រាជធានីភ្នំពេញ ៖ ប្រមុខដឹកនាំរាជរដ្ឋាភិបាលកម្ពុជា នៅព្រឹកថ្ងៃទី២២ ខែតុលា បានបញ្ជាក់ឲ្យដឹងថា ក្នុងន័យគ្រប់គ្រង និងប្រមូលសំរាមឲ្យមានប្រសិទ្ធភាព សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា ដើម្បីជួយសម្រួលកុំឲ្យក្រុមហ៊ុនសំរាម ស៊ីនទ្រី ត្រូវខាតបង់នោះ រដ្ឋនឹងទិញយកសម្ភារៈ និងបុគ្គលិករបស់ក្រុមហ៊ុនសំរាម ស៊ីនទ្រីទាំងអស់ជារបស់រដ្ឋ បន្ទាប់មកនឹងមានការរៀបចំដេញថ្លៃឲ្យមានក្រុមហ៊ុនសំរាមយ៉ាងហោចណាស់៣ ឬ ៤ ក្រុមហ៊ុនសម្រាប់ការគ្រប់គ្រង និងប្រមូលសំរាមនៅក្រុងភ្នំពេញ ។
សម្តេចតេជោបានមានប្រសាសន៍នាឱកាសអញ្ជើញជាអធិបតីដ៏ខ្ពង់ខ្ពស់ ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យបៀលប្រាយចំនួន ៤,០៣៨នាក់ ដែលប្រារព្ធឡើងនៅមជ្ឈមណ្ឌលកោះពេជ្រ រាជធានីភ្នំពេញថា កាលពីពេលចុះហត្ថលេខាជាមួយក្រុមហ៊ុនសំរាម ស៊ីនទ្រី នោះ គឺសំរាមនៅរាជធានីភ្នំពេញ គឺមានក្នុងរង្វង់តែ ៣០០ ទៅ ៥០០ តោនក្នុងមួយថ្ងៃ ដែលគ្រានោះក្រុងភ្នំពេញ គឺមានទំហំប្រហែល ៣០០ គីឡូម៉ែត្រការ៉េ ។
តែបច្ចុប្បន្ននេះ ក្រុងភ្នំពេញមានវិសាលភាពដល់ទៅជាង ៦០០ គីឡូម៉ែត្រការ៉េ ដែលផលិតសំរាមជាង ៣០០០តោនក្នុងមួយថ្ងៃ ដូច្នេះហើយឧទាហរណ៍បើសិនទុកឲ្យស៊ីនទ្រី មួយ បើស៊ីនទ្រីមិនកំរើកដៃនោះ សំរាមគរដូចភ្នំ។
សម្តេចបានបន្តថា ក្រោយពេលរដ្ឋគ្រប់គ្រងក្រុមហ៊ុនសំរាមមួយរយៈ នោះនឹងរៀបចំការដេញថ្លៃ ដោយក្នុងនោះក្រុមហ៊ុន ស៊ីនទ្រី ក៏អាចចូលរួមដេញថ្លៃផងដែរ ។
យ៉ាងណាមិញសម្តេចបានបញ្ជាក់ថា លែងឲ្យមានក្រុមហ៊ុនសំរាមតែមួយទៀតហើយក្នុងការប្រមូលសំរាមនៅភ្នំពេញ ដូច្នេះនឹងមានការរៀបចំនូវខណ្ឌ ដើម្បីបែងចែកជាតំបន់ ដែលក្នុងមួយតំបន់អនុញ្ញាតិឲ្យមានក្រុមហ៊ុនប្រមូលសំរាមតែមួយ ដែលក្នុងនោះក្នុងមួយតំបន់អាចមាន ៤ ខណ្ឌ នៅក្នុងនោះ ។
សម្តេចបានបញ្ជាក់ថា «ប៉ុន្តែមិនឲ្យ ស៊ីនទ្រី ខាតទេ ទិញយកសម្ភារៈ ឡាន និងបន្ទាប់មកបានយើងដាក់ថា ប៉ុន្មានខណ្ឌ ដាក់មួយតំបន់ ចែកក្រុមហ៊ុនមួយ … ប្រមូលសំរាមម» សម្តេចតេជោបញ្ជាក់៕ (កែសម្រួលដោយ ៖ បុប្ផា)
ចែករំលែកព័តមាននេះ