ខេត្តសៀមរាប ៖ មន្ត្រីសាលាដំបូងខេត្តសៀមរាបឱ្យដឹង កាលពីរសៀលថ្ងៃទី២១ តុលាថា សាលាដំបូងបានសម្រេចឃុំខ្លួនជនសង្ស័យម្នាក់ ឈ្មោះ សំ វុទ្ធី ហៅធី ដែលជាប់ពាក់ព័ន្ធ នឹងករណីរួមគំនិតក្បត់ ក្រោយជនជាប់ចោទរូបនេះ ត្រូវបាននគរបាលផែនសន្តិសុខនៃស្នងការដ្ឋាននគរបាលខេត្តសៀមរាប ចាប់ខ្លួន កាលពីថ្ងៃទី២០ តុលា ស្ថិតនៅក្នុងក្រុងសៀមរាប ខេត្តសៀមរាប។
ជនជាប់ចោទ ឈ្មោះ សំ វុទ្ធី ហៅធី អាយុ៣៩ឆ្នាំ មានមុខងារជាអតីតក្រុមប្រឹក្សាសង្កាត់ស្វាយដង្គំ មានទីលំនៅបច្ចុប្បន្នសង្កាត់ស្វាយដង្គំ ក្រុងសៀមរាប ខេត្តសៀមរាប ។ យោងតាមលិខិតរបស់សាលាដំបូងខេត្តសៀមរាបបានបង្ហាញថា ជនត្រូវចោទឈ្មោះ សំ វុទ្ធី ហៅធី អាយុ៣៩ឆ្នាំ ត្រូវបានតំណាងអយ្យការអមសាលាដំបូងខេត្តសៀមរាប ចោទប្រកាន់នៅក្នុងសំណុំរឿងព្រហ្មទណ្ឌលេខៈ១២៦៥ ចុះថ្ងៃទី២០ ខែតុលា ឆ្នាំ២០១៩ ពីបទរួមគំនិតក្បត់ តាមមាត្រា៤៥៣ នៃក្រមព្រហ្មទណ្ឌ ។
សេចក្តីប្រកាសបានបង្ហាញទៀតថា កាលពីថ្ងៃទី១៨ ខែតុលា ឆ្នាំ២០១៩ គណនី Facebook ឈ្មោះ Sam Vuthy ដែលមានម្ចាស់ប្រើប្រាស់ឈ្មោះ សំ វុទ្ធី ដែលមាន (របស់ក្រុមឧទ្ទាមក្រៅច្បាប់) បានចែកចាយបន្តនូវខ្លឹមសារ ត្រៀមៗ ០៩ វិច្ឆិកា ២០១៩។
អ្នកនាំពាក្យសាលាដំបូងខេត្តសៀមរាប បានបញ្ជាក់ទៀតថា នៅថ្ងៃទី១៧ ខែតុលា ឆ្នាំ២០១៩ ជននេះបានចែកចាយបន្តនូវខ្លឹមសារលោក សម រង្ស៊ី ប្រកាសនាំពលករនៅថៃ ដើរកាត់ព្រំដែនចូលមកខ្មែរ ហើយកន្លងមកឈ្មោះ សំ វុទ្ធី ធ្លាប់បានចែកចាយនូវខ្លឹមសាររបស់លោក សម រង្ស៊ី ជាច្រើនលើកច្រើនសារ នៅក្នុងបណ្តាញសង្គម Facebook របស់ខ្លួន ដែលមានចេតនា រួមគំនិតក្បត់។
ពាក់ព័ន្ធនឹងសកម្មភាពរបស់ជនត្រូវចោទ ឈ្មោះ សំ វុទ្ធី តាមរយៈបណ្តាញសង្គម Facebook ឈ្មោះ Vuthy Sam គឺបំផុសបំផុលឲ្យមហាជន ចូលរួមផែនការផ្តួលរំលំរាជរដ្ឋាភិបាលកម្ពុជា នៅថ្ងៃទី០៩ ខែវិច្ឆិកា ឆ្នាំ២០១៩ខាងមុខ ក្រោមឧបាយកលជា «ផែនការនៃការវិលត្រឡប់មកកម្ពុជា វិញរបស់ឧក្រិដ្ឋជន សម រង្ស៊ី» ដោយអនុវត្តតាមការអំពាវនាវរបស់ឧក្រិដ្ឋជន សម រង្ស៊ី។
បច្ចុប្បន្ន ជនសង្ស័យឈ្មោះ សំ វុទ្ធី ត្រូវបានចៅក្រមសាលាដំបូងខេត្តសៀមរាប ចេញដីកាឃុំខ្លួនពីបទរួមគំនិតក្បត់រដ្ឋាភិបាល៕
ចែករំលែកព័តមាននេះ