ADផ្ទាំងផ្សព្វផ្សាយពាណិជ្ជកម្ម

Picture

ទីបំផុត​មេព្រៃ​ខេត្តសៀមរាប​សម្រេច​ប្រគេន​ឈើជូន​វត្ត​វិញ ក្រោយ​រឹបអូស​ទាំង​យប់

4 ឆ្នាំ មុន
  • សៀមរាប

ខេត្តសៀមរាប ៖ នៅ​ទីបំផុត រដ្ឋបាល​ព្រៃឈើ​ខេត្តសៀមរាប​បាន​សម្រេច​យក​ឈើ​ដែល​បាន​រឹបអូស​ទាំង​កណ្ដាល​អ​ធ្រា​តទៅ​ប្រគេន​ជូន​វត្ត​ប្រាសាទ​អធ្វារ​វិញ​ហើយ បន្ទាប់​ពី​​មានការ​រិះគន់​តាម​បណ្ដាញសារព័ត៌មាន និង​បណ្ដាញ​សង្គម​មួយ​ចំនួន​​កាលពីពេល​កន្លង​ទៅ​ថ្មី​ៗ​នេះ​។ នៅ​ព្រឹក​ថ្ងៃ​ទី​២២ ខែតុលា ឆ្នាំ​២០១៩​នេះ លោក​ទា…

ខេត្តសៀមរាប ៖ នៅ​ទីបំផុត រដ្ឋបាល​ព្រៃឈើ​ខេត្តសៀមរាប​បាន​សម្រេច​យក​ឈើ​ដែល​បាន​រឹបអូស​ទាំង​កណ្ដាល​អ​ធ្រា​តទៅ​ប្រគេន​ជូន​វត្ត​ប្រាសាទ​អធ្វារ​វិញ​ហើយ បន្ទាប់​ពី​​មានការ​រិះគន់​តាម​បណ្ដាញសារព័ត៌មាន និង​បណ្ដាញ​សង្គម​មួយ​ចំនួន​​កាលពីពេល​កន្លង​ទៅ​ថ្មី​ៗ​នេះ​។

នៅ​ព្រឹក​ថ្ងៃ​ទី​២២ ខែតុលា ឆ្នាំ​២០១៩​នេះ លោក​ទា គឹ​ម​សុទ្ធ ប្រធាន​មន្ទីរ​កសិកម្ម​រុក្ខា​ប្រមាញ់​និង​នេសាទ​ខេត្តសៀមរាប បាន​ដឹកនាំ​មន្ត្រី​រដ្ឋបាល​ព្រៃឈើ​ខេត្ត នាំ​យក​ឈើ​ដែល​បាន​រឹបអូស​កាលពី​វេលា​ម៉ោង​១០​និង​២៦​នាទី​យប់​ថ្ងៃ​ទី​១៥ តុលា ឆ្នាំ​២០១៩ ទៅ​ប្រគេន​ជូន​ព្រះសង្ឃ​នៃ​វត្ត​ប្រាសាទ​អធ្វារ​វិញ និង​បាន​ចូលរួម​បច្ច័យ​ចំនួន​១​លាន​រៀល ប្រគេន​ព្រះសង្ឃ ដើម្បី​រួមចំណែក​កសាង​វត្ត​អធ្វារ​ផង​ដែរ​។

លោក​ទា គឹ​ម​សុទ្ធ ប្រធាន​មន្ទីរ​កសិកម្ម​ខេត្ត បាន​ថ្លែងប្រាប់​អ្នក​សារព័ត៌​មាននៅ​វត្ត​អធ្វារ នា​ថ្ងៃ​ទី​២២ ខែតុលា​ឆ្នាំ​២០១៩ នេះ​ថា ការ​ប្រគេន​ឈើជូន​ព្រះសង្ឃ​វិញ​នេះ គឺ​ធ្វើ​តាម​អនុ​សាស្ត្រ​ណែនាំ​របស់​លោក វេ​ង សា​ខុន រដ្ឋមន្ត្រី​ក្រសួងកសិកម្ម រុក្ខា​ប្រមាញ់​និង​នេសាទ និង​លោក​អភិបាលខេត្ត​សៀមរាប​។

