ខេត្តបាត់ដំបង ៖ គេសង្កេតឃើញរថយន្តស៊េរីទំនើបៗ ទាំងរថយន្តចង្កូតឆ្វេង រថយន្តចង្កូតស្ដាំ ដែលពាក់ស្លាកលេខខេមរភូមិន្ទ ស្លាកលេខនគរបាល ស្លាកលេខពណ៌ក្រហម(ចង្កូតស្ដាំ) និងស្លាកលេខស៊ីវិល ដែលគេសង្ស័យថា…
ខេត្តបាត់ដំបង ៖ គេសង្កេតឃើញរថយន្តស៊េរីទំនើបៗ ទាំងរថយន្តចង្កូតឆ្វេង រថយន្តចង្កូតស្ដាំ ដែលពាក់ស្លាកលេខខេមរភូមិន្ទ ស្លាកលេខនគរបាល ស្លាកលេខពណ៌ក្រហម(ចង្កូតស្ដាំ) និងស្លាកលេខស៊ីវិល ដែលគេសង្ស័យថា រថយន្តទាំងនោះភាគច្រើនត្រូវពួកឈ្មួញទុច្ចរិតលួចនាំចូលពីប្រទេសជិតខាង ដោយមិនស្របច្បាប់ និងពាក់ស្លាកលេខក្លែងបន្លំ បាននិងកំពុងធ្វើចរាចរណ៍យ៉ាងព្រោងព្រាតកាន់តែច្រើនឡើងៗ ពាសពេញលើដងផ្លូវសាធារណៈនានា នៅក្នុងខេត្តបាត់ដំបង បើទោះជាមន្ត្រីគយចល័តស្ទាក់ចាប់បានរថយន្តប្រភេទទាំងនេះជាញឹកញាប់យកទៅឃុំទុកនៅក្នុងឃ្លាំងក្ដី។
ជាក់ស្ដែង កាលពីព្រឹកថ្ងៃទី១៩ តុលា កម្លាំងគយចល័តដែលមានទីស្នាក់ការនៅតាមដងផ្លូវជាតិលេខ៥ នៅក្នុងឃុំអូរតាគី ស្រុកថ្មគោល បានស្ទាក់ឃាត់រថយន្តស៊េរីទំនើបៗចំនួន៣គ្រឿង ពេលកំពុងធ្វើចរាចរណ៍លើដងផ្លូវសាធាណៈ នៅក្នុងសង្កាត់ស្វាយប៉ោ ក្រុងបាត់ដំបង ដែលគេសង្ស័យថា រថយន្តទាំង៣គ្រឿងនោះ ជារថយន្តលួចនាំចូលពីប្រទេសជិតខាងដោយមិនស្របច្បាប់ (រថយន្តគេចពន្ធ) ហើយថែមទាំងពាក់ស្លាកលេខក្លែងបន្លំទៀតផង ។
យោងតាមសេចក្ដីរាយណ៍បានឲ្យដឹងថា រថយន្តដែលកម្លាំងគយចល័តបង្ក្រាបបានទាំង៣គ្រឿងនោះរួមមាន ១-រថយន្តម៉ាក FORD RANGER ចង្កូតស្ដាំពណ៏ឈាមជ្រូកស៊េរីឆ្នាំ២០១២ ពាក់ស្លាកលេខ ខេមរភូមិន្ទ 05.2-1379 ២-រថយន្តម៉ាក LEXUS 460 ចង្កូតឆ្វេងពណ៏ស គ្មានស្លាកលេខ និង ៣រថយន្តម៉ាក NISSAN NAVARA ស៊េរីឆ្នាំ២០១៧ ចង្កូតស្ដាំពាក់ស្លាកលេខ ភ្នំពេញ 8570 តែមិនត្រូវបានមន្ត្រីជំនាញបង្ហាញឈ្មោះម្ចាស់រថយន្តទាំងនេះទេ ។
