រាជធានីភ្នំពេញ ៖ ស្ត្រីខ្មែរអ៊ិស្លាមម្នាក់ត្រូវបានក្រុមអ្នករត់ម៉ូតូឌុបប្រទះឃើញអង្គុយយំក្នុងស្ថានភាពភាន់ភាំងស្មារតី ហើយដោយមានការអាណិតអាសូរ ទើបអ្នករត់ឌុបបានដឹកនាងទៅកាន់ផ្នែកព្រហ្មទណ្ឌនគរបាលខណ្ឌពោធិ៍សែនជ័យ ដើម្បីឲ្យនគរបាលជួយសួរនាំពីមូលហេតុ ។ លុះពេលទៅដល់ផ្នែកព្រហ្មទណ្ឌនគរបាលបាលសួរនាំ នាងបានប្រាប់ថា នាងពុំបានដឹងថាមានរឿងអ្វីកើតឡើងមកលើខ្លួននាងនោះទេ ដោយនៅចាំបានត្រឹមនាងចេញពីផ្ទះយកលុយទៅសងម៉ូយនៅផ្សារវាលរេញ ហើយផឹកទឹកសុទ្ធ១ដប ក្រោយមកមិនដឹងមានរឿងអ្វីកើតឡើងនោះទេ ស្រាប់តែមកដល់រាជធានីភ្នំពេញ ហើយបាត់គ្រឿងអលង្ការមាសនិងលុយសរុប៥ពាន់ដុល្លារអស់រលីងពីខ្លួនតែម្តង ។
ស្ត្រីម្នាក់ខាងលើនិយាយហាក់ដូចជាភាំងៗស្មារតី ហើយត្រូវបាននគរបាលដាក់ការសង្ស័យថា នាងត្រូវថ្នាំសណ្ដំរបស់ជនមិនស្គាល់អត្តសញ្ញាណមួយក្រុម និងត្រូវបានក្រុមជននោះដោះយកគ្រឿងអលង្ការមាសនិងលុយអស់ ។ បន្ទាប់មកក្រុមជនសង្ស័យបានដឹកនាងចេញពីផ្សារវាលរេញ នៅឯខេត្តព្រះសីហនុ យកមកទុកចោលនៅរាជធានីភ្នំពេញ រួចនាំគ្នារត់គេចខ្លួនបាត់ ។ មិនតែប៉ុណ្ណោះក៏សង្ស័យថា នាងត្រូវចាញ់ល្បិចបោករបស់ក្រុមជនសង្ស័យទម្លាក់យោងផងដែរ ព្រោះក្រុមជនសង្ស័យទម្លាក់យោងពូកែណាស់ខាងល្បួងដោះយកគ្រឿងអលង្ការបែបនេះ។
ហេតុការណ៍នោះបានបង្កឲ្យមានការភ្ញាក់ផ្អើលឡើងកាលពីវេលាម៉ោង១២និង៥៥នាទីថ្ងៃត្រង់ថ្ងៃទី២២ ខែតុលា ឆ្នាំ២០១៩ នៅតាមផ្លូវក្បែរអាងទឹក ស្ថិតនៅក្នុងភូមិចំការឪឡឹក សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះខាងលើឈ្មោះសាំ យ៉ះ អាយុ២១ឆ្នាំ ជាជនជាតិខ្មែរឥស្លាម មុខរបរជាអាជីវករលក់ដូរអីវ៉ាន់បោះដុំ មានទីលំនៅក្នុងភូមិវាលរេញ សង្កាត់វាលរេញ ខេត្តព្រះសីហនុនិងមានប្ដីជាអ្នករត់តាក់សុី ។
តាមប្រភពពីស្ត្រីរងគ្រោះបានអះអាងប្រាប់នគរបាលថា នាងបានបាត់បង់គ្រឿងអលង្ការមាសទម្ងន់១តម្លឹងកន្លះ និងលុយ១២លានរៀល ចំណែកខ្សែចង្កេះរបស់នាងធ្វើអំពីមាសមិនបានបាត់បង់ឡើយដែលទំនងជាជនសង្ស័យអត់ដឹងថានាងមានខ្សែចង្កេះធ្វើពីមាស។