បើ​តាម​លោក ទា គឹ​ម​សុទ្ធ ប្រធាន​មន្ទីរ​កសិកម្ម​រុក្ខា​ប្រមាញ់ និង​នេសាទ​ខេត្តសៀមរាប បាន​បញ្ជាក់​ថា ដោយ​មាន​សេ​ក្ដី​រាយការណ៍​ពី​ករណី​កាប់​ដើមឈើ​នៅ​វត្ត​អធ្វា ទើប​កម្លាំង​នគរបាល​ប្រឆាំង​បទល្មើស​សេដ្ឋកិច្ច​ខេត្ត ចុះ​សហការ​ជាមួយ​ខណ្ឌ​រដ្ឋបាល​ព្រៃឈើ​សៀមរាប និង​អាជ្ញាធរ​ពាក់ព័ន្ធ​បាន​ចុះ​ត្រួតពិនិត្យ​ជាក់ស្ដែង ។ ក្នុង​នោះ​ក្រុម​មន្ត្រី​បាន​ប្រទះ​ឃើញ​ឈើ​អារ​រួច ប្រភេទ​ឈើទាល​ចំនួន​៤៦​សន្លឹក និង​ឈើមូល​ចំនួន​២​កំណាត់ ។

លោក ទា គឹ​ម​សុទ្ធ បញ្ជាក់​ថា ដោយពេល​វេលា​យប់​ជ្រៅ និង​ទីតាំង​កើតហេតុ ក្រៅ​បរិវេណ​វត្ត ពុំ​មាន​អ្នក​ទទួលខុសត្រូវ ទើប​សមត្ថកិច្ច​សម្រេច​ដឹក​ជញ្ជូន​វត្ថុ​តាង​យក​ទៅ​រក្សា​ទុកជា​បណ្តោះអាសន្ន​នៅ​ផ្នែក​រដ្ឋបាល​ព្រៃឈើ​បន្ទាយស្រី​។

លោក​បាន​បញ្ជាក់​បន្ថែម​ថា តាម​ការ​ស្រាវជ្រាវ​របស់​មន្ត្រី​នៅ​ទីតាំង​ជាក់ស្តែង ព្រះសង្ឃ​ព្រះ​នាម ភ្លឿ​ន រ័​ត្ន ព្រះ​គ្រូសូត្រស្តាំ តំណាង​ព្រះ​ចៅអធិការ​វត្ត បាន​មាន​ថេរ​ដីកា​ថា ការ​កាប់​ដើមឈើ​ទាល​មួយ​ដើម​នេះ ដោយសារ​ដើមឈើ​នេះ​ត្រូវ​រន្ទះបាញ់​ចាប់ផ្តើម​ងាប់ និង​មាន​មែកឈើ​មួយ​ចំនួន​បាក់​ធ្លាក់​មក​ដី អាច​បង្ក​គ្រោះថ្នាក់​ជាយថាហេតុ​។ ប៉ុន្តែ​គណៈ កម្ម​ការ​អាចារ្យវត្ត ពុំ​បាន​ជូនដំណឹង​ទៅ​អាជ្ញាធរ​មូលដ្ឋាន និង​សមត្ថកិច្ច​ពាក់ព័ន្ធ​នោះ​ទេ​។

លោក​បាន​បញ្ជាក់​បន្ថែម​ថា ដោយ​ពិនិត្យ​ឃើញ​ថា វត្ត​កំពុង​សាងសង់​កុដិ និង​ដោយ​មានការ​ស្នើ​សុំ​បិណ្ឌ​បាត​ពី​ព្រះសង្ឃ និង​គណៈកម្មការ​អាចារ្យវត្ត ទើប​ក្រុម​មន្ត្រី​រដ្ឋបាល​ព្រៃឈើ​បាន​សម្រេច​ប្រគេន​ឈើ​ទៅ​ព្រះសង្ឃ​វិញ​និង​បាន​ចូល​បច្ច័យ​សាងសង់​កុដិ​ចំនួន​១​លាន​រៀល​ថែម​ទៀត​ផង ៕ (​កែសម្រួល​ដោយ ៖ ធីតា​)

អត្ថបទសរសេរ ដោយ

កែសម្រួលដោយ