ប្រសិនបើអញ្ចាញអ្នកកំពុងខើចនោះវាអាចជាសញ្ញាមួយនៃជំងឺអញ្ចាញធ្មេញហើយ! បញ្ហានេះអាចកើតឡើងកំឡុងវ័យកុមារ ឬពេលវ័យជំទង់ ហើយស្ថានភាពនឹងប្រែជាអាក្រក់ឡើងៗ។ ប៉ុន្តែជាធម្មតាអ្នកដែលជួបប្រទះបញ្ហាខើចអញ្ចាញច្រើនតែមានវ័យលើស ៤០ ឆ្នាំ។
អាការៈខើចអញ្ចាញក៏អាចបណ្ដាលមកពីមូលហេតុច្រើនយ៉ាងផ្សេងទៀតដូចជាអតុល្យភាពនៃអ័រម៉ូន តំណពូជ ជំងឺអញ្ចាញធ្មេញ ការរក្សាអនាម័យមាត់ធ្មេញមិនបានល្អ និងការដុសសម្អាតធ្មេញខ្លាំងៗ។ ទោះជាយ៉ាងណាកុំបារម្ភ! បញ្ហាអញ្ចាញធ្មេញខើចមិនចាំបាច់ត្រូវតែឱ្យអ្នកជួបព្យាបាលជាមួយពេទ្យធ្មេញឡើយ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធិភាពខ្ពស់ក្នុងការព្យាបាលដោះស្រាយបញ្ហាខើចអញ្ចាញធ្មេញ ៖
១. តែបៃតង ៖ តែបៃតងមានផ្ទុកសារធាតុប្រឆាំងអុកស៊ីតកម្មដែលជួយទប់ស្កាត់ជំងឺជាច្រើន រួមបញ្ចូលទាំងបញ្ហាខើចអញ្ចាញ។ តែបៃតងអាចជួយកាត់បន្ថយការរលាកនៃអញ្ចាញ ក៏ដូចជាកម្ចាត់នូវពពួកបាក់តេរីក្នុងមាត់ដែលបណ្ដាលឱ្យកើតជំងឺរលាកអញ្ចាញផងដែរ។ អ្វីដែលអ្នកត្រូវធ្វើ គឺគ្រាន់តែទទួលទានតែបៃងរៀងរាល់ព្រឹកដើម្បីរក្សាសុខភាពធ្មេញ និងអញ្ចាញ។
២. អំបិល ៖ អ្វីដែលអ្នកត្រូវធ្វើ គឺគ្រាន់តែលាយអំបិល ១ ស្លាបព្រាកាហ្វេក្នុងទឹកក្ដៅឧណ្ហៗ ១ ពែង។ កូរឱ្យសព្វ សឹមខ្ពុរសម្អាតមាត់ជាមួយទឹកល្បាយនេះសម្រាប់រយៈពេល ៣០ វិនាទី។ អនុវត្តឱ្យបានពី ២ ទៅ ៣ ដងក្នុងមួយថ្ងៃ។
៣. ប្រេងដូង ៖ អ្វីដែលអ្នកត្រូវធ្វើ គឺជាដំបូងដុសសម្អាតធ្មេញដូចពេលធម្មតាជាមុនសិន សឹមខ្ពុរមាត់ជាមួយប្រេងដូងសុទ្ធ។ អ្នកក៏អាចប្រើប្រាស់ប្រេងល្ងជំនួសបានដែរ។
៤. អាស៊ីតខ្លាញ់អូមេហ្កា ៣ ៖ ក្រៅពីល្អសម្រាប់សុខភាពអញ្ចាញហើយនោះ អាស៊ីតខ្លាញ់អូមេហ្កា ៣ ក៏ចាំបាច់សម្រាប់សុខភាពធ្មេញរឹងមាំផងដែរ។ ដូច្នេះចូរព្យាយាមរួមបញ្ចូលអាហារមានផ្ទុកសម្បូរទៅដោយអាស៊ីតខ្លាញ់អូមេហ្កា ៣ ក្នុងរបបអាហារប្រចាំថ្ងៃ។
៥. ប្រទាលកន្ទុយក្រពើ ៖ អ្វីដែលអ្នកត្រូវធ្វើ គឺជ្រើសរើសប្រើប្រាស់នូវថ្នាំដុសធ្មេញ ឬទឹកខ្ពុរមាត់ណាដែលមានផ្ទុក ឬផ្សំឡើងពីប្រទាលកន្ទុយក្រពើ។
៦. វីតាមីន C ៖ កង្វះនៃវីតាមីន C អាចនាំឱ្យកើតបញ្ហាអញ្ចាញដូចជា ខើចអញ្ចាញ ហូរឈាមអញ្ចាញ និងរលាក។ ដូច្នេះអ្នកគួរព្យាយាមទទួលទានអាហារដែលមានផ្ទុកសម្បូរទៅដោយវីតាមីន C រួមបញ្ចូលទាំងបន្លែផ្លែឈើស្រស់ៗ។
សម្គាល់៖ កត្តាមួយចំនួនដូចជាតំណពូជ គឺមិនអាចទប់ស្កាត់ ឬគ្រប់គ្រងបានទេ ប៉ុន្តែមិនមែនមានន័យថាអ្នកមិនអាចទប់ស្កាត់ពីកត្តាផ្សេងទៀតដែលបណ្ដាលឱ្យកើតមានបញ្ហាខើចអញ្ចាញបានដែរ! ការពារ គឺតែងប្រសើរជាងព្យាបាល។ កុំដុសធ្មេញខ្លាំងៗពេក ត្រូវដុសឱ្យស្របនឹងខ្សែអញ្ចាញ ហើយជ្រើសរើសច្រាសដុសធ្មេញប្រភេទណាដែលសមស្របមិនធំ ឬតូចពេក និងគួរប្រើខ្សែរ៉ូតសម្អាតចន្លោះធ្មេញជាប្រចាំទើបអាចរក្សាបាននូវសុខភាពមាត់ធ្មេញ រួមទាំងអញ្ចាញល្អប្រសើរ (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