បើតាមប្រភពព័ត៌មានពីមន្ត្រីគយបានឲ្យដឹងថា រថយន្តទាំង៣គ្រឿង ដែលត្រូវឃាត់ជាបណ្ដោះអាសន្ននេះ ដោយសារតែមន្ត្រីជំនាញមានការសង្ស័យថា ជារថយន្តដែលលួចនាំចូលពីប្រទេសជិតខាង ដែលច្បាប់បានហាមឃាត់ ហើយគេចវេសមិនបង់ពន្ ធ។ លើសពីនេះ គេសង្ស័យទៀតថា រថយន្តទាំងនេះពាក់ស្លាកលេខក្លែងបន្លំទៀតផង ។ ក្រោយពីសួរនាំក្នុងរយៈពេលខ្លី កម្លាំងជំនាញ បាននាំយករថយន្តទាំង៣គ្រឿងនោះ ទៅរក្សាទុកនៅស្នាក់ការគយចល័យ ក្នុងឃុំអូរតាគី ស្រុកថ្មគោល ជាបណ្ដោះអាសន្នហើយ ដើម្បីធ្វើការត្រូតពិនិត្យឯកសារតាមនីតិវិធី ។
គួរកត់សម្គាល់ដែរ ចំពោះរថយន្តប្រភេទខាងលើនេះ ដែលគេសង្កេតឃើញមានច្រើនស្អេកស្កះ កំពុងធ្វើចរាចរណ៍យ៉ាងប្រសេកប្រសាចនៅតាមដងផ្លូវសាធារណៈនានា ពាសពេញក្រុងបាត់ដំបង កាន់តែច្រើនទៅៗទៀតផង ទាំងរថយន្តចង្កូតស្ដាំ ទាំងរថយន្តចង្កូតឆ្វេង ។ រថយន្តស៊េរីទំនើបៗទាំងនោះ ត្រូវគេបំពាក់ស្លាកលេខស៊ីវិល ស្លាកលេខខេមរភូមិន្ទ ស្លាកលេខនគរបាល និង ស្លាកលេខក្រហម (ចង្គូតស្ដាំ)។
បើតាមព័ត៌មានដែលទម្លាយដោយអ្នកប្រកបមុខរបរលក់ និងទិញរថយន្តនៅក្នុងក្រុងបាត់ដំបង ក៏ដូចជាប្រភពព័ត៌មានពីមន្ត្រីពាក់ព័ន្ធមួយចំនួនបាននិយាយថា មានតែខ្សែស្រឡាយអ្នកមានអំណាច ឬ មន្ត្រីមានអំណាចទេ ដែលហ៊ានជិះរថយន្តមិនស្របច្បាប់ទាំងនេះលើផ្លូវសាធារណៈសព្វថ្ងៃនេះ។
ប្រភពដដែលបានបង្ហើបឲ្យដឹងថា រថយន្តដែលពាក់ស្លាកលេខ ដូចការរៀបរាប់ខាងលើ ហើយបាននិងកំពុងធ្វើចរាចរណ៍ពាសពេញក្រុងបាត់ដំបង រាល់ថ្ងៃនេះអាចប៉ាន់ប្រមាណបានថា «ស្ទើរពាក់កណ្ដាល ជារថយន្តមិនស្របច្បាប់ (រថយន្តគេចពន្ធ) ហើយពាក់ស្លាកលេខក្លែងបន្លំ»។ ជាពិសេស រថយន្តចង្កូតស្ដាំ ពាក់ស្លាកលេខក្រហម និង រថយន្តពាក់ស្លាកលេខនគរបាល តែម្ដងដែលកំពុងជិះបង្អូតស្លាកលេខព្រោងព្រាត។ ប៉ុន្តែរថយន្តទាំងនេះ បែរជាមិនទាក់ភ្នែកកម្លាំងនគរបាលចរាចរណ៏ស្ទើរគ្រប់គោលដៅ ដែលកំពុងបណ្ដាក់គ្នាដូចខ្យងត្រូតពិនិត្យចរាចរណ៍នៅតាមដងផ្លូវនានាទៅវិញ ? (សម្រួលដោយ៖ ស្រីណា)
ចែករំលែកព័តមាននេះ