លោក ទា គឹមសុទ្ធ បញ្ជាក់ថា ដោយពេលវេលាយប់ជ្រៅ និងទីតាំងកើតហេតុក្រៅបរិវេណវត្តពុំមានអ្នកទទួលខុសត្រូវ ទើបសមត្ថកិច្ចសម្រេចដឹកជញ្ជូនវត្ថុតាងយកទៅរក្សាទុកជាបណ្តោះអាសន្ននៅផ្នែករដ្ឋបាលព្រៃឈើបន្ទាយស្រី ។
លោកបន្ថែមថា តាមការស្រាវជ្រាវរបស់មន្ត្រីនៅទីតាំងជាក់ស្តែង ព្រះសង្ឃនាម ភ្លឿន រ័ត្នគ្រូសូត្រស្តាំ តំណាងព្រះចៅអធិការវត្ត មានថេរដីកាថា ការកាប់ដើមឈើទាលមួយដើមនេះ ដោយសារដើមឈើនេះត្រូវរន្ទះបាញ់ចាប់ផ្តើមងាប់ និងមានមែកឈើមួយចំនួនបាក់ធ្លាក់មកដី អាចបង្កគ្រោះថ្នាក់ជាយថាហេតុ ។ ប៉ុន្តែគណៈកម្មការអាចារ្យវត្ត ពុំបានជូនដំណឹងទៅអាជ្ញាធរមូលដ្ឋាន និងសមត្ថកិច្ចពាក់ព័ន្ធនោះទេ ។
លោកបញ្ជាក់បន្ថែមថា ដោយពិនិត្យឃើញថា វត្តកំពុងសាងសង់កុដិ និងដោយមានការស្នើសុំបិណ្ឌបាតពីព្រះសង្ឃ និងគណៈកម្មការអាចារ្យវត្ត ទើបក្រុមមន្ត្រីរដ្ឋបាលព្រៃឈើសម្រេចប្រគេនឈើទៅព្រះសង្ឃវិញ និងបានចូលបច្ច័យសាងសង់កុដិចំនួន១លានរៀលថែមទៀតផង ។
សូមរំលឹកថា ហេតុការណ៍ក្រុមមន្ត្រីចុះរឹបអូសឈើនេះ កើតឡើងកាលពីថ្ងៃទី១៥ ខែតុលា ឆ្នាំ២០១៩ វេលាម៉ោងប្រមាណ១០និង២៦នាទីយប់ ស្ថិតក្នុងភូមិក្រសាំងរលើង សង្កាត់សៀមរាប ក្រុងសៀមរាប ៕
ចែករំលែកព័តមាននេះ