ខេត្តសៀមរាប ៖ នេះ បើតាមរបស់លោកវរសេនីយ៍ឯក មិន ចន្ថា អធិការដ្ឋាននគរបាលស្រុកប្រាសាទបាគងបានប្រាប់ នៅថ្ងៃទី២១ ខែតុលានេះថា ក្រោយពីបានទទួលពាក្យបណ្តឹងរបស់ជនរងគ្រោះឈ្មោះ ស្រី ង៉ិក ភេទប្រុស អាយុ៣៨ឆ្នាំ រស់នៅភូមិដូនទាវ ឃុំរលួស ខេត្តសៀមរាប ទើបសមត្ថកិច្ចបានចុះស្រាវជ្រាវ ករណីគាស់តូបលួចយកទូរស័ព្ទ តាមរយៈកាមេរ៉ាសុវត្ថិភាពរបស់ម្ចាស់តូប ហើយឃាត់ខ្លួនជនសង្ស័យជាបន្តបន្ទាប់ ។ ហេតុការឃាត់ខ្លួនបានជនសង្ស័យនេះធ្វើឡើង នាថ្ងៃទី១៩ ខែតុលានេះ ស្ថិតនៅចំណុចផ្សាររលួស ក្នុងភូមិដូនទាវ ឃុំរលួស ស្រុកប្រាសាទបាគង ខេត្តសៀមរាប ។
លោកវរសេនីយ៍ឯកមិន ចន្ថា អធិការដ្ឋាននគរបាលស្រុកប្រាសាទបាគង បានបញ្ជាក់ថា កាលពីយប់ថ្ងៃទី១៧ ខែតុលានេះ មានករណីក្រុមចោរលួចគាស់តូបលក់ទូរស័ព្ទបានសម្រេច ហើយគេចខ្លួនបាត់នៅចំណុចផ្សាររលួស ស្ថិតនៅក្នុងភូមិដូនទាវ ឃុំរលួស ស្រុកប្រាសាទបាគង ដែលជនរងគ្រោះខាងលើ រស់នៅភូមិដូនទាវ ខេត្តសៀមរាប បានចាក់សោទុកដាក់នៅក្នុងទូស្រួលបួលក្នុងតូប ហើយត្រឡប់ទៅផ្ទះវិញដោយនៅទីនោះគ្មានសន្តិសុខយាមទើបធ្វើឱ្យបាត់តាមតូបជាច្រើនលើក ។
ជនសង្ស័យប្រុសស្រីទាំង១១នាក់ ដែលសមត្ថកិច្ចឃាត់ខ្លួនបានជាបន្តបន្ទា ក្នុងនោះមាន ទី១-ឈ្មោះ ភឿន រិទ្ធ អាយុ១៦ឆ្នាំ រស់នៅភូមិរលួសខាងលិច ឃុំរលួស ខេត្តសៀមរាប។ ទី២- ឈ្មោះ និល ពេជ្រ អាយុ១៧ឆ្នាំ រស់នៅភូមិរលួសខាងកើត ឃុំរលួស ខេត្តសៀមរាប។ ទី៣- ឈ្មោះ យ៉ង់ រិទ្ធី អាយុ១៥ឆ្នាំ នៅភូមិរលួសខាងកើត ឃុំរលួស ខេត្តសៀមរាប ។ ទី៤-ឈ្មោះ ឡាន គឹមលាង អាយុ១៦ឆ្នាំ រស់នៅភូមិស្ទឹង ឃុំបាគង ខេត្តសៀមរាប ។ ទី៥-ឈ្មោះ ជិម សេងលី (ហៅ វិត) អាយុ១៧ឆ្នាំ រស់នៅភូមិដូននុំ ឃុំមានជ័យ ខេត្តសៀមរាប ។ ទី៦-ឈ្មោះ ហៃ ឡោក (ហៅឈីត) អាយុ១៦ឆ្នាំ រស់នៅភូមិថ្នល់ត្រង់ ឃុំបាគង ខេត្តសៀមរាប។
ទី៧-ឈ្មោះ ថាន់ រិទ្ធី (ហៅហីង) អាយុ១៤ឆ្នាំ រស់នៅភូមិចំបក់ ឃុំរលួស ខេត្តសៀមរាប។ ទី៨-ឈ្មោះ ឆេង លីហួរ (ហៅស៊ឺ) អាយុ១៦ឆ្នាំ នៅភូមិរលួសខាងកើត ឃុំរលួស ខេត្តសៀមរាប ។ ទី៩- ឈ្មោះ កយ មួយកញ្ញា ភេទស្រី អាយុ១៦ឆ្នាំ រស់នៅភូមិរលួសខាងកើត ឃុំរលួស ខេត្តសៀមរាប ។ ទី១០-ឈ្មោះ រ៉ា ប៉ង អាយុ១៦ឆ្នាំ រស់នៅរលួសខាងលិច ឃុំរលួស ។ និងទី១១-ឈ្មោះ យ៉ង់ រិទ្ធី អាយុ១៥ឆ្នាំ រស់នៅភូមិរលួសខាងកើត ឃុំរលួស ស្រុកប្រាសាទបាគង ខេត្តសៀមរាប ។
លោកបញ្ជាក់ថា សម្ភារៈដែលត្រូវចោរលួចគាស់តូបយកបាត់បង់រួមមាន ទូរស័ព្ទ SAMSUNG០៥គ្រឿង, ទូរស័ព្ទOPPO០៥គ្រឿង, ទូរស័ព្ទ HUAWEI ០៥គ្រឿង, ទូរស័ព្ទ NOKIA (អិនចុចពិល) ៥០គ្រឿង, POWER BANG ៥គ្រឿង, កាសប្លូធូ១០ខ្សែ ។ ក្រោយពីកម្លាំងជំនាញបានធ្វើការឃាត់ខ្លួនជនសង្ស័យ ប្រុសស្រី ទាំង១១នាក់ ក្នុងនោះពួកគេបានសារភាពថា ពួកខ្លួនពិតជាបានធ្វើសកម្មភាពលួចគាស់តូបលក់ទូរស័ព្ទដៃនៅផ្សាររលួសពិតប្រាកដដូចម្ចាស់ប្តឹងសមត្ថកិច្ចពិតមែន ។
បច្ចុប្បន្នជនសង្ស័យ ទាំងអស់ត្រូវបានកម្លាំងជំនាញរៀបចំកសាងសំណុំរឿងបញ្ជូនទៅសាលាដំបូងខេត្តសៀមរាប ដើម្បីអនុវត្តតាមនីតិវិធីបន្ត ។ចំណែកសម្ភារៈដែលបានដកហូតពីជនសង្ស័យមួយចំនួនត្រូវប្រគល់ឱ្យម្ចាស់ដើមវិញហើយ ៕ កែសម្រួលដោយ ៖ សុឃាក់
ចែករំលែកព័តមាននេះ