ស្ត្រីរងគ្រោះបាននិយាយបែបរវើរវាយប្រាប់នគរបាលបន្តទៀតថា នាងនៅចាំបានថា នៅមុនពេលកើតហេតុ នាងបានជិះម៉ូតូឌុប១គ្រឿងចេញពីផ្ទះឆ្ពោះទៅកាន់ផ្សារវាលរេញ ដើម្បីយកលុយចំនួន១២លានរៀលខាងលើទៅសងម៉ូយ ថ្លៃដែលនាងទិញអីវ៉ាន់យកទៅលក់បន្ត ។ លុះពេលជិះម៉ូតូទៅដល់ផ្សារវាលរេញ មិនទាន់បានយកលុយនោះទៅសងម៉ូយនៅឡើយទេ ដោយស្រេកទឹកពេក នាងក៏បានទិញទឹកសុទ្ធ១ដបផឹកសិន ដោយគិតថាក្រោយពីផឹកទឹករួចចាំយកលុយទៅសងម៉ូយ។
តាមប្រភពដដែលបានបន្តថា ក្រោយពីផឹកទឹករួចក៏ស្រាប់តែនាងលែងដឹងខ្លួន បាត់ការចងចាំរហូត ដោយមិនដឹងថាមានរឿងអ្វីកើតឡើងលើរូបនាងនោះទេ លុះដល់វេលារសៀលថ្ងៃដដែលពេលដឹងខ្លួន ស្រាប់តែកំពុងស្ថិតនៅក្នុងភូមិចំការឪឡឹក សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញទៅវិញ។ ដោយពុំដឹងថាខ្លួនឯងមកដល់ទីនេះដោយរបៀបណាឡើយ មិនតែប៉ុណ្ណោះលុយចំនួន១២លានរៀលដែលត្រូវយកទៅសងម៉ូយ រួមនឹងគ្រឿងអលង្ការមាសទម្ងន់១តម្លឹងកន្លះក៏បានបាត់អស់រលីងពីខ្លួនថែមទៀត។
ពាក់ព័ន្ធនឹងករណីខាងលើនេះដែរ នគរបាលបានដាក់ការសង្ស័យចំនួន២ចំណុច គឺទី១-សង្ស័យថានាងត្រូវចាញ់ល្បិចបោក និងការល្បួងដ៏បុិនប្រសព្វរបស់ក្រុមជនសង្ស័យទម្លាក់យោងនាំទៅដោះគ្រឿងអលង្ការនិងយកលុយអស់ដោយមិនមានត្រូវថ្នាំសណ្ដំទេ ហើយនាងការភាន់ភាំងស្មារតីបណ្ដាលមកពីមានការតក់ស្លុត ក្រោយពេលបាត់លុយនិងគ្រឿងអង្ការអស់ ។
ចំណែកចំណុចទី២-សមត្ថកិច្ចសង្ស័យថាអាចត្រូវថ្នាំសណ្ដំមែន តែត្រូវតិចត្រឹមតែភាន់ភាំងស្មារតីមួយរយៈពេលខ្លី ហើយក្រោយពីដោះយកគ្រឿងអលង្ការនិងលុយនាងហើយ ក្រុមជនសង្ស័យក៏បានដឹកនាងយកមកទុកចោល រួចគេចខ្លួនបាត់អស់តែម្ដង។
ទោះបីជាបែបណា ដោយសង្ស័យថានាងត្រូវថ្នាំសណ្ដំទើបនគរបាលទាក់ទងទៅក្រុមគ្រួសារឲ្យមកទទួលយកនាង ហើយភ្លាមៗនោះបុរសម្នាក់ដែលត្រូវជាបងថ្លៃរបស់នាងបានមកដឹកនាងយកទៅកាន់មន្ទីរពេទ្យដើម្បីព្យាបាលហើយ រង់ចាំពេលនាងមានអាការៈប្រក្រតីវិញចាំដាក់ពាក្យបណ្ដឹង៕ (កែសម្រួលដោយ ៖ ធីតា)
ចែករំលែកព័តមាននេះ