តើអ្នកកំពុងតែជួបការលំបាកក្នុងការសម្រេចចិត្តថា គួរទិញនាឡិកាថ្លៃៗសម្រាប់ខ្លួនឯងមែនទេ ? មិនថា អ្នកមានទ្រព្យសម្បត្តិស្តុកស្តម្ភ ឬអត់ទេ ការសម្រេចចិត្តក្នុងការទិញអ្វីដែលមានតម្លៃខ្ពស់ដូចនេះ គួរតែឆ្លងកាត់ការពិចារណាឲ្យបានគ្រប់គ្រាន់ ដើម្បីដឹងឲ្យច្បាស់ថា វាពិតជាសាកសមនឹងតម្លៃដ៏ថ្លៃពិតមែនទេ…
តើអ្នកកំពុងតែជួបការលំបាកក្នុងការសម្រេចចិត្តថា គួរទិញនាឡិកាថ្លៃៗសម្រាប់ខ្លួនឯងមែនទេ ? មិនថា អ្នកមានទ្រព្យសម្បត្តិស្តុកស្តម្ភ ឬអត់ទេ ការសម្រេចចិត្តក្នុងការទិញអ្វីដែលមានតម្លៃខ្ពស់ដូចនេះ គួរតែឆ្លងកាត់ការពិចារណាឲ្យបានគ្រប់គ្រាន់ ដើម្បីដឹងឲ្យច្បាស់ថា វាពិតជាសាកសមនឹងតម្លៃដ៏ថ្លៃពិតមែនទេ ។ ខាងក្រោមនេះ គឺជាកត្តាមួយចំនួនដែលអ្នកគួរពិចារណាជាមុនសិនពេលធ្វើការសម្រេចចិត្ត ៖
១. តើវាមានគុណភាពស័ក្កិសមនឹងតម្លៃទេ?
ជាទូទៅ នាឡិកាថ្លៃៗត្រូវបានផលិតឡើងដោយមានការយកចិត្តទុកដាក់លើគ្រប់ផ្នែក ។ ដូចជានាឡិកាស្វីសជាដើមដែលមានផ្នែកជាច្រើនត្រូវបានផលិតឡើងដោយដៃផ្ទាល់ និងមានគុណភាពខ្ពស់ដែលនរណាៗក៏កោតសរសើរ ។
២. តើវាធ្វើឲ្យអ្នកនឹងឃើញដល់អ្វី?
នាឡិការបស់អ្នកអាចជារង្វាន់លើកទឹកចិត្តដល់អ្នកដែលរំលឹកអ្នកពីការខិតខំប្រឹងប្រែងដែលជួយឲ្យអ្នករកចំណូលដើម្បីទិញវាបាន ។ វាមិនត្រឹមតែប្រាប់អ្នកថាពេលនេះម៉ោងប៉ុន្មានហើយទេ តែគួរតែរំលឹកអ្នកដល់អ្វីដែលអ្នកបានសម្រេច ដែលអាចជួយជំរុញទឹកចិត្តអ្នកឲ្យខិតខំបន្តថែមទៀត ។ ឬមួយវាជាអំណោយដែលរំលឹកដល់ពិធីពិសេសនៃជីវិតរបស់អ្នកដូចជាថ្ងៃគំរប់ខួបអាពាហ៍ពិពាហ៍ និងថ្ងៃកំណើតកូនរបស់អ្នកជាដើម ។ ហើយប្រាកដណាស់ចំណុចនេះគឺទាក់ទិននឹងសមត្ថភាពក្នុងការទិញរបស់អ្នក ។ ប្រសិនបើអ្នកត្រូវបង់រំលួស ឬខ្ចីលុយអ្នកដទៃដើម្បីទិញវាទេវាមានតែរំលឹកអ្នកដល់បំណុលដែលអ្នកត្រូវសងប៉ុណ្ណោះ ។
៣. តើវាអាចក្លាយជាការវិនិយោគមួយទេ ?
នាឡិការបស់ប្រេនល្បីៗមួយចំនួនដូចជា Rolex និង Patek Philippe រក្សាតម្លៃរបស់ពួកគេបានយូរអង្វែង ហើយមាននាឡិកាមួយចំនួនឡើងថ្លៃវិញថែមទៀតដូចជា Pepsi GMT-Master របស់ Rolex ជាដើមដែលកំពុងមានតម្រូវការខ្ពស់ព្រោះតែមានការផ្គត់ផ្គង់តិច ។
ដូច្នេះបើនាឡិកាដែលអ្នកចង់ទិញមិនមានអត្ថន័យជ្រៅសម្រាប់អ្នកឡើយ អ្នកគួរជ្រើសរើសនាឡិកាដែលអាចរក្សាតម្លៃបានយូរ ដូច្នេះពេលដែលអ្នកសម្រេចចិត្តលក់វាចេញវិញ អ្នកមិនខាតថ្លៃច្រើន ហើយថែមទាំងអាចរកប្រាក់ចំណេញពីវាថែមទៀតប្រសិនបើអ្នកមានសំណាង ៕ កែសម្រួលដោយ ៖ សុឃាក់
ចែករំលែកព័តមាននេះ