សហគ្រិន និងមហាសេដ្ឋី ជេក ម៉ា (Jack Ma) របស់ប្រទេសចិនដែលជាស្ថាបនិកក្រុមហ៊ុន Alibaba បានឱ្យដឹងថា លោកនឹងជួបការលំបាកក្នុងការសម្ភាសចូលធ្វើការក្នុងក្រុមហ៊ុនលោកនាសព្វថ្ងៃនេះ ។ មិនត្រឹមតែ Alibaba ទេ លោកគិតថាលោកប្រហែលជាមិនអាចជាប់ដំណាក់កាលដំបូងពេលដាក់ពាក្យសុំការងារនៅក្រុមហ៊ុនធំៗជុំវិញពិភពលោកផង ។
លោក ម៉ា បាននិយាយនៅសន្និសីទ Forbes Global CEO Conference ក្នុងប្រទេសសិង្ហបុរីថា «មនុស្សដូចខ្ញុំសព្វថ្ងៃនេះ ប្រសិនបើខ្ញុំសាកល្បងដាក់ពាក្យសុំចូលធ្វើការនៅ Alibaba វាស្ទើរតែមិនអាចទៅរួចទៅហើយ»។
លោកបានបកស្រាយថា វាមកពីចន្លោះមួយក្នុងប្រព័ន្ធការងារអន្តរជាតិដែលផ្តោតសំខាន់ពេកទៅលើលទ្ធផលការសិក្សា និងមិនផ្តល់ឱកាសឲ្យអ្នកដែលមានគំនិតច្នៃប្រឌិត ។ លោកបានបន្តថា មនុស្សឲ្យតម្លៃអ្នកអាស្រ័យលើសញ្ញាប័ត្ររបស់អ្នក ។
គួរបញ្ជាក់ដែរថាលោក ម៉ា ជានិស្សិតដែលជួបការលំបាកច្រើននៅសាលារៀន ហើយលោកថែមទាំងត្រូវបានគេបដិសេធការងារប្រមាណ ៣០កន្លែងផងដែរមុនពេលលោកចាប់ផ្តើមក្រុមហ៊ុន Alibaba ក្នុងឆ្នាំ ១៩៩៩ ។ លោកបានប្រាប់មកថាលោកបានជួបមនុស្សជាច្រើនដែលមិនត្រូវបានអ្នកដទៃឲ្យតម្លៃព្រោះពួកគេមិនមានលទ្ធផលល្អក្នុងផ្នែកសិក្សា ។ លោក ម៉ា បានបន្ថែមថា សមត្ថភាពក្នុងផ្នែកសិក្សាកាន់តែលែងមានន័យហើយក្នុងសម័យឌីជីថលដែលកំពុងផ្លាស់ប្តូរនេះ ។
«នៅសម័យឧស្សាហកម្ម អ្នកត្រូវតែចេះចាំឲ្យបានលឿន ចាំឲ្យបានច្រើន និងគណនាឲ្យបានលឧន ។ កិច្ចការទាំងនេះបច្ចុប្បន្នមានម៉ាស៊ីនដែលអាចធ្វើលឿនជាងអ្នកទៅទៀត ។ ហើយវាជារឿងដែលយើងគួរតែព្រួយបារម្ភ ។ ២០ ទៅ ៣០ឆ្នាំទៀត កូនៗរបស់យើងនឹងមិនអាចរស់បានទេព្រោះតែការអប់រំរបស់យើង» ។
មហាសេដ្ឋីខាងលើបានបន្តថា «ពួកយើងត្រូវតែបង្រៀនកីនៗឲ្យចេះធ្វើនវានុវត្តន៍ ស្ថាបនា និងមានគំនិតច្នៃប្រឌិតដើម្បីឲ្យពួកគេអាចរស់នៅក្នុងសម័យកាល AI (Artificial Intelligence) បាន ។ ខ្ញុំចង់ចូលរួមឲ្យបានច្រើនក្នុងផ្នែកនេះ» ៕
ប្រភព ៖ cnbc , កែសម្រួលដោយ ៖ សំណាង
ចែករំលែកព័តមាននេះ